ފަހުވަގުތު ރޮޑްރިގޯ ކާމިޔާބުކޮށްދިން ލަނޑާއެކު ރެއާލް މެޑްރިޑް ދެވަނައަށް!

ސްޕެނިޝް ލަލީގާގައި ރޭ އަމިއްލަ ދަނޑުގައި 2-1 ގެ ނަތީޖާއަކުން ރަޔޯ ވަޔެކާނޯ ބަލިކޮށް ރެއާލް މެޑްރިޑުން ލީގު ތާވަލުގެ ދެވަނައަށް ކުރިއަށް ޖެހިލައިފި އެވެ.

ލީގުގައި ރެއާލް އެންމެ ފަހުން ކުޅުނު މެޗުގައި އެޓީމުގެ ބްރެޒިލް ފޯވާޑް ވިނީޝިއަސް ޖޫނިއަރ ދެކޮޅަށް ވެލެންސިއާ ގެ ސަޕޯޓަރުން ނަސްލީ ގޮތުން ފުރައްސާރަ ކުރި މައްސަލާގައި ވިނީޝިއަސް އާއި އެކު ރެއާލްގެ ކުޅުންތެރިން ތިބިކަން ދެއްކުމުގެ ގޮތުން ރޭގެ މެޗު ފެށުމުގެ ކުރިން އެޓީމުގެ ހުރިހާ ކުޅުންތެރިން ދަނޑަށް ނުކުތީ 20 ނަންބަރު ޖާޒީގައެވެ.

ރޭގެ މެޗުގެ ފުރަތަަމަ ހާފުގައި ރެއާލް އިން ގިނަވަގުތު ބޯޅަ ހިފަހައްޓައިގެން ކުޅުނު ނަމަވެސް ރަގަޅު ފުރުސަތުތަކެއް ތަނަވަސްކުރީ ރަޔޯ ވަޔެކާނޯ އިން އިންނެވެ. އެގޮތުން ފުރަތަމަ ހާފުގައި އެޓީމުން ރެއާލްގެ ގޯލާއި އަމާޒުކޮށް ހަތަރު ހަމަލާއެއް ފޮނުވާލާފައެވެ. ނަމަވެސް ރެއާލުން ފުރަތަަމަ ހާފުގައި ރަޔޯގެ ގޯލާއި އަމާޒުކޮށް ފޮނުވާލި ހަމައެކަނި ހަމަލާގައި އެޓީމުން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ.

ފުރަތަަމަ ހާފުގެ 31 ވަނަ މިނެޓުގައި ރެއާލްގެ އުރުގުއާއީ މިޑްފީލްޑަރު ފެޑްރިކޯ ވަލްވެޑޭ ތަނަވަސްކޮށްދިން ފުރުސަތެއްގައި އެޓީމަށް ލީޑު ހޯދައިދިނީ ކެޕްޓަން ކަރީމް ބެންޒެމާ އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ރެއާލް މެޑްރިޑް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، ރަޔޯ ވަޔެކާނޯ އިން މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ 84 ވަނަ މިނެޓުގައި ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް ތަޖުރިބާކާރު ފޯވާޑް ރައުލް ޑި ތޯމަސް އެވެ.

ރެއާލް މެޑްރިޑް މޮޅުވި ލަނޑު ދެވަނަ ހާފުގެ 89 ވަނަ މިނެޓުގައި ކާމިޔާބުކޮށްދިނީ އެޓީމުގެ ބްރެޒިލް ފޯވާޑް ރޮޑްރިގޯ އެވެ. މިއީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް މިޑްފީލްޑަރު ޑެނިއަލް ސަބެއްލޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިރޭގެ މެޗުން ލިބުނު ތިން ޕޮއިންޓާއެކު 36 މެޗު ކުޅެގެން ރެއާލް މެޑްރިޑަށް 74 ޕޮއިންޓް ލިބިފައިވާއިރު، ޗެންޕިއަން ބާސެލޯނާއަށް 36 މެޗުން ވަނީ 85 ޕޮއިންޓް ލިބިފައެވެ.