ހަރުދަނާ އަސާސެއް ނެތި އީވާ މަގާމުން ވަކިކުރުން ނިންމުން ކުށްވެރިކުރަން: ދަ ޑިމޮކްރެޓްސް

ހަރުދަނާ އަސާސެއް ނެތި ރައްޔިތުންގެ މަޖިލީހުގެ ނައިބުރައީސްގެ މަގާމުން އީވާ އަބްދުﷲ ވަކިކުރުން ނިންމުން، "ދަ ޑިމޮކްރެޓްސް" އިން ކުށްވެރި ކޮށްފިއެވެ.

މަޖިލީހުގެ ނައިބުރައީސްކަމުން އީވާ ވަކިކުރުމުގެ މަސައްކަތް ފަށާފައިވަނީ އޭނާ އެމްޑީޕީން ވަކިވެވަޑައިގަތުމާއި ގުޅިގެންނެވެ.

އެކަމާ ގުޅިގެން ދަ ޑިމޮކްރަޓްސްއިން ނެރުނު ބަޔާނެއްގައި ބުނީ މިއީ ދިވެހިރާއްޖޭގެ ސިޔާސީ މަސްރަހުގައި ހިތްވަރާއެކު މަސައްކަތްކުރަމުން އަންނަ އަންހެނުންނަށް ހުރި ގޮންޖެހުންތަކަށް ތަސައްރަފުކުރާ އަލިގަދަ ދަލީލެއް ކަމަށެވެ.

"އީވާ ޢަބްދުﷲ އަކީ ގިނަ ސިޔާސީ ޕާޓީ ވާދަކުރާ އިންތިޚާބުތައް އައު ޤާނޫނު އަސާސީގެ ދަށުން ބާއްވާން ފެށިފަހުން ގަލޮޅު އުތުރު ދާއިރާގެ ގޮނޑީގައި މެދުކެނޑުމެއްނެތި ޚިދުމަތްކުރައްވާފައިވާ ސީނިއަރ ޕާލިމެންޓޭރިއަނެކެވެ. ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީގެ މެންބަރެކެވެ. ދެ ދައުރު ބަޖެޓު ކޮމިޓީގައި އަދި އިޤްތިސާދީ ކޮމިޓީގައި މަސައްކަތްކުރެއްްވިއެވެ." އެ ބަޔާނުގައި ވެއެވެ.

މީގެ އިތުރުން އެ ބަޔާނުގައި ބުނީ، ސިޔާސީ އިސްލާޙީ ޙަރަކާތުގެ އެންމެ ކުރީ ސަފުން ޖާގަ ހޯއްދަވާފައިވާ އީވާ އަކީ އިންތިޚާބީގޮތުން ދިވެހިރާއްޖޭގެ އެންމެ ސީނިއަރ މަޤާމެއްގައި ހުރި އަންހެނާ ކަމަށެވެ.

އަދި ދިވެހިރާއްޖޭގެ އެންމެ ފުރަތަމަ ސިޔާސީ ޕާޓީގެ ޚާރިޖީ ގުޅުންތަކާބެހޭ ކޮމިޓީ މެންބަރުކަންވެސް އީވާ އަދާކުރެއްވިކަން ފާހަގަކޮށް ދަ ޑިމޮކްރެޓްސްއިން ބުނީ އީވާ އަކީ އޭނާގެ ޢިލްމީ އަދި ފަންނީ ޤާބިލުކަމާއި، ޝަޚްސިއްޔަތުގެ ހަރުދަނާކަމާމެދު ޝައްކު އުފެދިފައި ނުވާ ބޭފުޅެއް ކަމަށެވެ.

"އެއްވެސް ހަރުދަނާ އަސާސެއްގެ މައްޗަށް ބިނާކުރުމެއްނެތި މަޖިލީހުގެ ނައިބް ރައީސްގެ މަޤާމުން އީވާ ޢަބްދުﷲ ވަކިކުރުމަކީ ދަ ޑިމޮކްރެޓިކުން ކުށްވެރިކުރާ ކަމެކެވެ. އަދި ދަ ޑިމޮކްރެޓުން ބަލައިގަންނާނެ ކަމެއް ނޫނެވެ." އެ ޕާޓީން ބުންޏެވެ.