ވަޅުތަކަށް ފެން އަރާތީ، ހުޅުމާލޭގައި މައްޔިތުން ވަޅުލުން ވަގުތީ ގޮތުން މެދުކަނޑާލައި
ވިއްސާރަ އާ ގުޅިގެން ހުޅުމާލޭ ސަހަރާގައި ކޮންނަ ވަޅުތަކުގައި ފެން ހަރުލާފައި ހުންނާތީވެ، އެ ސަހަރާގައި މީހުން ވަޅުލުން ވަގުތީ ގޮތުން މެދުކަނޑާލައިފިއެވެ.
މިކަމާ ގުޅިގެން މާލެސިޓީ ކައުންސިލުން ބުނީ ހުޅުމާލޭ ސަރަހާގައި މައްޔިތުން ވަޅުލުން ވަގުތީގޮތުން މެދުކަނޑާލައި، މާލޭ އާސަހަރާއަށް ބަދަލުކޮށްފައިވާކަމަށެވެ. މާލެ ސިޓީ ކައުންސިލުން މިއަދު އާންމުކުރި ޕޯސްޓެއްގައިވާގޮތުން ހުޅުމާލޭ ސަހަރާގައި ވަޅު ކޮނުމުން ގާތްގަނޑަކަށް 8 އިންޗިއާއި 9 އިންޗިއާ ދެމެދުގެ މިންވަރަކަށް ފެން ހަރުލާފައި ހުރެއެވެ. އެހެންކަމުން، މި ދަނޑިވަޅުގައި މައްޔިތުން ވަޅުލުމުގެ އެންމެހައި އިންތިޒާމުތައް ކުރިއަށް ގެންދާނީ މާލޭ އާސަހަރާގައެވެ.
ވިއްސާރައާ ގުޅިގެން ހުޅުމާލޭ ސަހަރާގައި މީހުން ވަޅުލުން މެދުކަނޑާލަން ޖެހުނު މިއީ ފުރަތަމަ ފަހަރެއް ނޫނެވެ. މީގެ ކުރިން 2025 ވަނަ އަހަރުގެ ޖެނުއަރީ މަހުގެ ތެރޭގައިވެސް، ފެންފަށަލަ އުފުލި ވަޅުތަކުގައި ފެން ހެދުމުގެ ސަބަބުން ސަންދޯއް ބޭއްވުމަށް ދަތިވެ، ޖަނާޒާގެ ކަންކަން އާސަހަރާއަށް ބަދަލުކުރަން ޖެހުނެވެ.
މީގެ އިތުރުން، 2024 ވަނަ އަހަރުގެ ޖެނުއަރީ މަހު ކުރި ވިއްސާރައިގައިވެސް މިފަދަ ހާލަތެއް މެދުވެރިވެގެން ފެންގަނޑު ހިނދެންދެން ވަޅުލުމުގެ ކަންކަން އާސަހަރާއަށް ބަދަލުކުރަން ޖެހުނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
