ވިއްސާރާގައި އުތުރުގެ ބައެއް ރަށްތަކަށް ލިބުނު ގެއްލުންތައް ވަޒަންކުރުމުގެ މަސައްކަތް ފަށައިފި
މިހާރު ރާއްޖެއަށް ކުރަމުންދާ މޫސުމީ ވިއްސާރާގައި ބޯކޮށް ވާރޭވެހި، އުތުރުގެ ބައެއް ރަށްތަކަށް ލިބުނު ގެއްލުންތައް ދެނެގަތުމާއި ވަޒަންކުރުމުގެ މަސައްކަތް ފަށާފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.
މި ދުވަސްވަރު ރާއްޖޭގެ އެކި ހިސާބުތަކަށް މޫސުން ގޯސްވެ ބޯކޮށް ވާރޭވެހުމުގެ ސަބަބުން ބޮޑެތި ގެއްލުންތަކެއް ވަމުންދާއިރު، މިފަހުން އެންމެ ބޮޑަށް ގެއްލުން ލިބިފައިވަނީ އުތުރުގެ ރަށްތަކަށެވެ. އެގޮތުން ފެންބޮޑުވެ ގެއްލުންވި ރަށްތަކުގެ އެންމެ ފަހުގެ ހާލަތު އެންޑީއެމްއޭ އިން ވަނީ އާންމުކޮށްފައެވެ.
އެންޑީއެމްއޭ އިން ބުނީ ހދ. ކުޅުދުއްފުށީގައި ފެންބޮޑުވެގެން ކުރިއަށްގެންދިޔަ ފެން ހިންދުމުގެ މަސައްކަތް މިހާރު ވަނީ މެދުކަނޑާލާފައެވެ. އަދި މިވަގުތު އެ ރަށުގެ ހާލަތު ހަމަޔަކަށް އެޅިފައިވާއިރު، އެއްވެސް މީހަކު ވަގުތީ ހިޔާއަކަށް ބަދަލުވާން ޖެހިފައެއް ނުވެއެވެ. ނަމަވެސް، ގެއަށް ފެންވަދެ ދިރިނޫޅެވޭވަރު ވުމުގެ ސަބަބުން 2 ގެއެއްގެ މީހުން ވަނީ އަމިއްލައަށް ގެސްޓްހައުސްތަކަށް ބަދަލުވެފައެވެ.
ހދ. ނޮޅިވަރަމަށް ބަލާއިރު، ވާރޭ ވެހުން ހުއްޓިފައިވީ ނަމަވެސް ގިނަ ގެތަކެއްގައި އަދިވެސް ފެންބޮޑުވެފައިވާ ކަމަށް އެ އޮތޯރިޓީން ބުނެއެވެ. އެ ރަށުގައި ފެން ހިންދުމަށްޓަކައި 2 ޕަންޕު ބޭނުންކޮށް، 6 ކޯރު ކަނޑައިގެން ފެން ބޭރުކުރުމުގެ މަސައްކަތް ކައުންސިލާއި ރައްޔިތުން ގުޅިގެން ދަނީ ކުރަމުންނެވެ.
މީގެއިތުރުން، ހދ. ނޮޅިވަރަންފަރަށް ވާރޭ ވެހުން ހުއްޓާލުމާ ގުޅިގެން ރަށުގެ ބޮޑު ސަރަހައްދަކުން މިހާރު ވަނީ ފެން ހިނދިފައެވެ. އަދި މިހާރު އެ ރަށުގައި ކުރިއަށްދަނީ ފެންވަދެ ގެއްލުންވި ގެތައް ސާފުކުރުމާއި، ލިބުނު ގެއްލުންތައް ދެނެގަތުމުގެ މަސައްކަތެވެ.
ޅ. ނައިފަރަށް ވެސް ބޯކޮށް ވާރޭވެހި ބޮޑެތި ގެއްލުންތަކެއް ލިބިފައިވާއިރު، ވާރޭ ހުއްޓާލުމާ ގުޅިގެން ބައެއް ސަރަހައްދުތަކުން ފެން ހިނދެން ވަނީ ފަށާފައެވެ. ނައިފަރުގައި ވެސް ޕަންޕު ބޭނުންކޮށްގެން ފެން ހިންދުމުގެ މަސައްކަތާއި، އެކި ގޭބިސީތަކަށް ލިބުނު ގެއްލުންތައް ބެލުމުގެ މަސައްކަތް ކަމާބެހޭ އިދާރާތަކުން ދަނީ ކުރަމުންނެވެ.
މިފަހުން ކުރަންފެށި މޫސުމީ ވިއްސާރާގައި އުތުރުގެ އަތޮޅުތަކުގެ އިތުރުން ދެކުނުގެ ރަށްތަކަށްވެސް ގެއްލުންތައް ލިބުނެވެ. އެގޮތުން ވިއޯރީގައިވެސް ވަރަށްބޮޑަށް ފެންބޮޑުވެ، ރަށުގެ 90 އިންސައްތަ ގެތަކަށް ފެން ވަދެފައިވެއެވެ. ވިއްސާރައިގެ ސަބަބުން ހާލުގައި ޖެހުނު ފަރާތްތަކަށް އެހީތެރިކަން ފޯރުކޮށްދިނުމަށާއި، ލިބުނު ގެއްލުންތައް ދެނެގަނެ އަވަސް ފިޔަވަޅުތަކެއް އެޅުމަށް ސަރުކާރުގެ ކަމާބެހޭ މުއައްސަސާތަކާއި ކައުންސިލްތައް ގުޅިގެން މިހާރު ދަނީ ހަރަކާތްތެރިވަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
