ރައީސް ނަޝީދާއި ރައީސް ޞާލިހުގެ ތަފާތެއް ނެތް: ދުންޔާ

ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދާއި ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހްގެ ތަފާތެއް ނެތް ކަމަށް ކުރީގެ ފޮރިން މިނިސްޓަރ ދުންޔާ މައުމޫން ވިދާޅުވެއްޖެއެވެ.

މިއަދު ކުރެއްވި ޓްވީޓެއްގައި ދުންޔާ ވަނީ ވެރިކަން ހިންގުމުގެ ޤާބިލު ކަމެއް އެދެބޭފުޅުންގެ ނެތް ކަމަށް ވިދާޅުވެފައެވެ. އެގޮތުން ދުންޔާ ވިދާޅުވި ގޮތުގައި އެދެބޭފުޅުން ވަނީ ދަރާފައިވާ މީހުން ސަރުކާރު ހިޞާރު ކުރުމަށް ދޫކޮށްލާފައި ކަމަށެވެ. އަދި މި ގައުމުގެ މިނިވަންކަން ބޭރު ބަޔަކަށް "ހިލޭ އެހީ" ގެ ގޮތުގައި އެބޭފުޅުން ދީފައިވާ ކަމަށްވެސް އޭނާ ވިދާޅުވި އެވެ.

މިއާއެކު ދުންޔާ ވަނީ އެމްއެންޕީ ސަރުކާރެއް ހިންގާނީ ޤާބިލް މީހުންކަމަށްވެސް ވިދާޅުވެފައެވެ.

ރައީސް ޞާލިހާއި ނަޝީދު، ގައުމުގެ މިނިވަންކަން ބޭރު ބަޔަކަށް "ހިލޭ އެހީ" ގެ ގޮތުގައި ދީފައިވާ ކަމަށް ދުންޔާ ވިދާޅުވެފައި އެވަނީ، 2010 ވަނަ އަހަރު ރައީސް ނަޝީދުގެ ސަރުކާރުން، އިންޑިއާގެ ޖީއެމްއާރު ކުންފުންޏަށް، އިބްރާހީމް ނާސީރު އިންޓަނޭޝަނަލް އެއާޕޯޓް ކުއްޔަށް ދެއްވި ހާދިސާއާއި ގުޅުވައިގެން ކަމަށް ބެލެވެއެވެ.

ޖީއެމްއާރާއި އެކު އެ ވެވުނު އެއްބަސްވުން ނިމުމަކަށް ގެނެސްފައިވަނީ ރައީސް ނަޝީދުގެ ވެރިކަން ވެއްޓި، ރައީސް މުހައްމަދު ވަހީދުގެ ވެރިކަމުގައެވެ. އަދި ޖީއެމްއާރު އާބިޓްރޭޝަންގެ މައްސަލައިގައި ދައުލަތުން އެ ކުންފުންޏަށް 271 މިލިޔަން ޑޮލަރު ދައްކަން ޖެހުނު އިރު، އެ ފައިސާ ދައްކާ ހަލާސްކުރީ، ކުރީގެ ރައީސް ޔާމީން ގެ ވެރިކަމުގައި، 2016 ވަނަ އަހަރުގެ ނޮވެމްބަރުމަހުގެ 16 ވަނަ ދުވަހުގައެވެ.

ރައީސް ނަޝީދުގެ އިތުރުން ރައީސް ޞާލިހުގެ މި ސަރުކާރުންވެސް އިންޑިއާއި އެކު އެތަކެއް އެއްބަސްވުމުގައި ސޮއިކޮށް އެތަކެއް ލޯނެއް އެހީގެ ގޮތުގައި ނަގާފައިވާއިރު، އެއީ ދިވެހި ދައުލަތުގެ ދަރަނީގެ ތެރެއިން އެއް ޤައުމަކުން ނެގި އެންމެ ބޮޑު ދަރަންޏަށް މިހާރު ވަނީ ވެފައެވެ. އެ ދަރަނިތައް ސަރުކާރުން ސިފަކުރަނީ އިންޑިއާއިން ދޭ އެހީގެ ގޮތުގައެވެ.