ގާސިމަށް ރިޔާސީ ޓިކެޓް ހަވާލުކުރާ ޖަލްސާ އަންނަ މަހު 9 ގައި

ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެންބަރު ގާސިމް އިބްރާހީމަށް ރިޔާސީ ޓިކެޓް އަންނަ މަހު 9 ގައި ހަވާލުކުރާ ގޮތަށް ނިންމައިފި އެވެ.

ޖުމްހޫރީ ޕާޓީން މިއަދު ބުނީ އެ ޕާޓީގެ ރިޔާސީ ކެންޑިޑޭޓް، ގާސިމް އަށް ރިޔާސީ ޓިކެޓް އަރުވަން އަންނަ ޖޫން މަހުގެ 9 ވަނަ ދުވަހު މާލޭގެ ކާނިވާ ސަރަހައްދުގައި ބޮޑު ޖަލްސާއެއް ބޭއްވުމަށް ނިންމާފައިވާ ކަމަށެވެ.

މި ސެޕްޓެމްބަރު މަހުގެ 9 ވަނަ ދުވަހު ބާއްވާ ރިޔާސީ އިންތިހާބުގައި ޖުމްހޫރީ ޕާޓީގެ ފަރާތުން ކެންޑިޑޭޓެއް ނެރުމަށް ނިންމާފައިވަނީ އެ ޕާޓީގެ 151 ވަނަ ބައްދަލުވުމުގައެވެ. އެއަށްފަހު ރިޔާސީ ކެންޑިޑޭޓް ކަނޑައެޅުމަށް ބާއްވާ ޕްރައިމަރީގައި ވާދަ ކުރުމުގެ ފުރުސަތު ހުޅުވާލިއިރު، މުއްދަތުގެ ހަމަވިއިރު ވެސް ގާސިމް ފިޔަވައި އެއްވެސް ބޭފުޅަކު ޕާޓީގެ ޓިކެޓަށް ވާދަ ކުރުމަށް އެދި ހުށަހަޅާފައިނުވެއެވެ. އެހެންކަމުން ޕްރައިމަރީއަކާ ނުލައި ގާސިމަށް ޓިކެޓް ދޭން އެ ޕާޓީން ވަނީ ނިންމައިފަ އެވެ.

ރިޔާސީ އިންތިހާބުގައި ވާދަކުރައްވާނެކަން މިހާތަނަށް އިއުލާންކުރައްވާފައި ވަނީ ރައީސް އިބްރާހިމް މުހައްމަދު ސޯލިހް އާއި އިދިކޮޅު ޕީޕީއެމްގެ ފަރާތުން ކުރީގެ ރައީސް ޔާމީން އަބްދުލްގައްޔޫމް އާއި، ކުރީގެ ބަންޑާރަ ނައިބު ޑރ. މުހައްމަދު މުނައްވަރާއި ކުރީގެ ހޯމް މިނިސްޓަރު އުމަރު ނަސީރާއި، އެމްއެންޕީގެ ފަރާތުން ދަނގެތި ދާއިރާގެ މެންބަރު މުހައްމަދު ނާޒިމްއެވެ.

އިދިކޮޅު އެންމެ ބޮޑު ޕާޓީ ކަމުގައިވާ ޕީޕީއެމުން ރައީސް ޔާމީން ކެންޑިޑޭޓެއް ގޮތުގައި ކަނޑައަޅައި ރިޔާސީ ޓިކެޓް ދީފައިވީ ނަމަވެސް އެމަނިކުފާނު މިހާރު ހުންނެވީ ޖަލު ހުކުމް ތަންފީޒް ކުރައްވަން ޖަލުގައެވެ.