އީސީގެ ނިންމުމަކީ ކޮރަޕްޝަން އެކުލެވޭ ޒިންމާދާރުކަން ކުޑަ ނިންމުމެއް: ފާރިޝް

މޯލްޑިވްސް ރިފޯމް މޫވްމަންޓް (އެމްއާރްއެމް)ގައި ޤާނޫނުގައި ބުނާ އަދަދަށް މެންބަރުން ހަމަނުވާތީ އެ ޕާޓީ އުވާލެއްވުމަށް އިލެކްޝަން ކޮމިޝަނުން ނިންމުމާ ގުޅިގެން، އެ ނިންމުމަކީ ކޮރަޕްޝަން އެކުލެވޭ ޒިންމާދާރުކަން ކުޑަ ނިންމުމެއް ކަމަށް އެ ޕާޓީގެ ރައީސް ފާރިސް މައުމޫން ވިދާޅުވެއްޖެއެވެ.

މިކަމާ ގުޅިގެން ފާރިސް ވިދާޅުވީ އެ ނިންމުމަކީ ގާނޫނީ އިމުގެ ބޭރުން ނިންމާފައިވާ ނިންމުމެއް ކަމަށާއި އޭގެ މައްޗަށް އެ ޕާޓީން ކުރި ހޯދާނެ ކަމަށެވެ.

"އިލެކްޝަންސް ކޮމިޝަނުން ނިންމަވާފައިވާ މި ނިންމެވުމަކީ، ކޮރަޕްޝަންގެ ނާޖާއިޒު ނުފޫޒު އެކުލެވިގެން، ޤާނޫނީ ތަރަހައިން ބޭރުން ނިންމަވާފައިވާ، ޒިންމާދުރުކަން ކުޑަ ނިންމުމެއް ކަމުގައި ދެކެން. މިކަމުން އަންގައިދެނީ، ޤައުމުގައި ފަސާދައާއި ކޮރަޕްޝަންގެ ވަކި ހިތްޕާލާފައިވާ މިންވަރު. ހަމައެހެންމެ، ޤައުމުގައި ޤާނޫނު ހިންގުމަށް ނުކުޅެދިފައިވާ މިންވަރު" ފާރިސް ވިދާޅުވިއެވެ.

މީގެ އިތުރުން ފާރިސް ވިދާޅުވީ ފަސާދައާއި، ނާޖާއިޒު މަންފާ ހޯދުމަށް ހިންގޭ ސިޔާސީ މިފަދަ ހުތުރު ޢަމަލުތަކުން ސަލާމަތްކުރުމަށް،  ޕާޓީގެ މެންބަރުންނާއި، އަދި ޕާޓީއަށް ހެޔޮ އެދޭ އެންމެހާ ފަރާތްތަކުން، ސާބިތުކަމާއެކު ދެމި ތިބެ، މި މަސައްކަތުގައި ބައިވެރިވުމަށ ދަޢުވަތު އަރުވާ ކަމަށެވެ.

އެމްއާރްއެމް އުވާލަން އީސީން ނިންމުމާ ގުޅިގެން އެ ޕާޓީގެ ޒަޢީމް މައުމޫން އަބްދުލްޤައްޔޫމް ވިދާޅުވެފައި ވަނީ އެއީ ވަރަށް ކޮރަޕްޓް ނިންމުމެއް ކަމަށާއި އަދި އެ ނިންމުމާއި ދެކޮޅަށް ވަކާލާތު ކުރައްވާނެ ކަމަށެވެ.

އެ ޕާޓީގައި 3000 މެންބަރުން ހަމަނުވެގެން ދެފަހަރެއްގެ މަތިން ނޯޓިން ދީފައިވެއެވެ. އެގޮތުން 2022 ވަނަ އަހަރުވެސް މެންބަރުން ހަމަ ކުރަން ނޯޓިސް ދިނުމުން، މުއްދަތު ތެރޭގައި ޕާޓީން ވަނީ މެންބަރުން ހަމަ ކޮށްފައެވެ. އެއަށްފަހު، އަނެއްކާވެސް އެ ޕާޓީގެ މެންބަރުންގެ އަދަދު 3000 އަށްވުރެ ދަށްވެފައި ވަނިކޮށް، ސަރުކާރުގެ ވުޒާރާތަކުގައި ތިބި އެ ޕާޓީއަށް ނިސްބަތްވާ ގިނަ މެންބަރުންވެސް ވަނީ ޕާޓީން ވަކިވެފައެވެ.

އެ މެންބަރުން ޕާޓީން ވަކިވެފައި ވަނީ މިދިޔަ ފެބުރުއަރީ މަހުގެ ތެރޭގައި އެ ޕާޓީއަށް މެންބަރުން ހަމަކުރުމަށް ނޯޓިސްވެސް ދީފައިވަނިކޮށެވެ. އެގޮތުން ޕާޓީއަށް ދިން ދެވަނަ ނޯޓިސްގެ މުއްދަތު ހަމަވީ މިދިޔަ ބުދަ ދުވަހަށެވެ.

އިލެކްޝަންސް ކޮމިޝަނުގެ ވެބްސައިޓުގައިވާ މައުލޫމާތަށް ބަލާއިރު ފެބުރުއަރީއާ ހަމައަށް މެމްބަރުންގެ އަދަދަކީ 2،981 އެވެ.