އީރާނުގެ ހަނގުރާމަ ނިމިދާނެކަމުގެ އުންމީދާއެކު ތެލާއި ޑޮލަރުގެ އަގު ދަށަށް

މެދުއިރުމަތީގައި ކުރިއަށްދާ ހަނގުރާމަ ނިމި، ހަމަނުޖެހުންތަކަށް ހައްލެއް ފެނިދާނެކަމަށް ބެލެވުމާއެކު، ދުނިޔޭގެ ބާޒާރުގައި ޑޮލަރާއި ތެލުގެ އަގު ދަށަށް ދާން ފަށައިފިއެވެ.

މިއަދު އޭޝިއާގެ ބާޒާރުތައް ހުޅުވުނުއިރު، ޖަޕަނީޒް ޔެންއާ އަޅާބަލާއިރު ޑޮލަރު ހުރީ 157.73 ގައެވެ. އަދި ޔޫރޯއަކަށް ޖެހެނީ 1.1632 ޑޮލަރެވެ. މިއީ އިއްޔެއާ އަޅާބަލާއިރު ކުޑަ ދަށްވުމެކެވެ.

ޑޮލަރުގެ އަގު މިގޮތަށް ބަދަލުވާން ފެށީ، އީރާނާ ދެކޮޅަށް ކުރާ ހަނގުރާމަ ނިމެމުންދާ ކަމަށާއި، ކުރިން އުންމީދުކުރި ވަރަށްވުރެ އަވަހަށް ކަންކަން ހަމައަކަށް އެޅެމުންދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ސީ.ބީ.އެސް ނިއުސްއަށް ދިން ބަސްދީގަތުމަކާ ގުޅިގެންނެވެ.

ޓްރަމްޕްގެ މި ވާހަކަތަކަށް އީރާނުގެ ރިވޮލިއުޝަނަރީ ގާޑްސްއިން އިންކާރުކޮށް، އެއީ "ބޭކާރު" ވާހަކަތަކެއް ކަމަށް ބުނި ނަމަވެސް، ބައިނަލްއަގުވާމީ ވިޔަފާރިވެރިން މިހާރު ތިބީ މަޑުޖެހިލައިގެން މަސްރަޙު ދިރާސާކުރުމުގެ މަރުހަލާއެއްގައެވެ.

މީގެ ނަތީޖާއެއްގެ ގޮތުން، އިއްޔެ ފީފާއެއް 120 ޑޮލަރަށް އުފުލުނު ބްރެންޓް ކްރޫޑް ތެލުގެ އަގު މިއަދު ހެނދުނު ވަނީ 92.46 ޑޮލަރަށް ތިރިވެފައެވެ.

ސިޑްނީގެ ނޭޝަނަލް އޮސްޓްރޭލިއާ ބޭންކުގެ އިސް ސްޓްރެޓެޖިސްޓް ރޮޑްރިގޯ ކެޓްރިލް ވިދާޅުވި ގޮތުގައި، ބާޒާރު މިވަގުތު އޮތީ "ނޭވާލާނެ ފުރުސަތެއް" ލިބިފައެވެ.

ނަމަވެސް، ހަނގުރާމަ ނިމުނީ ކަމަށް ނިންމައިގެން ތިބުމަކީ ފަސޭހަކަމެއް ނޫން ކަމަށާއި، އަދިވެސް ބާޒާރުގައި އަގުތައް އުފުލި ތިރިވުމުގެ ފުރުސަތު އެބައޮތް ކަމަށް އޭނާ ފާހަގަކުރެއްވިއެވެ.

އެމެރިކާ އާއި އިސްރާއީލުން އީރާނަށް ދެމުންދާ ހަމަލާތަކުގެ ސަބަބުން ހޯރްމޫޒް ކަނޑުއޮޅި މެދުވެރިކޮށް ތެޔޮ ބޭރުކުރުން ހުއްޓުމަކަށް އައުމަކީ ދުނިޔޭގެ އިގްތިސާދީ ކުރިއެރުމަށް އޮތް ބޮޑު ބިރެކެވެ. މީގެ ސަބަބުން ތަކެތީގެ އަގު އުފުލި، މަރުކަޒީ ބޭންކުތަކުން އިންޓްރެސްޓް ރޭޓް ކުޑަކުރުމަށް ހުރަސްއެޅިދާނެ ކަމުގެ ކަންބޮޑުވުން އިންވެސްޓަރުންގެ މެދުގައި ވަނީ އުފެދިފައެވެ.