އަހަރަކަށްވުރެ ގިނަ ދުވަސްވީ 13،000 މައްސަލަ، އަވަހަށް ނިންމަން ޓާސްކު ފޯހެއް
ލިޔުންތެރިޔާ
އަހުމަދު ހަމީދު އާދަމް
އަހަރަކަށްވުރެ ގިނަ ދުވަސްވީ 13،000 ވުރެ ގިނަ މައްސަލަ އެބައޮތް ކަމަށާ އެ މައްސަލަތައް އަވަހަށް ނިންމަން ޓާސްކު ފޯހެއް އެކުލަވާލަން ނިންމާފައިވާ ކަމަށް އުއްތަމަފަނޑިޔާރު ޢަބްދުލްޣަނީ މުޙައްމަދު މިރޭ ވިދާޅުވެއްޖެ އެވެ.
އުއްތަމަފަނޑިޔާރު މިހެން ވިދާޅުވީ "ޤަޟާޢީ އަހަރު 2026" އިފްތިތާޙު ކުރުމަށް މިރޭ ބޭއްވި ރަސްމިއްޔާތުގަ އެވެ. އުއްތަމަ ފަނޑިޔާރު ވިދާޅުވި ގޮތުގައި އިންސާފު ލަސްވުމަކީ އިންސާފު ނުލިބުމެވެ. އެހެން ކަމުން މި އަހަރު ޝަރުއީ ދާއިރާއިން ހާސިލުކުރަން ބޭނުންވާ އެންމެ މުހިންމު އެއް ލަނޑުދަނޑިއަކީ ގިނަ ދުވަސްވެފައިވާ މައްސަލަތައް ނިންމާ ބެކްލޮގް ފިލުވާލުން ކަމުގައި ވިދާޅުވި އެވެ.
ޣަނީ ވިދާޅުވި ގޮތުގައި މިވަގުތު ވަރަށް ގިނަ ދުވަސްވެފައިވާ މައްސަލަތައް އެބަހުއްޓެވެ. އެގޮތުން މައްސަލަ ނުނިމި އަހަރަށް ވުރެ ގިނަ ދުވަސްވެފައިވާ 13,032 މައްސަލަ އެބަ އޮތް ކަމުގައި ވިދާޅުވި އެވެ.
"2026 ވަނަ އަހަރު ޝަރުއީ ދާއިރާއިން ހާސިލުކުރަން ބޭނުންވާ އެންމެ މުހިންމު އެއް ލަނޑުދަނޑިއަކީ އިންސާފު ލަސްވެފައިވާ މައްސަލަތަކަށް އަމާޒުކޮށްގެން ހާއްސަ މަސައްކަތްތަކެއް ކޮށް އެ މައްސަލަތަކުގައި އިންސާފު ގާއިމު ކުރުން,"
އެހެން ކަމުން މި މައްސަލަތަކުގައި އިންސާފު ގާއިމުކުރުމަކީ ވަރަށް އިސްކަން ދޭން ބޭނުންވާ ކަމެއްގައި ވިދާޅުވި އެވެ. އަދި ވިދާޅުވީ މި މައްސަލަތަކަށް އިންސާފު ގާއިމުކުރާނީ މި އަހަރު އަލަށް ރަޖިސްޓްރީވާނެ ކަމަށް ލަފާކުރެވޭ 21,000 ހާސް މައްސަލަ ވެސް މަޑުޖެހުމެއް ނެތި ކުރިއަށް ގެންދެވޭނެ ގޮތަށް ރާވައިގެން ކަމަށެވެ.
އެކަމަށް މަގުފަހި ކުރުމަށްޓަކައި ވަކި ޓާސްކު ފޯހެއް މި މަހުގެ 10 ވަނަ ދުވަހު އެކުލަވާލެވޭނެ ކަމުގައި ވިދާޅުވި އެވެ. އަދި ވިދާޅުވީ ޓާސްކު ފޯހުގެ ކޮންމެ މަސައްކަތެއްވެސް ކުރިއަށް ގެންދެވޭނީ ވަރަށް ހަރުދަނާކަމާ އެކު ކަމަށެވެ.
"އެ ޓާސްކްފޯހުގެ ފަރާތުން މީގެ ތެރެއިން ކޮންމެ މައްސަލައެއް ނުނިމި އޮތް ސަބަބު, ސީދާ އެ މައްސަލަ ހަވާލުކުރެވިފައިވާ މެޖިސްޓްރޭޓް, ގާޒީ, ފަނޑިޔާރުގެ ގާތުގައި އަހާ, ނުނިމި އޮތް ސީދާ ސަބަބު ރަނގަޅަށް ސާފުކޮށް އެ މައްސަލަ ކުރިއަށް ގެންގޮސް ދިނުމުގައި އެހީތެރިވެދޭނެ," އުއްތަމަފަނޑިޔާރު ވިދާޅުވި އެވެ.
އުއްތަމަފަނޑިޔާރު ވިދާޅުވީ މި މައްސަލަތަކުގެ ތެރެއިން ބަންދުގައި ތިބި މީހުންގެ މައްސަލަތަކަށްވެސް ދާއިމީ ހައްލު އަންނާނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
