މި ސަރުކާރަށް 5 އަހަރުން ހޮޅުދޫގައި ފެން އަޅާ ނުދެވުނީމަ ހައިރާނެއް ނުވޭ: ޑރ މުއިއްޒު

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ސަރުކާރަށް 5 އަހަރު ދުވަހުގެ ތެރޭގައި ހޮޅުދޫގައި ފެނުގެ ނިޒާމު ގާއިމުކުރުމުގެ މަސައްކަތް ނިންމާނުލެވުނީތީ ހައިރާންވެވަޑައި ނުގަންނަވާ ކަމަށް، ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވިދާޅުވެއްޖެ އެވެ.

ޑރ މުއިއްޒު މިފަދައިން ވިދާޅުވެފައި ވަނީ ނ އަތޮޅަށް އެމަނިކުފާނު ކުރައްވާ ކެމްޕޭނު ދަތުރުފުޅުގައި އެ އަތޮޅު ހޮޅުދޫއަށް ވަޑައިގެން ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ.

ޑރ މުއިއްޒު ވިދާޅުވީ ހޮޅުދޫއަކީ ރައީސް ޔާމިނުގެ ޒައާމަތުގައި ތަރައްގީގެ ގިނަ މަޝްރޫއުތަކެއް ހިންގާފައިވާ ރަށެއްކަމަށް ރައްޔިތުން ބުނަމުންދާ ކަމަށެވެ.

އެހެން ނަމަވެސް ރައީސް ޔާމިނުގެ ވެރިކަން ބަދަލުވެ ރައީސް ޞާލިހުގެ ވެރިކަމާއި ހިސާބުން މި ފަސް އަހަރު ހޮޅުދޫގެ ތަރައްގީ ދިޔައީ ފަހަތަށް ކަމަށާއި، އެއީ ރައްޔިތުންނަށް ލިބިގެންދާ ވަރަށް ބޮޑު ނިކަމެތިކަމެއް ކަމަށް ޑރ މުއިއްޒު ވިދާޅުވި އެވެ.

އެކަން ފާހަގަކުރައްވާ އެމަނިކުފާނު ވިދާޅުވީ ހަގީގަތުގައި މި ސަރުކާރަށް 5 އަހަރުގެ ތެރޭގައި ރަށެއްގައި ފެނުގެ ނިޒާމު ގާއިމުނުކުރެވިގެން އުޅޭކަމަށް ބުނުމުން ހައިރާންވެވަޑައި ނުގަންނަވާ ކަމަށެވެ.

އެއީ މާލޭގައި ހަދާ އަމީނީ މަގުގެ މަސައްކަތް އަވަސްކުރުމަށް ކަމަށް ބުނެ މާލޭ ސިޓީކައުންސިލްގެ އަތުން އަތުލާ ސަރުކާރުގެ މަގުހަދާ ކުންފުނި އާރުޑީސީއާއި ހަވާލުކުރި ފަހުން ދައުރު ނިމެންދާއިރު، މިހާތަނަށް އެ މަސައްކަތް ވެސް ނިންމާލެވިފައި ނުވާތީކަމަށް މުއިއްޒު ވިދާޅުވި އެވެ.

"ހައިރާނެއް ނުވޭ 5 އަހަރުތެރޭ މަޝްރޫއެއް ނުނިމުނީމަ، މާލެއިން އަޅުގަނޑުމެންނަށް އެބަ ފެނޭ އަމީނީ މަގު ނުނިމިގެން އުޅޭތަން ވެސް. އެހެންވީމަ ހައިރާނެއް ނުވޭ މި ދާ ގޮތެއް"

ޑރ މުހައްމަދު މުއިއްޒު

ޑރ މުއިއްޒު ވިދާޅުވީ ހޮޅުދޫގެ ރައްޔިތުން އެދޭ ތަރައްގީ ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ގެނެސްދެއްވާނެ ކަމުގެ ޔަގީންކަން ދެއްވާ ކަމަށެވެ.

ޑރ މުއިއްޒު ވިދާޅުވީ ރައްޔިތުންނާއި ގުޅުންހުރި ތަރައްގީގެ ކަންކަން ކުރިއަށް ގެންގޮސްދިނުމުގެ މަސައްކަތް ހަވާލުކުރާނީ ނަތީޖާ ނެރެދީފައި އޮތް ބަޔަކާތޯ ނޫނީ މިހާރުވެސް މިދާ ގޮތަށް ކަންކަން ކުރާ ބަޔަކާތޯ ނިންމާނީ ރައްޔިތުން ކަމަށެވެ.

އެހެން ނަމަވެސް، 5 އަހަރު ދުވަހަކީ ރައްޔިތުންނަށް ބޭނުންވާ އަސާސީ ކަންކަން ފުރިހަމަކުރުމަށް އެކަށީގެންވާ މުއްދަތެއް ކަމަށާއި، އެކަން ނުކުރެވި މަޝްރޫއުތައް ލަސްވެގެން ދިއުމަކީ ރަތައްގީގެ ވިސްނުމުން ބަލާއިރު، ދޫކޮށްލައިގެން ތިބެވޭ ވަރަށްވުރެ މާ ބޮޑުކަމެއްކަމަށް މުއިއްޒު ވިދާޅުވި އެވެ.

މުއިއްޒުގެ ވެރިކަމުގައި ހޮޅުދޫގައި ހިންގާނެ ބައެއް ކަންކަން:

1. ފެނުގެ ނިޒާމުގެ މަސައްކަތް ނިންމުން

2. ހޮޅުދޫގައި ބޮޑު ސުކޫލެއް އަޅެން

3. ގެދޮރުވެރިކަމުގެ ސިޔާސަތުގެ ދަށުން ބޯހިޔާވަހިކަމުގެ މަޝްރޫއު ހިންގުން

4. ހޮޅުދޫގެ މަގުހެދުމުގެ މަޝްރޫއު ނިންމުން