ކ.ގުރައިދޫ ރެއިޑުން އެނގުނީ، ނުގަވައިދުން އުޅޭ ބިދޭސީން ރަށްރަށުގައިވެސް ގިނަކަން

ޤަވައިދާ ހިލާފަށް އުޅޭ ބިދޭސީން ހޯދުމަށް މާލެ ސަރަހައްދުގައި އިމިގްރޭޝަނުން ފެށި އޮޕަރޭޝަނުން އެނގިގެންދިޔައީ، ނުގަވައިދުން އުޅޭ ބިދޭސީން އިންތިހާއަށް ގިނަކަމެވެ. އެފަދަ ބިދޭސީން ހޯދުމަށް އިމިގްރޭޝަނުން ކަމާބެހޭ މުއައްސަސާތަކާއެކު މާލެ އަދި ހުޅުމާލޭގައި ކުރިއަށްގެންދިޔަ އޮޕަރޭޝަން ކުރިއަށް ޖައްސާލުމުން މާލޭގައި އުޅެމުންދިޔަ ބައެއް ބިދޭސީން މިސްރާބް ޖެހީ އަތޮޅުތެރޭގެ ރަށްތަކަށެވެ.

މިއަހަރުގެ އޮގަސްޓަމަހުގެ 28 ވަނަ ދުވަހު މާލޭގައި ކުރިއަށްގެންދިޔަ އޮޕަރޭޝަނަށްފަހު ނޫސްވެރިންނާ ވާހަކަދައްކަވަމުން އިމިގްރޭޝަން ކޮންޓްރޯލާ މުހައްމަދު ޝައްމާން ވިދާޅުވެފައިވަނީ، ނުގަވައިދުން އުޅޭ ބިދޭސީން ހޯދުމަށް މާލެ ބަލައި ފާސްކުރަން ފެށުމާއެކު ގިނަ އަދަދެއްގެ ބިދޭސީން އަތޮޅުތެރޭގެ ރަށްތަކަށް ދާކަމުގެ މައުލޫމާތު ލިބިފައިވާކަމަށެވެ. އެހެންކަމުން ކުރިއަސްއޮތް ތަނުގައި ރަށްރަށުގައިވެސް އެ އޮޕަރޭޝަން ކުރިއަށްގެންދާނޭކަމަށް ޝައްމާން ވިދާޅުވިއެވެ.

އިމިގްރޭޝަނުން މިހާތަނަށް ނޫސްވެރިންނާ ހިއްސާކުރި މައުލޫމާތު ތަކަށް ބަލާއިރު، މިހާރުވެސް ބައެއް ރަށްރަށަށް ބިދޭސީން ދާ މައްސަލަ ވަނީ ބޮޑުވެފައެވެ. މީގެ ތެރޭގައި ކުޅުދުއްފުށި ސިޓީ ފާހަގަކޮށްލެވެއެވެ. ކުޅުދުއްފުށި ކައުންސިލުން ވަނީ އެކަން އިމިގްރޭޝަނުގެ ސަމާލުކަމަށްވެސް ގެނެސްފައެވެ.

އިމިގްރޭޝަނުން ބުނީ މިއަދު ގުރައިދޫގައި ކުރިއަށްގެންދިޔަ އޮޕަރޭޝަނުގައި 39 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެނެސްފައިވާކަމަށެވެ. އިމިގްރޭޝަނުގެ ބެލުމުގެ ދަށަށް ގެނެވުނު ބިދޭސީން ނިސްބަތްވާ ޤައުމުތަކުގެ ތެރޭގައި، ބަންގްލަދޭޝް، އިންޑިއާ، ސްރީލަންކާ، ނޭޕާލް އަދި ނައިޖީރިއާ ހިމެނެއެވެ.

ގުރައިދޫގައި ކުރިއަށްގެންދިޔަ އޮޕަރޭޝަނުގައި އިމިގްރޭޝަނުން ވަނީ 42 ތަނެއް ބަލައި ފާސްކޮށް 106 ބިދޭސީންނާ ސުވާލުކޮށްފައެވެ. މީގެ ތެރެއިން ވިސާ ފުރިހަމަނޫން 11 މީހުންނަށް ވަނީ އިމިގްރޭޝަނަށް ހާޒިރުވުމަށް ނޯޓިސްދީފައެވެ.

ކ.ގުރައިދޫގައި އިމިގްރޭޝަނުން ކުރިއަށްގެންދިޔަ އޮޕަރޭޝަނުގައި އެ މުއައްސަސާގެ 20 އޮފިސަރުންނާއި ފުލުހުންގެ 9 އޮފިސަރުން ބައިވެރިވިއެވެ. މީގެ އިތުރުން ކައުންސިލުގެވެސް ބައިވެރިވުން ލިބުނުކަމަށް އިމިގްރޭޝަނުން ބުންޏެވެ.

ނުގަވައިދުން އުޅޭ ބިދޭސީން ހޯދުމަށް އިމިގްރޭޝަނުން ކުރިއަށްގެންދާ އޮޕަރޭޝަނުގައި ވޭތުވެދިޔަ 10 މަސްދުވަހުގެ ތެރޭގައި 4،054 އަށްވުރެ ގިނަ ބިދޭސީން ޑީޕޯޓްކޮށްފައިވާނޭކަމަށް އިމިގްރޭޝަނުން ބުނެއެވެ.