އެފްކޮންސްގެ ޖޫރިމަނާ މާފުކުރުމުގެ އެއްވެސް ވިސްނުމެއް ނެތް: ޝައުނާ

ބުރިޖު ޕްލެޓުފޯމު ފަރަށް އެރި މައްސަލާގައި އެފްކޮންސް ކުންފުނި ކޮށްފައިވާ ޖޫރިމަނާ މާފުކޮށްދެއްވުމުގެ ވިސްނުމެއް ނުގެންގުޅުއްވާކަމަށް އެންވައިރަމެންޓު މިނިސްޓަރު އައިމިނަތު ޝައުނާ ވިދާޅުވެއްޖެއެވެ.

ބުރިޖު ޕްލެޓުފޯމު ވިލިނގިލި ފަރަށް އެރި މައްސަލައާއި ގުޅިގެން އެ މަސައްކަތް ކުރަމުންދާ އެފްކޮންސް ކުންފުނި 69 މިލިއަން ރުފިޔާއިން ޖޫރިމަނާ ކުރިތާ މިހާރު 8 މަހަށްވުރެ ގިނަ ދުވަސްވެފައިވާއިރު، އަދިވެސް އެފްކޮންސް އިން އެ ޖޫރިމަނާ ފައިސާ ނުދައްކައެވެ. އެކަމާއި ގުޅިގެން މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދުވަނީ، އެފްކޮންސް ގެ ޖޫރިމަނާ ފައިސާ ހޯދުމަށް މިނިސްޓްރީން އެއްވެސް މަސައްކަތެއް ކުރަމުންދޭތޯ މިނިސްޓަރު ޝައުނާ އާއި ސުވާލު ކުރައްވާފައެވެ.

ސައީދުގެ ސުވާލަށް ޖަވާބު ދެއްވައި ޝައުނާ ވިދާޅުވީ، ވޭތުވި ހަތަރު އަހަރުގެ ތެރޭގައި 40 މައްސަލައެއްގައި 600 މިލިއަނަށްވުރެ ބޮޑު ޖޫރިމަަނާތަކެއް ކޮށްފައިވާ ކަމަށެވެ. އަދި، އެ އަދަދުގެ ތެރެއިން މިހާތަނަށް ސަރުކާރަށް ހޯދިފައިވަނީ ތިން ބައި ކުޅަ އެއް ބައިކަމަށާ އެއީ ދިވެހިރާއްޖޭގެ ތާރީހުގައިވެސް ޖޫރިމަނާކޮށްގެން ހޯދިފައިވާ އެންމެ ގިނަ ފައިސާކަމަށް އޭނާ ވިދާޅުވިއެވެ.

މިއާއެކު ޝައުނާ ވިދާޅުވީ، އެފްކޮންސް އިންވަނީ އެ މައްސަލަ އޭނާ އަށް ރިވިއުއަށް ހުށައަޅުއްވާފައިކަމަށެވެ. އެހެންކަމުން އޭނާ ވަނީ އެކަމުގެ ދަށުން އަމަލުކުރަންޖެހޭ ގޮތުގެ “ލީގަލް ރިވިއުއެއް” ހަދާފައިކަމަށެވެ. އަދި ލިބިފައިވާ ލަފާއަކީ “އިންޑިޕެންޑެންޓު ރިވިއުއެއް” ހެދުންކަމަށް ޝައުނާ ފާހަގަކުރެއްވިއެވެ.

ލީގަލް ރިވިއު އިން އަޅުގަނޑަށް ލަފާ ދީފައިވަނީ އިންޑެޕެންޑެންޓް، ޓެކްނިކަލް ރިވިއު އެއް ހެދުމަށް. އެ މަރުހަލާ ގައި މިހާރު ވަނީ. މި ޖޫރިމަނާ މާފު ކުރުމުގެ އެއްވެސް ވިސްނުމެއް އަޅުގަނޑުގެވެސް ސަރުކާރުގެވެސް ނެތް ވާހަކަ ދަންނަވަން.

މިނިސްޓަރު އާމިނަތު ޝައުނާ

2022 ވަނަ އަހަރުގެ އޮޖަސްޓު މަހުގެ 16 ވަނަ ދުވަހު ބްރިޖު އެޅުމަށް ގެންގުޅުނު ޕްލެޓުފޯމު ވިލިމާލެ ފަރަށް އެރުމުގެ ސަބަބުން އެ ސަރަހައްދަށް ބޮޑެތި ގެއްލުންތައް ލިބިފައިވެއެވެ. އީޕީއޭއިން އާއްމުކުރި ފޮޓޯތަކުން ފެންނަ ގޮތުން ޕްލެޓްފޯމް ފަރަށް އެރުމުގެ ސަބަބުން، ވިލިމާލެ ފަރަށްވަނީ ބޮޑެތި ގެއްލުންތަކެއް ލިބިފައެވެ. އެގޮތުން ފަރުގައި ހަތަރު ބާގަނޑު ހެދިފައިހުރި މަންޒަރު ފެނެއެވެ.