ވިއްސާރައިގައި އުތުރުގެ ރަށްތަކުގެ ގިނަ ގެތަކަކަށް ގެއްލުން؛ ބައެއް ގެތަކުގެ އަޑިންވެސް ފެން އަރަމުންދޭ: އެންޑީއެމްއޭ

މިހާރު ރާއްޖެއަށް ކުރަމުންދާ ވިއްސާރައިގައި ރާއްޖޭގެ އުތުރުގެ ރަށްތަކަށް ބޯކޮށް ވާރޭވެހި، ފެންބޮޑުވުމުގެ ސަބަބުން ގިނަ ގެތަކަކަށް ފެންވަދެ ބޮޑެތި ގެއްލުންތަކެއް ލިބެމުންދާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.

އެންޑީއެމްއޭ އިން މިއަދު އެކްސްގައި ކުރި ޕޯސްޓްގައިވާގޮތުން، ހދ. ނޮޅިވަރަންފަރަށް ބޯކޮށް ވާރޭވެހި ރަށުތެރޭގައި ފެންބޮޑުވުމާ ގުޅިގެން 60 އަށްވުރެ ގިނަ ގެއަކުން ވަނީ އެހީތެރިކަމަށް އެދި ރިޕޯޓްކޮށްފައެވެ.

އެ ރަށުގެ ގިނަ ގެތަކުގެ އަޑިން ފެން އަރަމުންދާއިރު، ގޭގޭގައި ހިފާގެންގުޅޭ ސާމާނަށް ވަނީ އެކިވަރުގެ ގެއްލުންތައް ވެފައެވެ. ނަމަވެސް، މީހުން ގެދޮރުން ހުސްކުރަންޖެހޭ ފަދަ ޙާލަތަކަށް އަދި ކަންކަން ނުދާ ކަމަށް އެ އިދާރާއިން ބުނެއެވެ.

ނޮޅިވަރަންފަރު ކައުންސިލާ ހަވާލާދީ އެންޑީއެމްއޭ އިން ބުނީ، އަދިވެސް އެ ރަށަށް ވާރޭ ވެހެމުންދާއިރު، ފުލުހުންނާއި ރައްޔިތުން ގުޅިގެން ވެލިބަސްތާ ޖެހުމުގެ މަސައްކަތް ހުއްޓުމެއްނެތި ކުރަމުންދާ ކަމަށެވެ.

މީގެއިތުރުން، ކުޅުދުއްފުށި ސިޓީއަށްވެސް މެދުކެނޑުމެއްނެތި ބޯކޮށް ވާރޭވެހި ފެންބޮޑުވުމުގެ ސަބަބުން މިހާތަނަށް 190 އަށްވުރެ ގިނަ ގެއިން ވަނީ ރިޕޯޓްކޮށްފައެވެ. ކުޅުދުއްފުށީ ކައުންސިލުން މިހާރު ދަނީ ގެއްލުންވި ގެތަކުގެ ހާލަތު ވަޒަންކުރަމުންނެވެ.

އަދި ކައުންސިލާއި، ދިވެހި ފުލުހުންގެ ޚިދުމަތާއި، އެމްއެންޑީއެފް ފަޔަރ އެންޑް ރެސްކިއު ސަރވިސްގެ އިތުރުން މޯލްޑިވިއަން ރެޑް ކްރެސެންޓް (އެމްއާރުސީ) ގުޅިގެން ރަށުތެރޭގައި ބޮޑުވެފައިވާ ފެންގަނޑު ހިންދުމުގެ މަސައްކަތް ކުރިއަށްގެންދާ ކަމަށް އެ އިދާރާއިން ބުނެފައިވެއެވެ.

އެންޑީއެމްއޭ އިން ބުނީ، ވިއްސާރައިގެ އަސަރުކުރަމުންދާ ރަށްތަކުގެ ހާލަތު އެ އޮތޯރިޓީން ވަރަށް ގާތުން މޮނިޓަރ ކުރަމުން އަންނަ ކަމަށެވެ. އަދި ހާލުގައި ޖެހި އިންސާނީ އެހީތެރިކަން ފޯރުކޮށްދޭން ޖެހޭ ފަރާތްތަކަށް، ކައުންސިލްތަކާ ގުޅިގެން އެހީތެރިކަން ފޯރުކޮށްދިނުމުގެ އެންމެހައި އިންތިޒާމުތައް ހަމަޖައްސަމުން އަންނަ ކަމަށްވެސް އެ އިދާރާއިން ބުނެއެވެ.

ރާއްޖޭގެ މޫސުން ގޯސްވެފައިވާއިރު، މޫސުމާ ބެހޭ ޤައުމީ އިދާރާ (މެޓް އޮފީސް) އިން ވަނީ މިއަދު މެންދުރު 3:00 އާ ހަމައަށް ހއ. އަތޮޅުން ފެށިގެން އދ. އަތޮޅާ ދެމެދުގެ ސަރަޙައްދުތަކަށް ހުދު ސަމާލު ނެރެފައެވެ.

އެ ވަގުތުގައި އެ ސަރަޙައްދުތަކަށް ބޯކޮށް ވާރޭވެހުމާއެކު ގުގުރާނެ ކަމަށާއި، ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށް މެޓް އޮފީހުން ވަނީ ލަފާކޮށްފައެވެ.

އެހެންކަމުން މޫސުމަށް ސަމާލުވެ ރައްކާތެރިކަމުގެ ފިޔަވަޅުތައް އެޅުމަށް ކަމާބެހޭ އިދާރާތަކުން އިލްތިމާސްކުރެއެވެ.