ޑިމޮކްރަސީގެ ބަފަޔަށް ހެދުނު މީހާ ނުލަފާ ދޮންބަފަޔަކަށް ވެއްޖެ: ރާޝިދު

ޑިމޮކްރަސީގެ ހެޔޮލަފާ ބަފައެއްކަމަށް ހެދިގެން އުޅުނު ބޭފުޅަކު ވަރުގަދަ ނުލަފާ ދޮންބަފަޔަކަށް ވެގެން މުޅި ގައުމު ހަރާބު ކުރަމުންދާ މަންޒަރު ފެންނަން ފަށައިފި ކަމަށް ރައްޔިތުންގެ މަޖިލީހުގެ ކޮމަންޑޫ ދާއިރާގެ މެންބަރު މުހައްމަދު ރާޝިދު ވިދާޅުވެއްޖެއެވެ.

ރާޝިދު މިހެން ވިދާޅުވީ މިއަދު މަޖިލީހުގެ ތަޅުމުގައި ވާހަކަ ދައްކަވަމުންނެވެ.

ދަނޑުވެރިކަމުގެ ބިލަށް ވާހަކަ ދައްކަވަމުން މެމްބަރު ރާޝިދު ވިދާޅުވީ ފަސް އަހަރުގެ ވެރިކަމެއް ނިމިގެން ދާއިރު މުޅި ރާއްޖޭގައި އެކި ދާއިރާތަކުން ތަރައްގީގެ މަޝްރޫއުތައް ހިންގަމުންދާ ކަމަށާއި، ކަމެއް ނުކޮށްދޭ ކަމަށް ބުނަމުން ދަނީ ހަޖަމް ނުވާ، ވެރިކަމަށް ފެންބޮވައިގަނެފައިވާ މީހުން ކަމަށެވެ.

"މިއަދު އަޅުގަނޑުމެންނަށް ފެނިގެން މިދަނީ ޑިމޮކްރަސީގެ ހެޔޮލަފާ ބަފައެއް ކަމަށް ހެދިގެން އުޅުނު ބޭފުޅަކު، މިއަދު ވަރުގަދަ ނުލަފާ ދޮންބަފަޔަަކަށް ވެގެން މުޅީ ގައުމު ހަރާބު ކުރަމުން ދާ މަންޒަރު" ރާޝިދު ވިދާޅުވިއެވެ.

ނަމަވެސް އެ ފުރުސަތު ނުދެއްވާނެ ކަމަށާއި ރައީސް ޞާލިހަށް ދެވަނަ ދައުރެއް ރައްޔިތުން ދެއްވާތަން މި އަހަރުގެ ސެޕްޓެމްބަރު މަހުގައި ފެނިގެން ދާނެ ކަމަށް ރާޝިދު ވިދާޅުވިއެވެ.

މީގެ އިތުރުން ރާޝިދު ވިދާޅުވީ، ރައްޔިތުންނަށް އޮޅުވާލުމަށް ތަފާތު ވާހަކަ ދައްކަމުން ވަނީ ވެރިކަމުގެ ދަހިވެތިކަމުގައި ކަމަށެވެ.

ދަނޑުވެރިކަމުގައި އެގްރޯނެޓްއިން މަސައްކަތްތައް ނުކުރާ ކަމަށް ބައެއް މެމްބަރުން ދެއްކެވި ވާހަކަތަކަށް ރައްދު ދެއްވަމުން ރާޝިދު ވިދާޅުވީ އެގްރޯނެޓްގެ ފަރާތުން، ދަނޑުވެރިންނަށް ގެންނަ ގިނަ މުދަލުގެ ޑިއުޓީ ކަނޑާލާފައިވާ ކަމަށާއި އަދި ދަނޑުވެރިކަމަށް ބޭނުންވާ ލޯނާއި ވަސީލަތްތައް ދެމުންދާ ކަމަށެވެ.