މުޅި ރާއްޖެއަށްވެސް މިވީ އަމީނީ މަގަށް ވީވަރު: މުއިއްޒު
މި ސަރުކާރުން ހިންގާ ތަރައްގީގެ މަޝްރޫއުތައް ނުނިމި ދިގުލައިގެން ގޮސް މުޅި ރާއްޖެއަށް ވެސް މިހާރު ވެފައި އޮތީ އަމީނީ މަގަށް ވީ ގޮތް ކަމަށް އިދިކޮޅު ޕީޕީއެމް-ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ސަރުކާރުގެ މަޝްރޫއުތަކަށް ކުރިއަށްދާ ދުވެއްޔާމެދު ވަރަށް ބޮޑަށް ފާޑު ވިދާޅުވެއްޖެއެވެ.
ރިޔާސީ އިންތިހާބުގެ ކެމްޕެއިންގައި ނ. އަތޮޅަށް ކުރައްވަމުންގެންދަވާ ދަތުރުފުޅުގައި އެ އަތޮޅު ހޮޅުދޫއަށް ވަޑައިގެން އެރަށުގެ ސަޕޯޓަރުންނާއި ބައްދަލުކުރައްވާ ބޭއްވި ޖަލްސާގައި އެރަށުގެ ރައްޔިތުންވަނީ އެ ރަށުގައި ފަށާފައި ހުރި މަޝްރޫއުތައް ނުނިމި ލަސްވުމުގެ ކަންބޮޑުވުން ފާޅުކޮށްފައެވެ.
މިކަމާއި ގުޅިގެން މުއިއްޒު ވިދާޅުވީ މި ސަރުކާރަށް ފަސް އަހަރުގެ ދައުރެއް ނިމޭއިރު މަޝްރޫޢެއް ނުނިންމުމުން ހައިރާނެއް ނުވާކަމަށާއި، މި ސަރުކާރުގެ ދުވެލި ހުރިވަރު މާލޭގައި ހިނގަމުންދާ އަމީނީމަގުގެ މަޝްރޫޢަށް ބަލައިލުމުން އެނގޭކަމުގައެވެ.
ޑރ މުއިއްޒު ނ ހޮޅުދުއަށް ވަޑައިގަތުމުން އެ ރަށުގެ ރައްޔިތުން ވަނީ ރައީސް އިބްރާހިމް މުހައްމަދު ޞާލިހްގެ ސަރުކާރުން އެ ރަށުގައި ފަށައިފައިވާ ފެނުގެ ނިޒާމުގެ މަޝްރޫޢު ނުނިމި ދިގުލައިގެން ދިއުމުގެ ކަންބޮޑުވުން ފާޅުކޮށްފައެވެ.
އަޅުގަނޑު ހީކުރީ އަމީނީ މަގު ހެދެން އޮތް އަގަށް ވުރެ ދެގުނަ ބައި އަގު ބޮޑުކޮށް ހަވާލުކޮށްލީމަ ވަރަށް ބާރަށް ދާނޭ، އެހެނެއް ނޫން މި ވަނީކީ، އެހެން (އަމީނީ މަގުގެ މަޝްރޫއު ހެން) މުޅި ރާއްޖެ
ޑރ މުއިއްޒު
އެގޮތުން މުއިއްޒު ވަނީ، ހޮޅުދޫ ރައްޔިތުން ބޭނުންވެފައިވާ ސާފު ފެނުގެ އަސާސީ ހިދުމަތް ޕީޕީއެމް/ޕީއެންސީގެ ސަރުކާރެއްގައި ހާއްސަ އިސްކަމެއް ދެއްވައިގެން ބާރު ސްޕީޑުގައި ނިންމައިދޭނެ ކަމަށް ވައުދުވެވަޑައިގެންފައެވެ.
މީގެ އިތުރުންވެސް ހޮޅުދޫގެ ރައްޔިތުން އެދޭ ގޮތަށް މުޅިން އާ ސްކޫލް އިމާރާތެއް އަޅައިދިނުމާއި، ހޮޅުދޫ ފަޅުތެރޭގައި އޮންނަ ފަޅުރަށެއް ކަމަށްވާ މީދޫގައި ހައުސިން ޔުނިޓު އަޅާ ބޯހިޔާވަހިކަން ފޯރުކޮށްދިނުމުގެ އިތުރުން ހޮޅުދޫގެ މަގުތައް ޒަމާނީ ފެންވަރަށް ހަދައިދެއްވާނެ ކަމުގައި މުއިއްޒު ވަނީ ވައުދުވެ ވަޑައިގެންފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
