ތިލަފުށީގައި ހުރި ވޯކްޝޮޕެއްގައި ރޯވި އަލިފާންގަނޑު އެމްއެންޑީއެފުން ކޮންޓްރޯލްކޮށްފި

ކ.ތިލަފުށީގައި ހުންނަ މެރިންޑޯ ކުންފުނީގެ ވޯކްޝޮޕެއްގައި މިއަދު ހެނދުނު ރޯވި އަލިފާންގަނޑު އެމްއެންޑީއެފުން ކޮންޓްރޯލް ކޮށްފައިވާކަމަށް ނޭޝަނަލް ޑިސާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.

އެންޑީއެމްއޭ އިން ބުނީ، މި ހާދިސާގައި ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ) ގެ އެކޮމޮޑޭޝަން ބްލޮކް އަކަށް ގެއްލުންވި ނަމަވެސް އެއްވެސް މީހަކަށް އަނިޔާއެއް ލިބުނު ކަމުގެ ރިޕޯޓް ލިބިފައިނުވާ ކަމަށެވެ.

މި ހާދިސާ ހިނގި ސައިޓްގައި ތިބި ފަރާތްތަކަށް އެހީތެރިކަން ފޯރުކޮށްދިނުމަށްޓަކައި، ދިވެހި ރެޑް ކްރެސެންޓް ގެ ޓީމްތައް ހަރަކާތްތެރިިވި ކަމަށާއި، މި މަސައްކަތުގައި އެމްޓީސީސީ ގެ އެހީތެރިކަން ލިބުނު ކަމަށް ވެސް އެންޑީއެމްއޭއިން ބުނެއެވެ.

އެމްޓީސީސީ ގެ އެހީއަށް ޝުކުރުއަދާކުރަމުން އެންޑީއެމްއޭއިން ބުނީ، އެ ކުންފުނީގެ އަލިފާޏް ނިއްވުމަށް ބޭނުންކުރާ ތަކެތިވެސް މި އަލިފާންގަނޑު ކޮންޓްރޯލް ކުރުމަށް ބޭނުން ކުރި ކަމަށެވެ.

ހަމައެއާއިއެކު، ތިލަފުށީގައި ހުރި އެޗްޑީސީގެ ތަކެތި ވެސް ބޭނުންކޮށްފައިވާ ކަމަށާއި، ވެލާނާ އިންޓަނޭޝަނަލް އެއާޕޯޓްގެ އަލިފާން ނިއްވާ ޓީމް ވެސް އެމްއެންޑީއެފް އެދިއްޖެ ހާލަތެއްގައި އެހީވުމަށް ތައްޔާރަށް އޮތްކަން އެންޑީއެމްއޭއިން ފާހަގަކުރިއެވެ.

މި ހާދިސާގައި ވޯކްޝޮޕަށް ވަރަށް ބޮޑެތި ގެއްލުންތައް ލިބިފައިވާއިރު، 'ވޮއިސް' އަށް މައުލޫމާތު ދެމުން އެތަނުގައި ހުރި މީހަކު ބުނީ، ރޯވި ވަރކްޝޮޕަކީ ލޭތްކުރުމާއި ދަނގަޑުގެ އެކި މަސައްކަތްތައް ކުރާ ތަނެއް ކަމަށެވެ. އެތަނަކީ މީހުންވެސް އުޅޭ ތަނެކެވެ.