ހޮރްމޫޒް ކަނޑުއޮޅީގައި ތާށިވެފައިވާ އުޅަނދުތައް "ޕްރޮޖެކްޓް ފްރީޑަމް" ގެ ދަށުން ބޭރުކުރާނަން: ޓްރަމްޕް

ހޮރްމޫޒް ކަނޑުއޮޅީގައި ތާށިވެފައިވާ ބޭރުގެ އުޅަނދުފަހަރު އެ ސަރަހައްދުން ރައްކާތެރިކަމާއެކު ބޭރުކުރުމަށްޓަކައި އެމެރިކާގެ ކަނޑުގެ ސިފައިން ހާއްސަ އޮޕަރޭޝަނެއް ފެށުމަށް ނިންމާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް އިޢުލާނު ކޮށްފިއެވެ.

އާދިއްތަ ދުވަހު މިކަން އިޢުލާނު ކުރަމުން ރައީސް ޓްރަމްޕް ވިދާޅުވީ، "ޕްރޮޖެކްޓް ފްރީޑަމް" ގެ ނަމުގައި ކުރިއަށްގެންދާ މި ހަރަކާތް މެދުއިރުމަތީގެ ވަގުތުން ހޯމަ ދުވަހުގެ ހެނދުނު ފެށޭނެ ކަމަށެވެ. މިއީ އެ ސަރަހައްދުގައި އުފެދިފައިވާ ނުތަނަވަސްކަމުގެ ސަބަބުން ދަތުރު ނުކުރެވި ހުއްޓިފައިވާ އުޅަނދުފަހަރަށް އެހީތެރިވުމަށް ހިންގާ އިންސާނީ އެހީތެރިކަމުގެ ހަރަކާތެއްގެ ކަމަށް ޓްރަމްޕް ބުންޏެވެ.

ރައީސް ޓްރަމްޕް އިތުރަށް ބުނީ، ކަނޑުއޮޅީގައި ތާށިވެފައިވާ އެކި ގައުމުތަކުގެ ގިނަ އުޅަނދުތަކަކުން އެހީތެރިކަމަށް އެދިފައިވާ ކަމަށެވެ. އަދި އެ އުޅަނދުތަކުގައި ކާބޯތަކެއްޗާއި ޒަރޫރީ ސާމާނު ހުސްވަމުންދާކަން ފާހަގަކޮށް، އެމެރިކާގެ ކަނޑުގެ ސިފައިންގެ ފުރިހަމަ އެހީތެރިކަމާއެކު އެ އުޅަނދުތަކާއި އޭގެ ފަޅުވެރިން ރައްކާތެރި ހިސާބުތަކަށް ގެންގޮސްދޭނެ ކަމުގެ ޔަގީންކަން ދިނެވެ.

މި އޮޕަރޭޝަންގެ ދަށުން ބޭރުކުރެވޭ އުޅަނދުތަކަށް، އެ ސަރަހައްދުގެ މަސްރަހު އަމާންވެ ދަތުރުފަތުރު ކުރުމަށް ރައްކާތެރިކަން ކަށަވަރު ނުވަނީސް އަނބުރާ އެ ސަރަހައްދަށް ވަނުމުގެ ހުއްދައެއް ނުދޭނެއެވެ.

ޓްރަމްޕް ބުނި ގޮތުގައި މިއީ އީރާނު ހިމެނޭ ގޮތަށް، މިކަމުގެ އަސަރުކޮށްފައިވާ ހުރިހާ ގައުމުތަކަކަށް އެމެރިކާއިން ދޭ ހެޔޮއެދޭ މެސެޖެކެވެ. ނަމަވެސް، މި މަސައްކަތަށް އެއްވެސް ފަރާތަކުން ހުރަސްއަޅައިފިނަމަ، އެކަމަށް ވަރުގަދަ ރައްދު ހަމަލާއެއް ދޭނެ ކަމުގެ އިންޒާރުވެސް އޭނާ ދިނެވެ.

މީގެ އިތުރުން، އީރާނާއެކު މިހާރު ކުރިއަށްދާ މަޝްވަރާތަކަކީ ވަރަށް އުންމީދީ އަދި "ޕޮޒިޓިވް" މަޝްވަރާތަކެއް ކަމަށާއި، މި ވާހަކަތަކުގެ ސަބަބުން ކުރިއަށް އޮތް ތަނުގައި ބޮޑެތި ކުރިއެރުންތަކެއް ލިބޭނެ ކަމަށް އުންމީދު ކުރާ ކަމަށްވެސް ރައީސް ޓްރަމްޕް ބުންޏެވެ.