މޮރޮކޯ އިން ކްރޮއޭޝިއާ މޮޅުވިޔަނުދީ ހިފަހައްޓައިފި

ފީފާ ވޯލްޑް ކަޕް 2022 ގެ ގްރޫޕް އެފްގައި 2018 ގެ ވޯލްޑްކަޕުގެ ރަނަރަޕް ކްރޮއޭޝިއާ މޮޅުވިޔަނުދީ މޮރޮކޯ އިން ހިފަހައްޓައިފިއެވެ.

މި މެޗު ނިމުނީ ދެ ޓީމުންކުރެ ޓީމަކަށް ލަނޑެއް ކާމިޔާބުނުކުރެވި އެވެ. ދެ ޓީމަށްވެސް މި މެޗުގައި ވަނީ ލަނޑު ޖަހާނެ ރަނގަޅު ފުރުސަތުތަކެއް ލިބި ބޭކާރުވެފައެވެ.

މެޗުގެ 17 ވަނަ މިނެޓުގައި ކްރޮއޭޝިއާގެ ޕެރިސިޗް ވަނީ ނުރައްކާތެރި ހަމަލާއެއް އުފައްދާފައެވެ. އެކަމަކު އޭނާ އޭރިޔާ ބޭރުން ފޮނުވާލި ހަމަލާ ގޯލު ދަނޑިކައިރިން ދިޔައީ ބޭރަށެވެ.

މީގެއިތުރުން މެޗުގެ 34 ވަނަ މިނެޓުގައި ކްރޮއޭޝިއާގެ ޖްރޮނޮވިޗް ވަނީ ނުރައްކާތެރި ހަމަލާއެއް އުފައްދާފައެވެ. އެކަމަކު އޭނާ ބޮލުން ފޮނުވާލި ހަމަލާގެ ހުރަހަކަށްވީ މޮރޮޚޯގެ ކީޕަރެވެ.

ފުރަތަމަ ހާފު ނިމުމުގެ ކުރިން ކްރޮއޭޝިއާއަށް ވަނީ ލީޑު ނަގަން ރަނުގެ ފުރުސަތެއް ލިބި ބޭކާރުވެފައެވެ. ކްރޮއޭޝިއާގެ ވްލާސިޗް ފޮނުވާލި ހަމަލާ މޮރޮކޯގެ ކީޕަރު ވަނީ ދިފާއުކޮށްފައެވެ.

މެޗުގެ ދެވަނަ ހާފުގައި މޮރޮކޯ އަށް ވަނީ ލަނޑު ޖަހާނެ ރަނުގެ ފުރުސަތުތަކެއް ލިބި ބޭކާރުވެފައެވެ. އެގޮތުން މޮރޮކޯގެ ހަކީމް ޒިޔެޗް އާއި އަޝްރަފް ހަކީމީއަށް ވަނީ ލަނޑު ޖެހުމަށް ރަނގަޅު ފުރުސަތުތަކެއް ލިބި ބޭކާރުވެފައެވެ.