އަލީ ޒާހިރު، ނަޝީދަށް: ޒުވާންކަން ދައްކަން، ރައީސް ޞާލިހު، އިސްތަށިފުޅުގަ ކުލައެއް ނުޖައްސަވާނެ

ކުރިއަށް އޮތް ރިޔާސީ އިންތިހާބުގައި، ސަރުކާރު ކޯލިޝަންގައި ހިމެނޭ އަދާލަތު ޕާޓީން ކޯލިޝަން ހަދާފައިވާ އެމްޑީޕީީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަކީ، ޒުވާންކަން ދައްކަވަން އިސްތަށިފުޅުގައި ކުލަ ޖައްސަވާ ބޭފުޅެއް ނޫން ކަމަށް ރައީސް އޮފީހުގެ ޗީފް އޮފް ސްޓާފް، އަލީ ޒާހިރު ވިދާޅުވެއްޖެއެވެ.

ދަ ޑިމޮކްރެޓްސް ގެ ޖަގަހަ ޖަލްސާގައި ވާހަކަދައްކަވަމުން، ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވެރިކަން ކުރައްވާ ވަރަށް ވުރެ މުސްކުޅިފުޅު ވެއްޖެ ކަމަށާއި، ވެރިކަން ކުރެއްވުމަށް އެމަނިކުފާނުގެ ސިއްޙީ ޙާލުކޮޅު ތަންނުދެއްވާކަމަށް އެމްޑީޕީގެ ކުރީގެ ރައީސް އަދި މަޖިލީހުގެ ރައީސް މުޙައްމަދު ނަޝީދު ވަނީ ރޭ ވިދާޅުވެފަ އެވެ.

އެކަމަށް ރައްދު ދެއްވައި އަލީ ޒާހިރު ކުރެއްވި ޓްވީޓެއްގައި ވިދާޅުވީ، ރައީސް ޞާލިހަކީ ދުވާލަކު ގޮތަކަށް ވާހަކަ ދައްކަވާ ބޭފުޅެއް ނޫން ކަމަށެވެ. އަދި އެމަނިކުފާނަކީ "ހަލުވިމަހެއް އުޅޭހެން" އަވަސް އަވަހަށް ހަދާނެ ނަހަދާނެއް ނޭނގިގެން އުޅުއްވާ ބޭފުޅެއްވެސް ނޫން ކަމަށްވެސް ވިދާޅުވި އެވެ.

މިއާއެކު އަލީ ޒާހިރު ވިދާޅުވީ، ރައީސް ޞާލިހަކީ ރައްޔިތުންނަށް އޮޅުވާލަން ޚިޔާލީ ވަޢުދުތަކާ ހުސް އުންމީދުތައް ދެއްވާ ބޭފުޅެއް ނޫން ކަމަށެވެ.

އަލީ ޒާހިރު ވިދާޅުވީ, ރައީސް ނަޝީދަކީ ރާއްޖޭގެ ރަށްރަށުގައި ފުލެޓު އަޅައިދޭނެ ކަމަށް ބުނެ، އެކަން ކުރުމަށް ފެއިލްވެވަޑައިގެންފައިވާ ބޭފުޅެއް ކަމަށާ، އެހެންނަމަވެސް، ރައީސް ޞާލިހު، ފުޓްސަލް ދަނޑާ މަލްޓިޕާޕަސް ހޯލްގެ ވާހަކަ ދެއްކެވުމަށްފަހު، އެކަން ކުރައްވާފައިވާ ކަމަށެވެ.

"އަދި ކޮބާ ޒުވާންކަން ދައްކަން އިސްތަށިފުޅުގަ ކުލައްވެސް ނުޖައްސަވާނެ، އެތެރެއާ ބޭރު އެއްގޮތްވާނެ، ޑިމޮކްރަސީ ހަޖަމް ކުރައްވާނެ." ޢަލީ ޒާހިރު ވިދާޅުވި އެވެ.

ރޭ ޑިމޮކްރެޓްސް ގެ ޖަގަހަ ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ މިއަދު ދިވެހި ޤައުމު އެދި ގޮވަނީ ޤާބިލު، ޒުވާން ވެރިކަމަކަ ށެވެ. ވަކިވަރަކަށް މުސްކުޅިފުޅުވެ ގައިބާރު ދެރަވެ، ސިއްޙީ ޙާލުކޮޅު ދަށްވުމުން ދެން ވެރިކަން ކުރެއްވުމަކީ އެ ވެރިކަމަކުން ރައްޔިތުންނާއި ގައުމަށް ފައިދާކުރާނެ ވެރިކަމެއް ނޫންކަމަށް ނަޝީދު ވިދާޅުވި އެވެ.

އެއާއެކު ރައީސް ޞާލިހު މިސާލެއްގެ ގޮތުގައި ނަންގަވާ ނަޝީދު ވިދާޅުވީ އެމަނިކުފާނު މިހާރު ހުންނަވަނީ "މުށެއް ގެ ބޭސް" ފަރިއްކުޅުވައިގެން ކަމަށެވެ. އަދި ވެރިކަމަށް ކުރެއްވުމަށް އެމަނިކުފާނުގެ ސިއްޙީ ހާލުކޮޅު ތަން ނުދެއްވާ ކަމަށެވެ.

އެ ޙާލަތުގައި ގައުމު ބިނާ ކުރުމުގެ އާ ވިސްނުންތަކާއި ޕްލޭނުތައް ނުނެރެވޭނެކަމަށް ނަޝީދު ވިދާޅުވި އެވެ.

"ވެރިކަމަކީ ޒުވާންކަމުގެ ރޫހެއް. އެއީ ޒުވާންކަމާއި އެކީގައި އަޅުގަނޑުމެންނަށް ކޮށްދެވޭނޭ މަސައްކަތެއް. ޓެކްސްގެ ނިޒާމާއި، އިޖްތިމާއީ ރައްކާތެރިކަމާއި، ދަތުރުފަތުރުގެ ނިޒާމާއި ފްލެޓު ދޮންބެ އާއި، މި އެންމެ ކަންކަމަކީ 50 އިން މައްޗަށް އަޅާލީމާ އަލުން ވިސްނައިގެން ގެނެވެސް އޮތް ކަންކަމެއް ނޫން. ރައީސް އިބްރާހިމް މުޙައްމަދު ޞާލިހަށް ދަންނަވާލަން އޮތީ މަނިކުފާނު ވެސް މުސްކުޅިވީ ވާހަކައޭ އަޅުގަނޑު މި ދަންނަވަނީ" ރައީސް ނަޝީދު ވިދާޅުވި އެވެ.