ދަނޑުވެރިންނަށް ވީ ވައުދުގެ 70% ސަރުކާރުން ފުއްދައިފި: އަލީ ނިޔާޒު

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ސަރުކާރުން ދަނޑުވެރިންނަށް ވީ ވައުދުގެ 70% ފުއްދާދެއްވާފައިވާ ކަމަށް ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒު ވިދާޅުވެއްޖެ އެވެ.

ނިޔާޒު މިފަދައިން ވިދާޅުވެފައިވަނީ އެމްޑީޕީގެ ފުރަތަމަ ވެރިކަމުގައި ރާއްޖޭގެ ދަނޑުވެރިންނަށް ދޫކުރި ދަނޑުވެރިންގެ ސަބްސިޑީ އަލުން އަނބުރާ އިޔާދަކޮށް ދަނޑުވެރި މީހާއަށް ދިނުމަށް ގޮވާލާފައިވާ ޤަރާރަށް މަޖިލީހުގައި ބަހުސްކުރައްވަމުން ނެވެ.

ނިޔާޒުގެ ވާހަކައިގައި ވަނީ ދަނޑުވެރިކަމުގެ ސިނާއަތު ކުރިއެރުވުމަށް މި ސަރުކާރުން ފުއްދާފައިވާ ވައުދުތަކުގެ ދިގު ލިސްޓެއް މަޖިލީހުގައި އިއްވަވާފަ އެވެ. އޭގެ ތެރޭގައި ހިމެނެނީ:

1. މޯލްޑިވްސް އެގްޒަބިޝަން ޕްރިގްރާމު ހއ، ހދ އަދި ށ އަތޮޅުގައި ފެށުން.

2. ދަނޑުވެރިން ތަމްރީނުކުރުމާއި އައިލެންޑު ފޯރަމް ތައްޔާރުކުރުމާއި، ދަނޑުވެރިންނަށް އެހެން ވިޔަފާރިވެރިންނާއި ދިމާވުމުގެ ފުރުސަތު ފޯރަމްތަކުން ހުޅުވާލަދިނުން

3. ފަނޑުވެރިކަން ކުރާއިރު އިރުގެ ހަކަތަ ބޭނުންކޮށް ފެން ދޭ ނިޒާމު ރ ފައިނުގައި ގާއިމްކުރުން

4. ދަނޑުވެރިންނަށް ނަފާ ލޯނު ޕްރޮގްރާމެއް ފެށިގެން ކުރައަށް ގެންދިއުން

5. ދަނޑުވެރިކަމަށް އިމްޕޯޓުކުރަމުން އައި ތަކެތިން ނަގަމުން އައި ޑިއުޓީ ކަނޑާލުން

6. ހައިޑްރޯފިނިކްސް ސިސްޓަމް ގާއިމްކުރުން

7. ގަސް އިންދާ ނިޒާމުތައް 4 ރަށެއްގައި ގާއިމްކުރެވި ކަމާގުޅޭ ތަމްރީނު ފޯރުކޮށްދިނުން

8. އެގްރިކަލްޝާ އޮންލައިން ސިސްޓަމް ތައާރަފްކުރުން

އެކަންތައްތަކުގެ އިތުރުންވެސް ދަނޑުވެރިން ތަމްރީނު ކުރުމަށްވެސް ތަފާތު ޕްރޮގްރާމުތައް ސަރުކާރުން ހިންގަމުންދާކަން މެމްބަރު ނިޔާޒު ފާހަގަކުރެއްވި އެވެ.

މަޖިލީހުގައި މެމްބަރުު ވާހަކަދައްކަން ލިބުނު ވަގުތު ހަމަވިއިރުވެސް ސަރުކާރުން ކޮށްދިން ކަންކަމުގެ ދިގު ލިސްޓުގައި އަދިވެސް ފާހަގަކުރަން ޖެހޭ ކަންކަން ހުރިކަމަށް މެމްބަރު ވަނީ ވިދާޅުވެފަ އެވެ.

ނިޔާޒު ވިދާޅުވީ ދަނޑުވެރިކަން ކުރިއަރުވަން މި ސަރުކާރުންކޮށްފައިވަނީ ވަރަށް ފުރިހަމަ މަސައްކަތްތަކެއް ކަމަށާއި، ދަނޑުވެރިކަމަށް ވީ ވައުދުގެ ބޮޑު އިންސައްތައެއް ވެސް މިހާރު ސަރުކާރުން ފުއްދާ ނިންމާފައިވާކަމަށެވެ.

"އަޅުގަނޑުމެން ޓެސްޓަކަށް ދާއިރުގައި 50% އަށް ވުރެ މަތިވީމަ ފާސްވޭ. 70% އަށް ވުރެ މަތިވީމާ އެއީ ރަނގަޅު ފާހެއް. އަޅުގަނޑު ދެކޭގޮތުގައި އަޅުގަނޑަށް ފެންނާންހުރި ނަތީޖާއަށް ބަލާއިރުގައި ދަނޑުވެރިކަމުގެ މެނިފެސްޓޯގައި ހުރި 70% ކަންތައްތައް މިވަނީ މި ސަރުކާރުން ހާސިލްކޮށްދީފަ"

މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒު