ރަސްމީދަތުރުފުޅެއްގައި ރައީސުލްޖުމްހޫރިއްޔާ ޤަޠަރަށް ފުރާވަޑައިގެންފި

ޤަޠަރުގެ ކުރީގެ އަމީރު، ޝައިޚް ޙަމަދު ބިން ޚަލީފާ އަލްޘާނީ އަވަހާރަވުމާ ގުޅިގެން، އެ ޤައުމުގެ ޝާހީ ޢާއިލާއަށް ތައުޒިޔާ ވިދާޅުވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ހެނދުނު ޤަޠަރަށް ފުރާވަޑައިގެންފިއެވެ.

ރައީސުލްޖުމްހޫރިއްޔާގެ އޮފީހުން މަޢުލޫމާތު ދޭގޮތުގައި، ރައީސުލްޖުމްހޫރިއްޔާ ކުރައްވާ މި ރަސްމީ ދަތުރުފުޅަކީ ޤަޠަރުގެ ކުރީގެ އަމީރު އަވަހާރަވުމުގެ ހިތާމައިގައި ބައިވެރިވެވަޑައިގެން، މިހާރުގެ އަމީރު ޝައިޚް ތަމީމް ބިން ޙަމަދު އަލްޘާނީއަށާއި ޝާހީ ޢާއިލާއަށް އިޚްލާޞްތެރިކަމާއެކު ތައުޒިޔާ ދެންނެވުމަށް ކުރައްވާ ދަތުރުފުޅެކެވެ.

އުމުރުފުޅުން 74 އަހަރުގައި ޝައިޚް ޙަމަދު އަވަހާރަވީ އިއްޔެ ހެނދުނުގެ ވަގުތެއްގައެވެ.

މި ޚަބަރު ލިބިވަޑައިގަތުމާ ގުޅިގެން ރައީސުލްޖުމްހޫރިއްޔާ ޑރ. މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، ޝައިޚް ޙަމަދު އަވަހާރަވީ ޚަބަރު އެއްސެވީ ފުން ހިތާމަޔާއެކު ކަމަށެވެ. އެމަނިކުފާނަކީ ޤަޠަރުގެ ކުރިއެރުމަށާއި ތަރައްޤީއަށް ދުރުވިސްނޭ އާދަޔާޚިލާފު ލީޑަރޝިޕެއް ދެއްކެވި ބޭފުޅެއްކަން ރައީސް ފާހަގަކުރެއްވިއެވެ. އަދި ޤަޠަރުގެ ސަރުކާރާއި ރައްޔިތުންނަށް ތައުޒިޔާ ފޮނުއްވައި، މަރްޙޫމްގެ ފުރާނަފުޅަށް ސުވަރުގޭގެ ދާއިމީ ނިޢުމަތް މިންވަރުކޮށްދެއްވުން އެދި ދުޢާކުރެއްވިއެވެ.

ޝައިޚް ޙަމަދު ޤަޠަރުގެ އަމީރުކަން ކުރެއްވީ 1995 އިން 2013 ވަނަ އަހަރާ ހަމައަށެވެ. އެމަނިކުފާނުގެ 18 އަހަރުވީ ޒަޢާމަތުގައި ޤަޠަރު ވަނީ ދުނިޔޭގެ އެންމެ މުއްސަނދި އެއް ޤައުމަށް ބަދަލުކޮށްލައްވާފައެވެ. އެގޮތުން ޤަޠަރުގެ ގޭސް އުފައްދާ މިންވަރު 77 މިލިއަން ޓަނަށް އިތުރުކުރައްވައި، ރައްޔިތުންގެ ބޮލަކަށް ޖެހޭ އާމްދަނީ 86,440 ޑޮލަރަށް އުފުއްލެވިއެވެ. މީގެ އިތުރުން ޤަޠަރު އިންވެސްޓްމަންޓް އޮތޯރިޓީ (ކިއު.އައި.އޭ) އުފައްދަވައި، އިނގިރޭސިވިލާތުގެ "ދަ ޝާޑް" އިމާރާތާއި، ހެރޮޑްސް އަދި ޕެރިސް ސެއިންޓް ޖާމަން ކްލަބް ފަދަ ދުނިޔޭގެ މަޝްހޫރު ތަންތަނުގައި 100 ބިލިއަނަށްވުރެ ގިނަ ޑޮލަރު އިންވެސްޓްކުރެއްވިއެވެ.

ޚާރިޖީ ދާއިރާއިންނާއި ކުޅިވަރުގެ ދާއިރާއިންވެސް ޝައިޚް ޙަމަދު ވަނީ ބޮޑެތި ކާމިޔާބީތަކެއް ހޯއްދަވައިދެއްވާފައެވެ. އެގޮތުން 2006 ގެ އޭޝިއަން ގޭމްސްއާއި 2022 ގެ ފީފާ ވޯލްޑް ކަޕް ޤަޠަރުގައި ބޭއްވުމުގެ ފުރުޞަތު ހޯއްދަވައިދެއްވީ އެމަނިކުފާނެވެ. އަދި ސަރަޙައްދީ ސުލްޙައަށްޓަކައި "ދޯހާ އެއްބަސްވުން" ފަދަ މުހިންމު ސިޔާސީ މަޝްވަރާތައް ބޭއްވުމުގައިވެސް އެމަނިކުފާނު އިސްދައުރެއް އަދާކުރެއްވިއެވެ.

ޝައިޚް ޙަމަދު ވެރިކަން ދޫކޮށްލެއްވީ 2013 ވަނަ އަހަރު، ދަރިކަލުން އަދި މިހާރުގެ އަމީރު ޝައިޚް ތަމީމްއާ ވެރިކަން ޙަވާލުކުރެއްވުމަށްފަހުގައެވެ.