ކާޑު ގުދަންތައް ރަޖިސްޓްރީ ކުރަން އަންގައިފި

ކާޑުގެ ބާވަތްތައް ގުދަންކުރާ ތަންތަން ރަޖިސްޓްރީކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީން އަންގައިފި އެވެ.

އެފްޑީއޭއިން ބުނީ، ގުދަންތައް އެ އޮތޯރިޓީގައި ރަޖިސްޓްރީކުރަން އަންގަވައިފައިވަނީ، ކާޑުގެ ބާވަތްތަކުގެ ރައްކާތެރިކަން ކަށަވަރުކުރުމަށް ރެގިއުލޭޓް ކުރެވޭނެ ނިޒާމު ހަރުދަނާކުރެއްވުމަށް ކަމަށެވެ.

ހަނޑޫ، ހަކުރު، ފުށަކީ ރާއްޖޭގައި ސްޓޭޕަލް ފުޑް ނުވަތަ ކާޑުގެ ބާވަތްތަކުގެ ގޮތުގައި ޢާއްމުކޮށް ކައިއުޅޭ ބާވަތްތަކެވެ. މި ތަކެއްޗަކީ ބޮޑެތި އަދަދުތަކުން ގަނޑުކޮށް ރާއްޖެ އެތެރެކުރާ ބާވަތްތަކެވެ. ކާޑުގެ ބާވަތްތައް ރައްކާތެރިކުރާ ގުދަންތައް ޗެކްކުރެއްވުމުގެ މަސައްކަތްތައް އެފްޑީއޭއިން މީގެކުރިން ވެސް ކުރަމުއްވަމުން އައިސްފައިވެ އެވެ.

އެހެން ނަމަވެސް އެފަދަ ތަންތަން ރަޖިސްޓްރީކުރުމަށް އަންގާފައި މިވަނީ "ރައްކާތެރިގޮތުގައި ކާބޯތަކެތި ގެންގުޅުމާއި، އެތަކެތި އެއްތަނުން އަނެއްތަނަށް އުފުލުމާއި ގުދަންކުރުމުގައި ޢަމަލު ކުރާނެ ގޮތުގެ މިންގަނޑު" ގެ ދަށުންނެވެ.

މިއީ ކާބޯތަކެތީގެ ރައްކާތެރިކަން ބެލެހެއްޓުމަށް ކުރާ މަސައްކަތުގައި، އެކަން ކަށަވަރުކުރުމަށް އެމްއެފްޑީއޭއިން އެކުލަވާލާފައިވާ މިންގަނޑެކެވެ. މިފަދަ ތަންތަން، 1 އޮގަސްޓްގެ ކުރިން އެ އޮތޯރިޓީގައި ރަޖިސްޓްރީކުރުމަށް ވަނީ އަންގާފަ އެވެ.

އެކަމާއި ގުޅޭގޮތުން އެމްއެފްޑީއޭއިން ބުނީ މިހާރުވެސް ކާޑުގެ ބާވަތްތައް ގުދަން ކުރާ ތަންތަން ބަލަމުންދާ ކަމަށެވެ. އެހެން ނަމަވެސް ރަޖިސްޓްރީ ކުރަން އެންގީ އެފަދަ ތަންތަނުގެ އަދަދުތައް ދެނެގަތުމާއި ބަލާ ފާސްކުރުމަށް ފަސޭހައަކަށް ކަމަށް އެ އިދާރާއިން ވަނީ ބުނެފަ އެވެ.

ކާބޯތަކެތި ގުދަންކުރާ ތަންތަން ބަލާ ޗެކުކުރުމުގެ އުސޫލުގައިވާ ގޮތުން ކޮންމެ 6 މަހުން ނުވަތަ ކަނޑައަޅާ ވަކި މުއްދަތަކުން އެފަދަ ގުދަންތަކުގެ ޙާލަތު ގަވައިދުން ބަލަން ޖެހެއެވެ.

އެގޮތުން ގުދަންތަކުގެ ޖާގައާއި ސާފުތާހިރުކަމާއި އަދި އެތަންތަނުގެ ފިނިހޫނުމިން ފަދަ ކާބޯތަކެތި ގުދަންކުރުމުގައި ރައްކާތެރިކަމުގެ ގޮތުން އަަޅަންޖެހޭ ފިޔަވަޅުތައް އަޅާފައިވޭތޯ ބަލާ ޗެކުކުރަން ޖެހެއެވެ.

އެހެންކަމުން މި މަސައްކަތުގައި މާލެ އާއި އަދި އަތޮޅުތަކުގައި ހުރި ކާޑު ގުދަންތަންވެސް ރަޖިސްޓްރީ ކުރުމަށް ވަނީ އަންގާފައެވެ.