ދިވެހިރާއްޖޭގެ ސަރަހައްދުން ބައެއް ދޫކޮށްލުމުގެ ބާރު ރައީސްއަށް ލިބިގެނެއް ނުވޭ: އަފީފު
ދިވެހިރާއްޖޭގެ ސަރަހައްދުން ބައެއް ދޫކޮށްލުމުގެ ބާރު ރައީސުލްޖުމްހޫރިއްޔާއަށް ލިބިގެންނުވާ ކަމަށާއި އެ ބާރު ލިބިގެން ވަނީ ރައްޔިތުންގެ މަޖިލީހަށް ކަމަށް ރައްޔިތުން މަޖިލީހުގެ ވިލިފުށި ދާއިރާގެ މެމްބަރު ހަސަން އަފީފު ވިދާޅުވެއްޖެއެވެ.
އަފީފު މިހެން ވިދާޅުވެފައިވަނީ މިއަަދުގެ ރައްޔިތުން މަޖިލީހުގެ ބައްދަލުވުމުގައި ދިވެހިރާއްޖޭގެ ޚާއްސަ އިޤްތިޞާދީ ސަރަހައްދުން ބައެއް ގެއްލޭގޮތަށް ސަރުކާރުން މޮރިޝަސްއާއެކު ހަދާފައިވާ "ޑީލު" ތަހުގީގުކޮށް، މޮރިޝަސްގެ ބޮޑުވަޒީރަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ފޮނުއްވި ސިޓީ ހާމަކުރުމަށް ގޮވާލާ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު ހުށައެޅުއްވި ކުއްލި މައްސަލަ އަށް ބަހުސް ކުރަމުންނެވެ.
އެގޮތުން ފޯޅަވެއްސާ އެންމެ ކައިރީގައި އޮތް ގައުމަކީ ރާއްޖެކަން ފާހަގަކޮށް ފޯޅަވައްސާއި ރާއްޖޭއައި ދޭތެރޭ އޮތް މަސް ކަނޑަކީ ވަރަށް ގިނައިން މަސް ބާނަ އަދި ވަރަށް ގިނަ މަސް އުޅޭ ތަނެއް ކަމަށް އަފީފު ވިދާޅުވިއެވެ. އަދި އެތަނަށް ފާރަލައިގެން ވަރަށް ގިނަ މަސް ގަންނަ ކުންފުނިތައް ތިބި ކަމަށް ވެސް އަފީފު ވިދާޅުވިއެވެ.
މިއާއިއެކު މޮރިޝަސް އަކީ އަބަދުވެސް އެމީހުންގެ މަސް ކަނޑުތައް ކުންފުނިތަކަށް ވިއްކާލައިގެން ފައިސާ ނަގާ ބައެއް ކަމަށާއި، މި ކުންފުނި ތަކުގެ އެހީގައި އެ ގައުމު އަބަދުވެސް މަސައްކަތް ކުރަމުން އަންނަނީ މި މަސް ކަނޑު އެމީހުންގެ ސަރަހައްދުގެ ގޮތުގައި ހެދުމަށް ކަމަށް އަފީފު ވިދާޅުވިއެވެ.
އެގޮތުން ފޯޅަވަހީގައި އެމެރިކާގެ މިލިޓަރީ ބޭސްއެއް ގާއިމު ކުރުމުގެ ގޮތުން އެތާ އުޅުނު މީހުން އިނގެރޭސިންގެ އިސްތިއުމާރީ ބާރު ގެ ފަރާތުން މޮރިޝަސް އަށް ގެންދިޔަ ނަމަވެސް އެއީ މޮރިޝަސް މީހުންނެއް ނޫން ކަމަށް އަފީފު ވިދާޅުވިއެވެ.
"އެހެންވީމަ މޮރިޝަސް އަކަށް ނެތް ފޯޅަވައްސަށް ދައުވާ ކުރުމުގެ ސިޔާދަތެއް ދައުވާ ކުރުމުގެ ހައްގެއް ވަކި އަޅުގަނޑުމެންނަށް ނެތް ހައްގެއް." އަފީފު ވިދާޅުވިއެވެ.
އެހެންވީމާ އުފެދިގެން އުޅޭ މައްސަލައަކީ ދިވެހިރާއްޖެއަށް ލިބެންއޮތް ހައްގެއް ރައްޔިތުން މަޖްލީހުގެ އެއްވެސް ބަހެއް ނެތި ގާނޫނު އަސާސީގައި ބުނާގޮތާއި ހިލާފަށް ރާއްޖޭގެ ސިޔާސަދު މޮރިޝަސް އަށް ދޫކޮށްލި ދޫކޮށްލުން ކަމަށް އަފީފު ވިދާޅުވިއެވެ.
ކީއްވެގެންތޯ އަޅުގަނޑުމެން މިކަންތައް ދޫކޮށްލީ. އެއީ އެއްވެސް ގޮތަކަށް ރައީސުލްޖުމްހޫރިއްޔާއަށް އެއްވެސް ލިބިގެންވާ ބާރެއް ނޫން. އެއީ އެއްވެސް ގޮތަކަށް ހާރިޖީ ސިޔާސަތު ކަނަޑައެޅުމުގެ ތެރޭގައި އަންނަ ކަމެއް ނޫން. ދިވެހިރާއްޖެ ސަރަހައްދު ކަނަޑައެޅުމަކީ އަދި ސަރަހައދުން ބައެއް ދޫކޮށްލުމަކީ މި އިއްޒަތްތެރި މަޖްލީހުން ކުރަންޖެހޭ ކަމެއް."
އަފީފު ވިދާޅުވިއެވެ.
މީގެ އިތުރުން ގާނޫނު އަސާސީގައި ދިވެހިރާއްޖޭގެ ސަރަހައްދު ކަނޑައަޅާފައިވާ ކަމަށާއި އެސަރަހައްދުން ބައެއް ދޫކޮށްލަން ވެއްޖެއްޔާ ކަން ކުރާނެ ގޮތް ވެސް ބަޔާންކޮށްފައިވާ ކަމަށް އަފީފު ފާހަގަކުރެއްވިއެވެ.
"މިހެން އޮއްވާ ކީއްވެގެންތޯ ރައީސުލްޖުމްހޫރިއްޔާ އަޅުގަނޑުމެންގެ ސިޔާދަތީ ބާރެއްގެ ދައުވާ ކުރުމުގެ ހައްގު އޮތް ކަމެއް ކީއްވެތޯ މޮރިޝަސް އަށް ދޫކޮށްލީ މިއީ އުފެދޭ ސުވާލަކީ. ކީއްވެތޯ ގާނޫނު އަސާސީއާއި ހިލާފަށް މިކަންތައް މި ކުރެއްވީ."
އަފީފު ވިދާޅުވިއެވެ.
ނިންމާލަމުން އަފީފުވަނީ މީގެ ކުރިންވެސް ރައީސް ގާނޫނާ ހިލާފު ކަންތައްތަކެއް ކުރައްވާފައިވާ ކަމަށް ފާހަގަކޮށް އޭގެ މިސާލެއްގެ ގޮތުގައި ކޮވިޑްގެ ދުވަސް ވަރު ކުއްލި ނުރައްކަލުގެ ހާލަތު އިއުލާން ކުރާ ހާލަތްތައް ގާނޫނު އަސާސީގައި ކަނޑައެޅިފައިވާ ގޮތާއި ޚިލާފަށް މިކަން ރައީސް ހެލްތް މިނިސްޓަރަށް ދޫކޮށްލެއްވި ކަން ނަންގަވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
