ކޮތަޅަށް 2 ރުފިޔާ ނުނަގާ ތިމާވެށި ހިމާޔަތްކުރުމަށް ކުރެވޭނެ އެތައް ކަމެއް އެބަހުރި: އުޝާމު

ސިންގަލް ޔޫސް ޕްލާސްޓިކް ކޮތަޅުން ދެ ރުފިޔާ ނުނަގާވެސް ތިމާވެށި ހިމާޔަތްކުރުމަށް ކުރެވިދާނެ ވަރަށް ގިނަ ކަންތައްތަކެއް އެބަހުރި ކަމަށް ރައްޔިތުންގެ މަޖިލީހުގެ ވިލިމާލެ ދާއިރާގެ މެންބަރު އަހުމަދު އުޝާމް ވިދާޅުވެއްޖެ އެވެ.

އުޝާމު މިފަދައިން ވިދާޅުވެފައިވަނީ ޕްލާސްޓިކް ކޮތަޅުން ދެ ރުފިޔާ ނެގުމަށް ކުނި މެނޭޖުރުމުގެ ޤާނޫނަށް މިހާރު ހުށައަޅާފައިވާ އިސްލާހަށް މަޖިލީހުގައި ބަހުސްކުރައްވަމުން ނެވެ.

އުޝާމު ވިދާޅުވީ ޕްލާސްޓިކް ކޮތަޅުން 2 ރުފިޔާ ނަގަން ފެށުމުން ތިމާވެއްޓަށް ލިބޭނެ ފައިދާއާއި، އަދި ކޮތަޅުގެ ބަދަލުގައި ބޭނުން ކުރެވޭނެ ވަސީލަތެއް ސަރުކާރުން ރައްޔިތުންނަށް އޮޅުންފިލުވާ ދެއްވާފައި ނުވާކަމަށެވެ.

ޕްލާސްޓިކް ކޮތަޅުން ތިމާވެއްޓަށް ލިބޭ ގެއްލުމަށްވުރެ ބޮޑެތި ގެއްލުންދޭ ވަސީލަތްތައް ހުރިއިރު އެކަންކަމަށް ބެއްލެވުމެއް ނެތި ކޮތަޅުން ދެ ރުފިޔާ ނަގަން ފެށި ސަބަބާއި ގުޅިގެން ވެސް ގިނަ ސުވާލުތަކެއް އުފެދޭކަމަށް އުޝާމު ވިދާޅުވި އެވެ.

"ދިރާސާތަކުން ދައްކާގޮތުން އެންމެ ބޮޑު ސީ ޕޮލިއުޓަންޓަކީ ސިންގަލް ޔޫސް ޕްލާސްޓިކް އެއް ނޫން. އެންމެ ބޮޑު ސީ ޕޮލިއުޓަންޓަކީ ސިނގިރޭޓު ބަޓު. ދެވަނައަށް އެންމެ ބޮޑު ސީ ޕޮލިއުޓަންޓަކީ ކާބޯތަކެތި ރެޕްކޮށްފައި ހުންނަ ރެޕާސް. ތިން ވަނައަށް އެންމެ ބޮޑު ޕޮލިއުޓަންޓަކީ ޕްލާސްޓިކް ބޮޓަލް. ކޮތަޅު މި ލިސްޓުގައި އަންނަނީ ފަސް ވަނައަށް"

ވިލިމާލެ ދާއިރާގެ މެމްބަރު އަހުމަދު އުޝާމު

އެވާހަކަތަކާއި ގުޅުވާ އުޝާމު ވިދާޅުވީ ޕްލާސްޓިކް ފުޅި ބޭނުންކުރެވޭ މިންވަރު މަދުކުރުމަށް ސަރުކާރުން އެކަށީގެންވާ މަސައްކަތްތަކެއް ކުރަމުން ނުދާކަން ފާހަގަކުރެވޭ ކަމަށެވެ.

އެގޮތުން ރާއްޖޭގައި ޕްލާސްޓިކް ފުޅި އުފައްދާ ބޭނުންކުރަމުންދާ ކަމަށާއި، އެކަން ހުއްޓުވުމަށް ސަރުކާރުން މަސައްކަތް ކުރަމުން ނުދާތީ ކޮތަޅުން 2 ރުފިޔާގެ ފީއެއް ނަގަނީ ތިމާވެށި ހިމާޔަތްކުރުމުގެ އިހުލާސްތެރި ނިޔަތެއްގައި ކަމަށް ޤަބޫލުކުރަން ދަތިފުޅުވާކަމަށް އުޝާމު ވިދާޅުވި އެވެ.

އޭގެ އިތުރުން އުޝާމު ވިދާޅުވީ ކޮތަޅުން ދެ ރުފިޔާގެ ފީއެއް ނަގަން ފެށުމާއި ގުޅިގެން ރައްޔިތުންގެ ނުތަނަވަސްކަން އިންތިހާއަށް ބޮޑުވެގެން ދިޔައީ އެ ފީއަށް ރައްޔިތުން އަހުލުވެރިނުކޮށް އެކަން ކުރަން އުޅުމުން ކަމަށެވެ.

އެފަދަ ފީ އެއް ނަގަން ޖެހުނު ސަބަބާއި ޕްލާސްޓިކުން ތިމާވެއްޓަށް ވާ ގެއްލުން ރައްޔިތުންނަށް ބުނެދީ ޤާނޫނަށް އަހުލުވެރި ކުރުވުމަށްފަހު ޕީ ނަގަން ފެށި ނަމަ އެ މައްސަލަތައް ދިމާނުވާނެކަމަށް އުޝާމުގެ ވާހަކައިގައި ފާހަގަކުރެއްވި އެވެ.