ލީގުގައި ޖެހިޖެހިގެން ދެވަނަ މެޗުން ބާސެލޯނާ ބަލިވެއްޖެ!

ސްޕެނިޝް ލަލީގާގައި މިރޭ ރަށުން ބޭރުގައި ރެލިގޭޝަނުން ސަލާމަތްވުމަށް މަސައްކަތް ކުރަމުން އަންނަ ވަޔަޑޮލީޑް އަތުން ޗެންޕިއަން ބާސެލޯނާ ބަލިވެއްޖެ އެވެ.

ވަޔަޑޮލީޑްގެ ދަނޑުގައި ކުޅުނު މެޗު އެޓީމުން ކާމިޔާބުކުރީ 3-1 ގެ ނަތީޖާއަކުންނެވެ. އަދި މިއީ ލީގު ޗެމްޕިއަންކަން ކަށަވަރުކުރި ފަހުން ލީގުގައި ބާސެލޯނާ ޖެހިޖެހިގެން ބަލިވި ދެވަަނަ މެޗެވެ. ލީގުގައި އެންމެ ފަހުން ކުޅުނު މެޗުގައި މިހަފްތާގެ އާދީއްތަ ދުވަހުގެ ރޭ އަމިއްލަ ދަނޑުގައި ބާސެލޯނާ ވަނީ ރެއާލް ސޮސިއެޑާޑް އަތުން ވެސް 2-1 ގެ ނަތީޖާއަކުން ބަލިވެފައެވެ.

މިރޭގެ މެޗު ފަށައިގެން ދެވަަނަ މިނެޓުގައި ވަޔަޑޮލީޑް އިން ލީޑު ނެގިއިރު، މި ލަނޑަކީ ބާސެލޯނާގެ ޑެންމާކް ޑިފެންޑަރު ކްރިސްޓިއަންސަން އަތުން ބައިކޮޅަށް ވަން ލަނޑެކެވެ. އަދި ފުރަތަަމަ ހާފުގެ 13 ވަނަ މިނެޓުގައި އެޓީމުގެ ލީޑު ފުޅާކުރުމަށް ލިބުނު ހުސް ފުރުސަތުގައި އެޓީމުގެ ވެނެޒުއޭލާ ފޯވާޑް ޑާވިން މަކީސް ފޮނުވާލި ހަމަލާ ބާސެލޯނާގެ ޑިފެންޑަރަކު ވަނީ ބްލޮކް ކޮށްފައެވެ.

މި މެޗުގައި ވަޔަޑޮލީޑް އިން ކާމިޔާބުކުރި ދެވަނަ ލަނޑަކީ ފުރަތަމަ ހާފުގެ 22 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކުރި ލަނޑެކެވެ. މިއީ ބާސެލޯނާގެ ޑިފެންޑަރު އެރިކް ގާސިއާ އެޓީމުގެ ޕެނަލްޓީ އޭރިއާ ތެެރެއިން ވަޔަޑޮލީޑްގެ ކުޅުންތެރިޔަކަށް ކުރި ނުރައްކާތެރި ފައުލަކާ ގުޅިގެން ރެފްރީ އެޓީމަށް ދިން ޕެނަލްޓީއެކެވެ. މި ޕެނަލްޓީ އެޓީމަށް ކާމިޔާބުކޮށްދިނީ އެޓީމުގެ ކެނެޑާ ފޯވާޑް ސިލީ ލެރިން އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ވަޔަޑޮލީޑް ކުރީގައި އޮވެގެންނެވެ.

ދެވަނަ ހާފުގައި ވެސް ވަޔަޑޮލީޑްގެ ފަރާތުން ބާސެލޯނާގެ ގޯލަށް ފަސް ހަމަލާއެއް ފޮނުވާލިއިރު، މި މެޗުގައި އެޓީމުން ކާމިޔާބުކުރި ތިންވަނަ ލަނޑު ދެވަނަ ހާފުގެ 73 ވަނަ މިނެޓުގައި ކާމިޔާބުކޮށްދިނީ އެޓީމުގެ އިކުއެޑޯގެ ފޯވާޑް ގޮންޒާލޯ ޕްލާޓާ އެވެ. މިއީ އެޓީމުގެ ކެނެޑާ ފޯވާޑް ސިލީ ލެރިން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ބާސެލޯނާ އިން މި މެޗުގައި ކާމިޔާބުކުރި ހަމައެކަނި ލަނޑު ދެވަނަ ހާފުގެ 84 ވަނަ މިނެޓުގައި ކާމިޔާބުކޮށްދިނީ އެޓީމުގެ ޕޮލެންޑު ފޯވާޑް ރޮބަޓް ލެވަންޑޮވްސްކީ އެވެ. މިއީ މިސީޒަނުގައި ލީގުގައި ކުޅުނު 32 މެޗުގައި އޭނާ ކާމިޔާބުކުރި 23 ވަނަ ލަނޑެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު ވަޔަޑޮލީޑް ވަނީ 36 މެޗުން 38 ޕޮއިންޓް ހަމަކޮށް ލީގު ތާވަލުގެ 27 ވަނައަށް ކުރިއަށް ޖެހިލާފައެވެ. އަދި މި މެޗުން ބަލިވި ބާސެލޯނާ ލީގުގައި ކުޅުނު 36 މެޗުން އެޓީމަށް ވަނީ  85 ޕޮއިންޓް ލިބިފައެވެ. މިހާރު ވެސް އެޓީމު ލީގު ޗެމްޕިއަންކަން ކަށަވަރުކޮށްފައިވާ އިރު ދެވަނައިގައި އޮތް އެތުލެޓިކޯ މެޑްރިޑަށް 35 މެޗުން 72 ޕޮއިންޓް ލިބިފައިވާއިރު ތިންވަނައިގައި އޮތް ރެއާލް މެޑްރިޑަށް 35 މެޗު ކުޅެގެން ލިބިފައިވަނީ 71 ޕޮއިންޓެވެ.