އައު ބިލުގައި 'ރެސިޑެންޓް ވިސާ' އެއް ނެތް، ދައުރުވަނީ ދޮގު ވާހަކަތަކެއް: ވަޒީހު އިޙްސާން
ދިވެހިރާއްޖޭގެ އިމިގްރޭޝަން ގާނޫނަށް ގެންނަ އިސްލާހެއް ކަމަށް ބުނެ ސޯޝަލް މީޑިއާގައި ފަތުރަމުންދަނީ އެއްވެސް ހަގީގަތެއް ނެތް ދޮގު މައުލޫމާތުތަކެއް ކަމަށާއި، އެއީ މޯލްޑިވްސް އިމިގްރޭޝަނުން އެއްވެސް އިރަކު ގާނޫނަށް ހުށަހެޅުމަށް ވިސްނާފައިވާ އިބާރާތްތަކެއް ނޫން ކަމަށް މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީން އަލީ އިހްސާން ވުދާޅުވެއްޖެއެވެ.
ވަޒީރު ޢަލީ އިޙްސާން މީސްމީޑިއާގައި ހިއްސާކުރެއްވި މެސެޖެއްގައި ވިދާޅުވީ، ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވަނީ 50 ސަފްހާގެ މައްޗަށް އެކުލެވިގެންވާ މުޅިން އައު އިމިގްރޭޝަން ބިލެއް ކަމަށެވެ. މީގެއިތުރުން، މީސްމީޑިއާގައި ވާހަކަ ދެކެވެމުންދާ ފަދައިން، "ރެސިޑެންޓް ވިސާ" ގެ ނަމުގައި އެއްވެސް ބާވަތެއްގެ ވިސާއެއް އެ ބިލުގައި ހިމަނާފައި ނުވާނެކަމުގެ ފުރިހަމަ ޔަޤީންކަން ވެސް ވަނީ ދެއްވާފައެވެ.
ދިވެހިރާއްޖޭގެ އިމިގްރޭޝަނަކީ ރާއްޖޭގެ އެންމެހައި ރައްޔިތުންނާއި ގައުމީ ސަލާމަތާ ގުޅިފައިވާ ނުހަނު ހައްސާސީ މަސައްކަތްތަކެއް ކުރަމުން އަންނަ މުހިންމު އިދާރާއަކަށް ވާއިރު، އެ އިދާރާއާ ގުޅުވައިގެން މިފަދަ ހަގީގަތެއް ނެތް ދޮގު ވާހަކަތައް ނުފެތުރުމަށް އިހްސާން ވަނީ އިލްތިމާސްކުރައްވާފައެވެ.
އިމިގްރޭޝަންގެ އައު ބިލު ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާއިރު، މި ބިލުގެ މަސައްކަތް މަޖިލީހުގައި ކުރިއަށް ގެންދިއުމަށް ދަނީ ތައްޔާރުވަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް