ޝަރީއަތުގެ މަޖްލީހުގައި، ރާއްޖެއިން ފޮނުވި ސިޓީގައިވާ ކަންކަން މޮރިޝަސްއިން ވަނީ ހާމަކޮށްދީފައި: ޠާރިގު

އެޓްލަސްގައި ބޭއްވުނު ޝަރީއަތުގެ މަޖްލީހުުގައި މޮރިޝަސްގެ ފަރާތުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ފޮނުއްވާފައިވާ ސިޓީގެ ވާހަކަ ދައްކާފައިވާ ކަމަށް ރައްޔިތުން މަޖްލީހުގެ މަހިބަދޫ ދާއިރާގެ މެމްބަރު އަހްމަދު ޠާރިގު (ޓޮމް) ވިދާޅުވެއްޖެއެވެ.

ޠާރިގު މިހެން ވިދާޅުވެފައިވަނީ މިއަަދުގެ ރައްޔިތުން މަޖިލީހުގެ ބައްދަލުވުމުގައި ދިވެހިރާއްޖޭގެ ޚާއްސަ އިޤްތިޞާދީ ސަރަހައްދުން ބައެއް ގެއްލޭގޮތަށް ސަރުކާރުން މޮރިޝަސްއާއެކު ހަދާފައިވާ "ޑީލު" ތަހުގީގުކޮށް، މޮރިޝަސްގެ ބޮޑުވަޒީރަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ފޮނުއްވި ސިޓީ ހާމަކުރުމަށް ގޮވާލާ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު ހުށައެޅުއްވި ކުއްލި މައްސަލަ އަށް ބަހުސް ކުރަމުންނެވެ.

އެގޮތުން ޠާރިގު ފުރަތަމަ ކަމަކަށް ފާހަގަކުރެއްވީ މިހާރު އޮތް ސަރުކާރު އައި ފަހުން، 2019 ވަނަ އަހަރުގެ ތެރޭގައި މޮރިޝަސްގެ ފަރާތުން އިންޓަރނޭޝަނަލް ކޯޓަށް ހުށަހެޅި މައްސަލާގައި އެތަނުން ނެރުނު ކޮންމެހެން އަމްލުކުރުން ލާޒިމް ނޫން ގާނޫނީ ލަފާއެވެ.

އެގޮތުން މި ލަފާއަށް އަމަލުކުރުމަށް ޖެނެރަލް އެސެމްބްލީ އަށް ފޮނުވާ އޭތި ފާސްކުރިއިރު ދިވެހިރާއްޖޭގެ ސަރުކާރުން ވޯޓު ދީފައި ވަނީ ނުވަތަ ރާއްޖޭގެ ސިޔާދަތީ ބާރު ހިފެހެއްޓުމަށްޓަކައި ރާއްޖޭގެ ސްޓޭންޑަކަށް ވެފައި އޮތީ މޮރިޝަސް އާ ދެކޮޅަށް، އިނގެރޭސި ވިލާތާއި އެއްކޮޅަށް ކަމަށް ޠާރިގް ވިދާޅުވިއެވެ.

މިއާއިއެކު ރައީސް އިބްރާހިމް މުހައްމަދު ޞާލިހު މިދިޔަ އަހަރު ތެރޭގައި މޮރިޝަސްގެ ބޮޑު ވަޒީރަށް ފޮނުއްވި ސިޓީގައި އޮތް އިބާރާތް ސާފުކޮށް ނޭނގުނު ނަމަވެސް އެންމެ ފަހުން އެޓްލަސްގައި ބޭއްވި ޝަރީއަތުގެ މަޖްލީހުގައ މޮރިޝަސް ގެ ފަރާތުން އެސިޓީއާއި ބެހޭގޮތުން ވާހަކަ ދައްކާފައިވާ ކަމަށް ޠާރިގު ވިދާޅުވިއެވެ.

"އެ ސިޓީގައި އޮތް އިބާރަތް ކަމަށް މޮރިޝަސްގެ ފަރާތުން ވަކާލާތު ކުރަމުން މިބުނަނީ ދިވެހި ރާއްޖޭގެ ރައީސުލްޖުމްހޫރިއްޔާ މޮރިޝަސްގެ ބޮޑު ވަޒީރަށް ފޮނުއްވި ސިޓީގައި އެމެރިކާގެ މިލިޓަރީ ބޭސްއެއް އޮތް ޑީއޭގޯ ގާސިއާ ހިމެނޭ ސަރަހައްދަށް ރާއްޖެ މެދުވެރިކޮށް ދިޔުމުގެ ފުރުސަތު ހޯދައި ދޭނެ ކަމަށް. ވަރަށް ނުރައްކާތެރި ވާހަކަ އެއްގެ ވާހަކަ އެއް ސިޓީގަ އޮތް ކަމަށް އެޓްލަސްގައި މޮރިޝަސްގެ ފަރާތުން ވާހަކަ ދައްކަވާފަ އެބައޮތް." ޠާރިގު ވިދާޅުވިއެވެ.

މި ސިޓީގައި އެމެރިކާގެ މިލިޓަރީ ބޭސް އޮތް ތަނަކަށް ސާވޭ ކުރުމަށް މޮރިޝަސްގެ ބޮޑު ވަޒީރު އެގައުމުގެ ފަރާތުން ފޮނުވާ ސާވޭ ޓީމް ދިވެހިރާއްޖެ މެދުވެރިކޮށް ކޮށް އައްޑޫ ކޮޅުން ފޮނުވައިދޭނެކަމަށްވާ ކަމަށް ބުނެފައިވާ ކަމަށް ވެސް ޠާރިގު ވިދާޅުވިއެވެ.

"މިލިޓަރީ ބޭސްއަކާއި ދޭތެރޭ ދިވެހިރާއްޖެ ހަނގުރާމަ އުފެދިދާނެ ހާލަަތެއް ހިނގައިދާނެ ކަމަށް އެސިޓީގައި އޮތް ކަމަށް އެޓްލޮސްގަ މޮރިޝަސްގެ ފަރާތުން އެބޮތް ވަކާލާތު ކޮށްފަ. މި ހުންނަނީ ވަރަށް ނުރައްކާތެރި ކަންތައްތައް." ޠާރިގު ވިދާޅުވިއެވެ.

އެޓްލަސްގައި ބޭއްވުނު ޝަރީއަތުގެ މަޖްލީހުގައި ދެކެވުނު ވާހަކަތަކުގެ ތެރޭގައި ރައީސް ޞާލިހް މޮރިޝަސްގެ ބޮޑު ވަޒީރަށް ފޮނުއްވި ސިޓީގެ ވާހަކަ ދައްކާފައިވެއެވެ. އެގޮތުން މި ސިޓީގައި ރައީސް ޞާލިހް ވަނީ މޮރިޝަސްގެ ބޮޑު ވަޒީރު ފޯޅަވައްސަށް ކުރިމަގުގައި ކުރާ ދަތުރުތައް ފަސޭލަކޮށްދިނުމަށް ދިވެހިރާއްޖެއިން އެހީތެރިވެދޭނެ ކަމުގެ އެއްބާރުލުމާއި ޔަގީންކަން ދީފައި ކަމަށް މޮރިޝަސްގެ ފަރާތުން ވަނީ ބުނެފައެވެ.