ރައީސް ޔާމީންގެ އައު ޕާޓީގެ ލޯގޯ ފައިނަލް ކުރައްވައިފި!

ކުރީގެ ރައީސް އަދި ޕީޕީއެމްގެ ލީޑަރ ރައީސް އަބްދުالله ޔާމީން އަބްދުލްގައްޔޫމްގެ އައު ޕާޓީގެ ލޯގޯ ފައިނަލް ކުރައްވައިފިއެވެ.

މިކަން އަންގައި، ކުރީގެ ޓެކްނޮލޮޖީ މިނިސްޓަރ މުހައްމަދު މަލީހު ޖަމާލް ކުރެއްވި ޓުވީޓެއްގައި ވިދާޅުވީ، ޕާޓީގެ ލޯގޯ ރައީސް ޔާމީން ފައިނަލް ކުރެއްވީ މިއަދުގެ ހެނދުނުގެ ވަގުތެއްގައި ކަމަށެވެ.

މަލީހުގެ ވަނީ ޔާމީންގެ އައު ޕާޓީގެ ކަންކަން ކުރިއަށްދާގޮތް އެންމެންވެސް ވަރަށް ގާތުން ބަލައި، އާ ޕާޓީއާއި ގުޅުމަށް ތައްޔާރު ވުމަށް ރައީސް އެދިވަޑައިގެންނެވި ކަމަށްވެސް ވިދާޅުވެފައެވެ.

އަދި އެމަސައްކަތް ކުރިއަށްދަނީ "ޔާން ސްޕީޑް"ގައި ކަމަށްވެސް މަލީހު ވިދާޅުވި އެވެ. ނަމަވެސް، މަލީހުގެ ޓުވީޓުގައި އެ ޕާޓީގެ ނަން ހާމަކުރައްވާފައެއް ނުވެއެވެ.

ރޭގެ ވަގުތެއްގައި ޗެނަލް 13 އަށް ދެއްވި ބަސްދީގަތުމެއްގައި ކުރީގެ ރައީސް އަދި ޕީޕީއެމްގެ ލީޑަރ ރައީސް ޔާމީން އަބްދުލްގައްޔޫމް ޕީޕީއެމުން ވަކިވެވަޑައިގެން އައު ޕާޓީއެއް އުފައްދަވަން ނިންމަވާފައިވާކަން އިއުލާން ކުރެއްވީ އެމަނިކުފާނުގެ އިސް ގާނޫނީ ވަކީލު ޑރ މުހައްމަދު ޖަމީލެވެ.

ޑރ. ޖަމީލް ވިދާޅުވި ގޮތުގައި، ރައީސް ޔާމީން ޕީޕީއެމުން ވަކިވެވަޑައިގަންނަވަން ނިންމެވީ، ރައީސުލްޖުމްހޫރިއްޔާ ޑރ މުހައްމަދު މުއިއްޒު ވެރިކަމަށް އިންތިޚާބުވެ ވަޑައިގެންނެވުމާއިއެކު، ޕީޕޯއެމްގެ ލީޑަރޝިޕްގެ ބޭފުޅުން، ސަރުކާރުގެ މަގާމްތަކަށް ވަޑައިގެން، އެމަނިކުފާނާ ދުރަށް ޖެހިވަޑައިގެން، ކަންކަމުގައި އެމަނިކުފާނުގެ މަޝްވަރާ ނުހޯއްދަވައި ނިންމެވުންތައް ނިންމަވަމުން ދާތީއެވެ. އަދި ޕީޕީއެމުން ވަކިވެވަޑައިގަންނަވަން ނިންމެވި ނިންމެވުމަކީ އެމަނިކުފާނަށް ފަސޭހަ ނިންމެވުމެއް ނޫން ކަމަށް ޖަމީލް ވިދާޅުވި އެވެ.

މީގެ އިތުރުން ޖަމީލް ވިދާޅުވީ، ރައީސް ޔާމީންގެ ތަރައްގީގެ ފިކުރު ކުރިއެރުވުމަށްޓަކައި، ކުރިއަށް އޮތް ތަނުގައި އެމަނިކުފާނުގެ ވިސްނުން ހުންނެވީ އައު ޕާޓީއެއް އުފެއްދެވުމަށް ކަމަށެވެ.

"ޕީޕީއެމްގެ ލީޑަރޝިޕްގެ އަމަލުތަކާއި، އެބޭފުޅުން ޢަމަލު ކުރައްވަމުން ގެންދަވާ ގޮތާއި، އަދި އެބޭފުޅުން އެމަނިކުފާނުގެ މަޝްވަރާ ހޯއްދަވަން ބޭނުން ނުވާތީއާ، އެމަނިކުފާނުގެ ޚިޔާލުވެސް އެބޭފުޅުން ބޭނުން ނުވާތީއާ، މިކަންތައްތައް މިހެން އޮތުމުން، މިރޭ ރައީސް ޔާމީން ނިންމަވާފައި މިވަނީ ޕީޕީއެމް ދޫކުރައްވަން. އަދި ހަމައެހެންމެ، އެމަނިކުފާނު މިހާރު ވަނީ ނިންމަފާައި އެމަނިކުފާނުގެ ސިޔާސީ މަސައްކަތްޕުޅު، އަދި އެމަނިކުފާނުގެ ސިޔާސީ ފިކުރު، ސިޔާސީ ވިސްނުން، ކުރިއަށް ގެންދިޔުމަށްޓަކައި އެމަނިކުފާނު ވަނީ ނިންމަވާފައި ސިޔާސީ ޕާޓީއެއްވެސް އުފައްދަވަން" ޖަމީލް ވިދާޅުވި އެވެ.