ދުނިޔޭގެ ޤައުމުތަކާއި އެކަހެރިވެގެން މިއަދަކު ކުރިއެރުމެއް ނުލިބޭނެ: ރައީސް ޞާލިޙް
ދުނިޔޭގެ ޤައުމުތަކާއި އެކަހެރިވެގެން މިއަދަކު ކުރިއެރުމެއް ނުލިބޭނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް ވިހެން ވިދާޅުވީ ރ.އަތޮޅުގެ އިނގުރައިދޫގައި ބޭއްވި ކެމްޕޭނު ބައްދަލުވުމެއްގައި ވާހަކަދައްކަވަމުންނެވެ.
"ހެޔޮވެރިކަމެއް ކުރުމުގައި ޚާރިޖީ ސިޔާސަތަކީ ވަރަށް މުހިންމު އެއްބައި ދުނިޔޭގެ އެހެން ޤައުމުތަކާއި އެކަހެރިވެ އޮވެގެންނެއް މިއަދަކުއެއް އެއްވެސް ޤައުމަކަށް ކުރިއެރުމެއް ނުލިބޭނެ، އަޅުގަނޑުމެންގެ މިނިވަންކަމާއި ސަލާމަތާއި ރައްކާތެރިކަމާއި އަދި ތަރައްޤީ ބާރު ސްޕީޑުގައި ކުރިއަށް ގެންދަން ބޭނުން ކަމުގައި ވަންޏާ ދުނިޔޭގެ ޤައުމުތަކާއި އެކީގައި އިތުބާރު ހިފޭ ގުޅުމެއް އެބަ ބާއްވަންޖެހޭ" ރައީސް ޞާލިޙް ވިދާޅުވިއެވެ.
ރައީސް ޞާލިޙް ވިދާޅުވީ ކުރީ ސަރުކާރުގެ ވިސްނުން ހުރީ މުޅިން ތަފާތުކޮށް ކަމަށެވެ. ރައީސް ވިދާޅުވީ އެބޭފުޅުން ގެންގުޅުއްވީ، ޤައުމިއްޔަތުގެ ނަމުގައި ރައްޔިތުންނަށް އެކަން ވިސްނައިދީ މުޅިން އެކަހެރިވެ ވަކިވެގަނެގެން މިޤައުމު ހިންގުމުގެ ސިޔާސަތެއް ކަމަށެވެ.
"މިއީ ބައެއް ވެރިން ކަންކުރައްވަމުން ދާގޮތް، ވެރިކަމުގެ އާރާއި ބާރު ހިފެހެއްޓުމަށްޓަކައި، އެކަން ޤައުމިއްޔަތު ޤައުމިއްޔަތު އެބަސް ބޭނުންކޮށް ރައްޔިތުންގެ ބޮލަށް ވައްދާ"
ރައީސް އިބްރާހިމް މުޙައްމަދު ޞާލިޙް
ރައީސް ވިދާޅުވީ މިއަދު މިވަނީ ޒަމާން ބަދަލުވެފައި ކަމަށެވެ. އަދި މިހާރު އެކަހެރިކޮށް ނުތިބެވޭނެ ކަމަށާއި، އަވައްޓެރި ޤައުމުތަކާއި، ދުނިޔޭގެ އެހެން ޤައުމުތަކާއި އަދި ބައިނަލް އަޤްވާމީ ޖަމިއްޔާ ތަކާއިވެސް ގުޅުން ބަދަހި ކުރަންޖެހޭ ކަމަށް ރައީސް ވިދާޅުވިއެވެ.
ރ.އަތޮޅަށް ކުރައްވާ ދަތުރުފުޅުގައި މިއަދު ރައީސް ޞާލިޙާއި އެމަނިކުފާނުގެ ޓީމުން ވަނީ ރ އިނގުރައިދޫ އަށާއި އިންނަމާދޫއަށްވެސް ވަޑައިގެންފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
