ރައީސް ޞާލިހުވަނީ ގައުމަށް ގައްދާރުވެ ދިވެހި މަސްކަނޑު ވިއްކާލާފަ: ތާރިގު

ރައީސުލްޖުމްހޫރިއްޔާ އިބްރާހިމް މުޙައްމަދު ވަނީ ޤައުމަށް ޤައްދާރުވެ ދިވެހިންގެ މަސްކަނޑު ވިއްކާލާފައިކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވިދާޅުވެއްޖެ އެވެ.

ތާރިގު މިފަދައިން ވިދާޅުވެފައިވަނީ ރާއްޖޭގެ ޚާއްސަ އިޤްތިޞާދީ ސަހަރައްދުން ބައެއް ގެއްލޭގޮތަށް ފޯޅަވަހި މައްސަލައިގައި ސަރުކާރުގެ ސްޓޭންޑް ބަދަލުކުރި ސަބަބު ހާމަކުރުމަށް ގޮވާލާ މަޖިލީހަށް ހުށައެޅި ކުއްލި މައްސަލައިގައި ބަހުސްކުރައްވަމުން ނެވެ.

ތާރިގު ވިދާޅުވީ ރައީސް ޞާލިހު މޮރިޝަސްގެ ބޮޑު ވަޒީރަށް ފޮނުއްވި ސިޓީގެ ސީދާ އިބާރާތް ނޭނގުނުކަމުގައި ވީ ނަމަވެސް އެ ސިޓީގައި ދިވެހިރާއްޖެއަށް ނުރައްކާ ކުރާނެ ވާހަކަތަކެއް ހުރިކަން އެޓްލަސްގައި އޮތް މައްސަލައަށް ވަކާލާތުކުރަމުން މޮރިޝަސްގެ ވަކީލުން ހާމަކުރި މައުލޫމާތުން ސާފުވާ ކަމަށެވެ.

އެކަންކަން ފާހަގަކުރައްވާ ތާރިގު ވިދާޅުވީ ޑީލު އޮތީ ހަދާފައި ކަމަށެވެ. އަދި އެކަމުގައި ރައީސް ޞާލިހުގެ އިތުރުން އޭޖީ ރިއްފަތާއި ފޮރިން މިނިސްޓަރު ޝާހިދު ބައިވެރިވެވަޑައިގެންފައިވާކަން އެނގިލައްވާކަމަށެވެ.

އެހެންކަމުން އެމީހުންނަކީ ޤައުމަށް ޤައްދާނު ނުވާ ބައެއްކަމަށް ކަނޑައެޅޭގެ އެއްވެސް ހަމައެއް ނޯންނާނެކަމަށް ތާރިގު ވިދާޅުވި އެވެ.

"ފްރާންސާއި އިނގިރޭސިވިލާތާ ކުރި ހަނގުރާމައިގެ ފަހުން 1815 ވަނަ އަހަރު އިނގިރޭސިވިލާތަށް ފޯޅަވަހީގެ ބެލެނިވެރިކަން ގޮއްސަ އޮތީ. މިތާކު މޮރިޝަސްއެއް އަދި އެއްވެސް ހިސާބަކު ނާދޭ. މީގެކުރިންވެސް މޮރިޝަސްއަށް ސިޔާދަތީ ބާރު ލިބިގެން ނުވާކަމަށް އިނގިރޭސިން މި ނިންމި ކޮންމެ ނިންމުމަކާއެކު އެމީހުންގެ ޑިޕްލޮމެޓިކް ޗެނަލްތަކުން އިއުލާނުކޮށްފައި އެބޮތް. އެހެންކަމުން އެ ސްޓޭންޑް ދިވެހި ދައުލަތުގެ އެންމެ މަތީ މަސްލަހަތު ހިމާޔަތްކުރުމަށްޓަކައި މިހާތަނަށް ނަގަމުން އައި ރައީސް އިބްރާހިމް މުޙައްމަދު ޞާލިހު ދޫކޮށްލުމަކީ މި ގައުމަށް ގައްދާރުވުން. ދިވެހިންގެ މަސްކަނޑުތައް ވިއްކާލުން"

މަހިބަދޫ ދާއިރާގެ މެމްބަރު އަހުމަދު ތާރިގު

ތާރިގު އިތުރަށް ވިދާޅުވީ ފޯޅަވަހި މައްސަލައިގައި ސަރުކާރުގެ ސްޓޭންޑް ބަދަލުކުރުމުގެ ސަބަބުން އިޓްލޮސްގައި އޮތް މައްސަލައިގައި ދިވެހި ދައުލަތުން ނަގަމުން އައި ދިފާއު އަނެއް ފުށަށް ބަދަލުވެފައިވާ ކަމަށެވެ. އެއީ ދިވެހި ދައުލަތުގެ ދިފާއު ބިނާކޮށްފައިވަނީ ފޯޅަވަހީގެ ސިޔާދަތީ ބާރު ދުވަހަކުވެސް މޮރިޝަސްއަށް ލިބިފައި ނުވާކަމަށް ބަޔާންކޮށްކަން އޭނާ ފާހަގަކުރެއްވި އެވެ.

އެހެންކަމުން ސަރުކާރުން ސްޓޭންޑް ބަދަލުކުރުމާއި ގުޅިގެން އެ މައްސަލަ ދިވެހިރާއްޖެއާއި ދެކޮޅަށް ނިމުމުގެ ފުރުސަތު ބޮޑު ކަމަށާއި، އެކަމުގެ ސަބަބުން ދިވެހިންނަށް ބޮޑެތި ގެއްލުންތަކެއް ލިބި ރާއްޖޭގެ ސަރަހައްދުން ބައެއްވެސް ދޫވެގެންދާނެކަމަށް އޭނާ ވިދާޅުވި އެވެ.