ކެނދިކުޅުދޫ ބަނދަރު ހަދައިދީ "އިކޯ ޓުއަރިޒަމް" ތައާރަފް ކުރާނަން: ޑރ މުއިއްޒު

ކެނދިކުޅުދޫގެ ބަނދަރު ހަދައިދީ އެ ރަށަކީ "އެކޯ ޓުއަރިޒަމް" ގެ މަންޒިލަކަށް ހައްދަވާދެއްވާނެ ކަމަށް ޕްރޮގްރެސިވް ކޮނގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިފަދައިން ވިދާޅުވެފައި ވަނީ މިހާރު އެމަނިކުފާނު ނ އަތޮޅަށް ކުރައްވާ ރިޔާސީ ކެމްޕޭނު ދަތުރުފުޅުގައި އެ އަތޮޅު ކެނދިކުޅުދޫއަށް ވަޑައިގެން ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ.

ޑރ މުއިއްޒު ވިދާޅުވީ ކެނދިކުޅުދޫ ފަދަ ބޮޑު ރަށެއްގައި އެންމެ ބަނދަރެއް އޮތުމަކީ ރައްޔިތުންނާއި، ރަށަށް އެކި ބޭނުންތަކުގައި އަންނަ ފަރާތްތަކަށް އެކިވަރުގެ ތަކުލީފުތައް އުފުލަންޖެހޭ ކަމެއްކަން ފާހަގަކުރެވިފައިވާ ކަމަށެވެ.

އެހެންކަމުން ކެނދިކުޅުދޫގެ ބަނދަރު ބޮޑުކޮށް އަދި އިތުރު ބަނދަރެއް ހެދުމަކީ ކޮށްދެއްވާނެ ކަމެއްކަމަށް ޑރ މުއިއްޒު ވިދާޅުވި އެވެ.

"މީ ވަރަށް ބޮޑު ރަށެއް. ގާތްގަނޑަކަށް 4.7 ކިލޯ މީޓަރު ދިގުމިނުގައި ހުންނަ ރަށެއްގައި އެންމެ ބަނދަރެއް އޮތުމަކީ އެންމެ ރަނގަޅު ގޮތެއްކަމަކަށް ނުފެނޭ. ދެ އަވަށަށް ދެ ބަނދަރު އޮވެއްޖެއްޔާ އެންމެ ފަސޭހަވާނީ، އެހެންވީމަ އެގޮތަށް މަޝްރޫއު ރާވާނެ ވާހަކަ ދަންނަވަން"

ޑރ މުހައްމަދު މުއިއްޒު

ޑރ މުއިއްޒު ވިދާޅުވީ ކެނދިކުޅުދޫއަކީ ގުދުރަތީގޮތުން ރީތި ރަށެއް ކަމަށެވެ. އެ ރަށުގެ ރީތިކަން ނަގާނުލާ އެރަށުގައި ލޯކަލް ޓުއަރިޒަމް ތައާރަފުކޮށް އެ ދާއިރާ ފުޅާކުރެވިއްޖެ ނަމަ އެ ރަށް ވެގެންދާނީ ފަތުރުވެރިން ޒިޔާރަތްކުރާ ހިތްވާ ކަހަލަ މަންޒިލަކަށްކަމަށް ދެކެވަޑައިގަންނަވާކަމަށް ޑރ މުއިއްޒު ވިދާޅުވި އެވެ.

އެކަން ފާހަގަކުރައްވާ އެމަނިކުފާނު ވިދާޅުވީ ރަށްތަކުގެ ނާޒުކު ތިމާވެށި ހިމާޔަތްކޮށް، ރަށްތަކުގެ ރީތިކަން ފެންނާނެހެން ފަތުރުވެރިކަމުގެ ކަންކަން އެ ރަށްތަކުގެ ފުޅާކުރުމަށް ގެންގުޅޭ ވިސްނުންފުޅުގެ ތެރެއިން "އެކޯ ޓުއަރިޒަމް" ކޮންސެޕްޓު ކެނދިކުޅުދޫ އަށް ތައާރަފުކޮށް އެ ރަށަކީ އެކޯ ޓުއަރިޒަމްގެ މަންޒިލެއްގެ ގޮތުގައި ހައްދަވާދެއްވާނެ ކަމަށެވެ.

"ތިމާވެށި އެންމެ ރަނގަޅަށް ބެލެހެއްޓިގެންދާ ގޮތަށް ޓުއަރިޒަމްގެ މަޝްރޫއެއް، އިކޯ ޓުއަރިޒަމް ޚާއްސަގޮތެއްގައި އިކޯ ޓުއަރިޒަމް އޭގައި ހިމެނޭގޮތަށް، ޒުވާނުންނާއި ރަށުގެ ރައްޔިތުންނަށް އިންވެސްޓުކުރެވޭނެ ފަސޭހައިން ލޯނު ލިބިގެން ފަސޭހައިން ފައިސާ ލިބިގެން އިންވެސްޓު ކުރެވޭނެ ގޮތަށް ފަހިވާގޮތަށް އިކޯ ޓުއަރިޒަމް މި ރަށުގައި ކުރިއަށް ގެންދިއުމަކީ އަޅުގަނޑުމެން ކުރާނެ ކަމެއް"

ޑރ މުހައްމަދު މުއިއްޒު

ޑރ މުއިއްޒު ވިދާޅުވީ ފަތުރުވެރިކަމުގެ ސިނާއަތު ރަށުގައި ފުޅާކުރުން ވެގެންދާނީ ރަށުގެ ޒުވާނުންނަށް ބޭނުންވާ ވަޒީފާތައް ވެސް އުފެދިގެންދާނެ ކަމެއް ކަމަށެވެ. އޭރުން ރަށުގައި ތިބެގެން އެކަށީގެންވާ އާމްދަނީއެއް ލިބޭނެ މަގުފަހިވެގެންދާނެ ކަމަށް ޑރ މުއިއްޒު ވިދާޅުވި އެވެ.

ބަނދަރު ހެދުމާއި އިކޯ ޓުއަރިޒަމް ތައާރަފްކުރުމުގެ އިތުރުން، ކެނދިކުޅުދޫގެ މަގުތައް ޒަމާނީ ފެންވަރަށް ހެދުމުގެ މަޝްރޫއެއް ކުރިއަށް ގެންދާނެކަމުގެ ޔަގީންކަން ޑރ މުއިއްޒު ވަނީ ދެއްވާފަ އެވެ.

އޭގެ އިތުރުން، ސުކޫލު ދަރިވަރުންނަށް އެކަށީގެންވާ މިންވަރަށް ބަހުގެ ޚިދުމަތް ފުޅާކުރާނެ ކަމަށާއި، ދެން ވެސް ކެނދިކުޅުދޫގެ ރައްޔިތުންނަށް ބޭނުންވާ އަސާސީ ކަންކަން ފުރިހަމަކޮށްދެއްވާނެކަމަށް ޑރ މުއިއްޒު ވަނީ ވިދާޅުވެފަ އެވެ.