އދ. ވާންޖެހޭނީ ޤާނޫނުތަކަށް ތަބާވާ، އިތުބާރާއި ޒިންމާދާރު މުއައްސަސާއަކަށް: ރައީސް ޑރ.މުއިއްޒު

އދ. އަކީ އިތުބާރު ހިފޭ، ޒިންމާދާރު، އަދި ބައިނަލްއަޤްވާމީ ހަމަތަކާއި ޤާނޫނުތަކަށް ފުރިހަމައަށް އިޙްތިރާމްކުރާ މުއައްސަސާއަކަށް ވާންޖެހޭނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަދު ފާހަގަކުރަމުންދާ އދ. ގެ 81 ވަނަ އަހަރީ ދުވަހުގެ މުނާސަބަތުގައި ފޮނުއްވި މެސެޖެއްގައެވެ. ރައީސުލްޖުމްހޫރިއްޔާގެ މެސެޖުގައި، އދ. ގެ އިތުބާރު ދެމިއޮތުމުގެ އަސްލަކީ ޤައުމުތަކުގެ މެދުގައި އޮންނަ އިތުބާރާއި ޒިންމާދާރުކަން ފާހަގަކުރައްވައި ވިދާޅުވީ، އެކަން ޙަޤީޤަތަކަށް ހެދޭނީ ބައިނަލްއަޤްވާމީ ޤާނޫނުތަކާއި ހަމަތަކަށް އެންމެހައި ޤައުމުތަކުން ތަބާވެ، މުޢާހަދާތައް ފުރިހަމައަށް ތަންފީޛުކުރެވިގެންކަމަށް ވިދާޅުވިއެވެ. މީގެއިތުރުން، ޖިއޯޕޮލިޓިކަލް ނުތަނަވަސްކަން އިތުރުވުމާއި، ޤާނޫނުތައް ތަންފީޛުކުރުމުގައި ގެންގުޅޭ ތަފާތުކުރުންތަކުގެ ސަބަބުން މި އިތުބާރު ހީނަރުވަމުންދާކަން އެމަނިކުފާނު ވަނީ ހިތާމައާއެކު ފާހަގަކުރައްވާފައެވެ.

މިފަދަ ބައިބައިވުންތަކުގެ ސަބަބުން، ޚާއްޞަކޮށް ޒަޔަނިސްޓު އިސްރާއީލުގެ އަނިޔާވެރިކަމާ ކުރިމަތިލާންޖެހިފައިވާ ފަލަސްޠީނުގެ އަޚުންނާއި އުޚުތުންނަށާއި، މުޅި އިންސާނިއްޔަތަށް ލިބެމުންދާ ފޫނުބެއްދޭ ބޮޑެތި ގެއްލުންތަކުގެ ކަންބޮޑުވުން ރައީސުލްޖުމްހޫރިއްޔާ ޙިއްޞާކުރެއްވިއެވެ. ހަމައެއާއެކު، ތަރައްޤީވަމުން އަންނަ ކުދި ޖަޒީރާ ޤައުމުތަކަށް (ސިޑްސް) ދިމާވެފައިވާ މާލީ އަދި ޓެކްނޮލޮޖީގެ ދަތިތަކާއި، ދެމެހެއްޓެނިވި ނޫން ގޮތުގައި އުފުލަންޖެހިފައިވާ ބޮޑެތި ދަރަނިތަކަކީ، އެ ޤައުމުތަކުގެ ވިލުންތެރިކަމަށް އެޅިފައިވާ ބޮޑު ހުރަހެއް ކަމުގައިވެސް އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާ އިތުރަށް ވިދާޅުވީ، ދިވެހިރާއްޖޭގެ މުސްތަޤްބަލު އަމިއްލައަށް ކަނޑައެޅުމުގެ ސިޔާދަތީ ޙައްޤު ފުރިހަމައަށް ލިބި، ޤައުމީ އުންމީދުތައް ޙާޞިލުކުރުމަށް މަގުފަހިވުމަކީ، 2040 ވަނަ އަހަރުގެ ނިޔަލަށް ތަރައްޤީވެފައިވާ ޤައުމަކަށް ވުމަށް ރާއްޖެއިން ކަނޑައަޅާފައިވާ އަމާޒަށް ވާޞިލުވުމަށް ލިބޭނެ މުހިންމު ބާރެއް ކަމަށެވެ. އަދި މި އަމާޒަށް ވާޞިލުވުމަށްޓަކައި، އިޤްތިޞާދު ސިންދަފާތުކޮށް ވަރުގަދަކުރުމާއި، އިންސާނީ ވަޞީލަތް ތަރައްޤީކުރުމުގެ އިތުރުން، ބޭރުގެ ލޮޅުންތަކުން އަރައިގަތުމުގެ ވިލުންތެރިކަން އިތުރުކުރަންޖެހޭކަމަށް ވިދާޅުވިއެވެ.

އދ. އަކީ ހުރިހާ ދައުލަތްތަކެއްގެ ޙައްޤުތައް އެއްހަމައެއްގައި ހިމާޔަތްކޮށްދޭ، ހުރިހާ ޤައުމެއްގެ އަޑު އައްސަވާ، އަދި އެއްވެސް ބާރެއްގެ ނުފޫޒަކާ ނުލައި ކޮންމެ ޤައުމަކަށްވެސް އަމިއްލަ މުސްތަޤްބަލު ކަނޑައެޅުމުގެ ޖާގަދޭ ތަނަކަށް ވާންޖެހޭނެ ކަމަށް ރައީސް ޑރ. މުޢިއްޒު ވިދާޅުވިއެވެ.

މެސެޖު ނިންމަވާލައްވަމުން ރައީސުލްޖުމްހޫރިއްޔާ ވަނީ، ދުނިޔޭގެ ޞުލްޙަމަސަލަސްކަން ދެމެހެއްޓުމަށާއި، ޢަދުލުއިންޞާފު ޤާއިމުކުރުމަށާއި، އަދި ކޮންމެ ދައުލަތެއްގެ މިނިވަންކަމާއި ސިޔާދަތު ކަށަވަރުކުރުމަށްޓަކައި ބައިނަލްއަޤްވާމީ މުޖުތަމަޢާ ގުޅިގެން މަސައްކަތްކުރުމުގައި ދިވެހިރާއްޖެ އަބަދުވެސް ސާބިތުކަންމަތީ ދެމިއޮންނާނެ ކަމުގެ ފުރިހަމަ ޔަޤީންކަން އަރުވާފައެވެ.