ވަތަނީ ޚިދުމަތުގެ ޕްރޮގްރާމް ވެގެންދާނީ ޒުވާނުން ބިނާކުރުމުގެ ހަރުދަނާ ބިންގަލަކަށް: ރައީސް ޑރ. މުޢިއްޒު

ސަރުކާރުން ފަށާފައިވާ ވަތަނީ ޚިދުމަތުގެ ޕްރޮގްރާމަކީ އަދުގެ ޒުވާން ޖީލު ބިނާކުރުމަށް އެޅިގެންދާ ހަރުދަނާ ބިންގަލަކަށް ވެގެންދާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ ވަތަނީ ޚިދުމަތުގެ 4 ވަނަ ބެޗުގެ ތަމްރީނުތައް ފެށުމާ ގުޅިގެން ސޯޝަލް މީޑިއާގައި ހިއްސާކުރެއްވި މެސެޖެއްގައެވެ.

ރައީސް ޑރ. މުޢިއްޒު ވިދާޅުވީ، ވަތަނީ ޚިދުމަތުގެ ޕްރޮގްރާމަކީ ދިވެހި ޤައުމިއްޔަތަށް ލޯބިކުރާ، ޒިންމާދާރު ޒުވާން ޖީލެއް ބިނާކުރުމަށްޓަކައި ސަރުކާރުން އިސްނަންގަވައިގެން ފެއްޓެވި ވަރަށް މުހިންމު މަސައްކަތެއް ކަމަށެވެ. އަދި މި ޕްރޮގްރާމް ވެގެންދާނީ މި ޤައުމުގެ ޒުވާނުންގެ ކުރިމަގު އުޖާލާކޮށް ބައްޓަންކުރުމަށް އެޅޭ ވަރަށް ވަރުގަދަ އަދި ހަރުދަނާ ބިންގަލަކަށް ކަމުގައިވެސް އެމަނިކުފާނު ފާހަގަކުރެއްވިއެވެ.

މި ޕޯސްޓުގައި ރައީސުލްޖުމްހޫރިއްޔާ ވަނީ، މި ފަހަރުގެ ބެޗުގައި ބައިވެރިވާ ހުރިހާ ޒުވާނުންނަށް ކާމިޔާބީއަށް އެދިވަޑައިގެންފައެވެ. އަދި މި ތަމްރީނު ޕްރޮގްރާމް ފުރިހަމަކުރުމަށްޓަކައި ހިތްވަރާއި ޢަޒުމާއެކު ސާބިތުވެ ތިބެ މަސައްކަތް ކުރުމަށް އެމަނިކުފާނު ވަނީ ބައިވެރިންނަށް ނަޞޭޙަތްތެރިވެވަޑައިގެން، ހިތްވަރު ދެއްވާފައެވެ.

އަލަށް މި ފެށުނު ވަތަނީ ޚިދުމަތުގެ 4 ވަނަ ބެޗުގައި ޖުމްލަ 352 ދަރިވަރުން ބައިވެރިވެއެވެ. އޭގެ ތެރޭގައި ހިމެނެނީ ރާއްޖޭގެ ހުރިހާ އަތޮޅެއް ތަމްސީލުވާ ގޮތަށް 125 ރަށަކަށް ނިޞްބަތްވާ 288 ފިރިހެން އަދި 64 އަންހެން ޒުވާނުންނެވެ. މިއީ މި ޕްރޮގްރާމަށް ޒުވާނުންގެ ބޮޑު ތަރުޙީބެއް ލިބެމުން އަންނަކަން ދައްކުވައިދޭ އަދަދެކެވެ.

މީގެ ކުރިން ބޭއްވުނު ވަތަނީ ޚިދުމަތުގެ ތިންވަނަ ބެޗުގައި ބައިވެރިވެފައިވަނީ ރާއްޖޭގެ 17 އަތޮޅެއްގެ 44 ރަށަކަށް ނިސްބަތްވާ ޖުމްލަ 84 ޒުވާނުންނެވެ. އޭގެ ތެރޭގައި ހިމެނެނީ 64 ފިރިހެން އަދި 20 އަންހެން ބައިވެރިންނެވެ.

ވަތަނީ ޚިދުމަތުގެ ޕްރޮގްރާމަކީ ޤައުމީ ލޯތްބާއި، އަޚްލާޤާއި، ސަފުތައް ދެމެހެއްޓުމާއި، އަދި ދިރިއުޅުމުގެ އެކި މައިދާންތަކަށް ބޭނުންވާ މުހިންމު ހުނަރުތައް ޒުވާނުންގެ ކިބައިގައި އަށަގެންނެވުމުގެ މަޤްޞަދުގައި ސަރުކާރުން ކުރިއަށްގެންދާ ޚާއްޞަ ޕްރޮގްރާމެކެވެ.