އެއްވެސް އިމެއްނެތި މޯބައިލް ފޯނާ ޓެބްލެޓް ސުކޫލު ކިޔަވާ ކުދިން އަތަށް ދިނުން ހުއްދައެއް ނުވާނެ: ޑރ. ޝަމީމް

އެއްވެސް އިމެއްނެތި މޯބައިލް ފޯނާ ޓެބްލެޓް ސުކޫލު ކިޔަވާ ކުދިން އަތަށް ދިނުން ހުއްދައެއް ނުވާނެ ކަމަށް ރާއްޖޭގެ ފުންނާބު އުސް ދީނީ ޢިލްމުވެރިޔާ ޑރ. އާދަމް ޝަމީމް ވިދާޅުވެއްޖެއެވެ.

ކުދިން މޯބައިލް ފޯނު ގެންގުޅުމުގެ ނުރައްކާތެރިކަމުގެ މައްޗަށް އަލިއަޅުވާލައްވައި ޑރ. ޝަމީމް ދެއްވި މިސްކިތު ދަރުހުގައި ވިދާޅުވީ، އެއްވެސް އިމެއް މިނެއް ނެތި ސުކޫލު ކުދިން އަތަށް މޮބައިލް ފޯނު ދީ، އެ މޮނީޓާ ނުކޮށް ހުރުމަކީ ބެލެނިވެރިންނަށް ހެދޭ ވަރަށް ބޮޑު ގޯހެއް ކަމަށެވެ. އެކަން ކޮންމެހެންވެސް ހުއްޓާލަންޖެހޭ ކަމަށް ޝެއިޚް ވިދާޅުވިއެވެ.

ސުކޫލު ކިޔަވާ ކުދިން، ކުޑަކުދިން ޚާއްސަކޮށް، އެކުދިންނަށް އަމިއްލަ މޮބައިލް ފޯނާ، އަމިއްލަ ޓެބާ، އަމިއްލަ އިންޓަނެޓާ، އެކުދިންނަށް އެއްވެސް ހަމައެއް ލަމައެއް ނެތި، ނުވަތަ އިމެއް މިނެއްނެތި، އެ ބެލޭނެ ގޮތެއްވެސް ނެތި، ދޫކޮށްފައި، އޭގެ ލަގަން އެކުދިން އަތަށް ދީފައި ބޭއްވުން އެއީ ނުބައެއް ގޯހެއް.  ވަރަށް ބޮޑު ގޯހެއް. އެކަން ހުއްދައެއް ނުވާނެ ބެލެނިވެރިންނަކަށް ކުރާކަށެއް. އެއީ، ވަރަށް ގިނަ ކުދިން ހައްދު ފަހަނައަޅައި ހަލާކުވެގެން އެބަދޭ އެކަމުގެ ސަބަބުން.

ޝެއިޚް އާދަމް ޝަމީމް

އެހެން ކަމުން ޚާއްސަކޮށް ގްރޭޑް 7 އިން މަތީގެ ދަރިވަރުންގެ އަތުގައި އަމިއްލަ މޮބައިލް ފޯނާއި އިންޓަނެޓް ދީފައި ބަހައްޓަން ނުވާނެ ކަމަށާ، އެކަންކަން، ބެލެހެއްޓުމަކީ ބެލެނިވެރިންނަށް ކުރަން އުނދަގޫވާނެ ކަމަށް ޝެއިޚް ވިދާޅުވިއެވެ.

އޭރުން ބެލެނިވެރިޔާއަށް ސުޕަވައިޒްއެއް ނުކުރެވޭނެ. އެކުއްޖާ އުޅޭ ގޮތެއް ނުބެލޭނެ. އެކުއްޖާ ގެއްލިދާނެ. އެހެނީ އޭގައި ހުރި އެންޓަޓައިންމަންޓްގައި (ގެއްލިދާނެ) މޮބައިން ފޯނާ އިންޓަނެޓް ކޮންޓްރޯލް ކުރަނީ އަޅުގަނޑުމެންނެއް ނޫން. އިބިލީހުގެ އެންމެ ނުރައްކާ އެންމެ ވަރުގަދަ ނެޓްވޯކަކީ އެއީ. މީސްތަކުން މަގުފުރައްދަން. ކުދިބޮޑު އެންމެންވެސް މަގުފުރައްދަން ބޭނުންކުރާ އެންމެ ވަރުގަދަ ވަސީލަތަކީ އިންޓަނެޓް

ޝެއިޚް އާދަމް ޝަމީމް

ކުދިން އަތަށް މޮބައިލް ފޯނު ދިނުމުގެ ނުރައްކާތެރިކަމުގެ މައްޗަށް ޝެއިޚް އަލިއަޅުވާލައްވާފައިވާއިރު، ދާދިފަހުންވެސް ކުދިން ސުކޫލަށް މޮބައިލް ފޯނު ގެންގޮސް ބަދުއަޚްލާގީ މަންޒަރު ހުންނަ ވީޑިއޯ ބެލި މައްސަލައެއް ވަނީ ފެންމަތިވެފައެވެ.

އެ ފަދަ ކަންކަން ތަކުރާރު ވަމުންދާތީ 10 އިން ދަށުގެ ކުދިންނަށް ސުކޫލަށް މޮބައިލް ފޯނު ގެންދިޔުން ވަނީ މަނާކޮށްފައެވެ. އަދި ހައި ސުކޫލު ކުދިންވެސް ކިޔަވައިދޭ ގަޑީގައި ފޯނުގެންގުޅުން ވަނީ މަނާ ކޮށްފައެވެ.