އެސްއީޒެޑްގެ ފުރަތަމަ ޕްރޮޕޯސަލް ލިބިފައިވާކަން ރައީސް ޑރ.މުއިއްޒު އިއުލާންކުރައްވައިފި
ސްޕެޝަލް އިކޮނޮމިކް ޒޯން (އެސްއީޒެޑް)ގެ ގާނޫނުގެ ދަށުން ފުރަތަމަ ޕްރޮޕޯސަލްގެ ގޮތުގައި ސަރުކާރަށް ސޯލާ އެނާޖީގެ ބިޔަ މަޝްރޫއެއް ލިބިފައިވާކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާން ކުރައްވައިފިއެވެ.
މިއީ ރާއްޖޭގެ އެސްއީޒެޑްއެއްގައި މަޝްރޫއެއް ހިންގޭނެ އަގު ދަށްކުރިފަހުން ލިބުނު ފުރަތަމަ ޕްރޮޕޯޒަލެވެ.
މިރޭ އޮތް ކޮންސްޓްރަކްޝަން އިންޑަސްޓްރީ، މަސީގެ ބިލްޑާޒް އެވޯޑު ދިނުމުގެ ހަފްލާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ މި ޕްރޮޕޯސަލަކީ އިއާދަކުރަނިވި ހަކަތައިން 110 މެގަވޯޓުގެ ކަރަންޓު އުފެއްދުމުގެ މަޝްރޫއެއް ކަމަށެވެ.
"އަޅުގަނޑު އުފަލާއެކީގައި ދަންނަވާލަން ފުރަތަމަ ޕްރޮޕޯސަލް އަޅުގަނޑުމެންނަށް ވަނީ ލިބިފައި. އެ ޕްރޮޕޯސަލަކީ ވެސް ރިނިއުބަލް އެނާޖީގެ ދާއިރާއިން 110 މެގަވޮޓް ހާސިލްވެގެންދާ އެސްއީޒެޑް ޕްރޮޕޯސަލެއް"
ރައީސް ޑރ.މުއިއްޒު ވިދާޅުވިއެވެ.
މީގެ އިތުރުން އެމަނިކުފާނު ވިދާޅުވީ މިއީ ދާދިފަހުން ބޭއްވި ކޮޕް28 އަށް ފަހު، އެ ބައްދަލުވުމުގައި ކަނޑައެޅި ލަނޑުދަނޑިތައް ހާސިލުކުރުމަށްޓަކައި ދުނިޔޭގެ ގައުމަކުން ފެށި ފުރަތަމަ މަސައްކަތް ކަމަށެވެ.
މީގެ ކުރިން އެސްއީޒެޑްގައި އިންވެސްޓްކުރެވޭނެ އެންމެ ދަށް އަގަކީ 150 މިލިއަން ޑޮލަރުކަމުގައި ވީނަމަވެސް ރައީސް ޑރ.މުއިއްޒު ވަނީ މި އަގު 100 މިލިއަން ޑޮލަރަށް ދަށްކުރައްވާފައެވެ.
އެންމެފަހުން މި އިންވެސްޓްމަންޓުގެ އަދަދު ކަނޑައަޅާފައިވަނީ 31، ޖެނުއަރީ 2018 ގައި ކުރީގެ ރައީސް ޔާމީންއެވެ. ނަމަވެސް މި ގާނޫނުގެ ދަށުން ރާއްޖެއަށް އިންވެސްޓްމަންޓް ގެންނަން ނިމިދިޔަ ސަރުކާރުން މަސައްކަތެއް ނުކުރެއެވެ. ރައީސް ޑރ. މުއިއްޒު ވަނީ ރިޔާސީ އިންތިހާބުގެ ކެމްޕޭންގައި އެސްއީޒެޑް ގާނޫނު ތަންފީޒުކުރައްވާ، އިންވެސްޓްމެންޓްތަކަށް ފުރުސަތު ހުޅުއްވާލައްވާނެ ކަމަށް ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
