ސަރުކާރުގެ ޕްރޮޕެގެންޑާ ހިންގަން ދައުލަތުގެ މީޑިއާ ހިންގުމަކީ ރަނގަޅުކަމެއް ނޫން: ޢަލީ ހުސެއިން

ސަރުކާރުގެ ޕްރޮޕެގެންޑާ ހިންގާ މެޝިން ތަކެއްގެ ގޮތުގައި ދައުލަތުގެ މީޑިއާ ހިންގުމަކީ ރަނގަޅު ކަމެއް ނޫން ކަމަށް ކެންދޫ ދާއިރާގެ މެމްބަރު ޢަލީ ހުސެއިން ވިދާޅުވެއްޖެއެވެ.

ޢަލީ ހުސެއިން މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.

ދައުލަތުގެ މީޑިއާ ޕީއެސްއެމް އިން ރައްޔިތުންގެ މަޖިލީހުގެ ޖަލްސާ ލައިވް ކުރުން ހުއްޓާލި ޚަބަރު ހިއްސާ ކުރައްވަމުން ޢަލީ ލިޔުއްވާފައިވަނީ ސަރުކާރުގެ  ޕްރޮޕެގެންޑާ  ހިންގާ  މެޝިންތަކެއްގެ  ގޮތުގައި  ދައުލަތުގެ  ވަސީލަތްތައް  ބޭނުންކޮށް،  ރައްޔިތުންގެ  ފައިސާއިން  ޚަރަދު  ކޮށްގެން  ޕަބްލިކް  ސަރވިސް  މީޑިއާ  ހިންގުމަކީ ރަނގަޅު  ކަމެއްނޫން ކަމަށެވެ.

ފަހަކަށް އައިސް ރައްޔިތުންގެ މަޖިލީހުގެ ޖަލްސާތަކުގައި ސަރުކާރަށާއި، ޚާއްސަކޮށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ގިނަ ފާޑުކިޔުންތަކެއް މެންބަރުން އަންނަނީ އަމާޒު ކުރައްވަމުންނެވެ. ޚާއްޞަކޮށް އިޓްލޮސްގެ މައްސަލައާއި، އަދި ފާއިތުވެދިޔަ ދެ ދުވަހު، މަޖިލީހުގެ ރައީސް މުހައްމަދު ރައީސް ނަޝީދަށް ދެވުނު ބޮމުގެ ހަމަލާއާއި ގުޅިގެން ބޮޑެތި ތުހުމަތު ތަކާއި ފާޑުކިޔުއްތައް ރައީސް ޞާލިހަށް އަމާޒުވެ މަޖިލީހުގެ ޖަލްސާތައް މެދު ކަނޑާލަންޖެހޭ ފަހަރުތައްވެސް ވަނީ ގިނަވެފައެވެ.

އެފަދަ ދަނޑިވަޅެއްގައި ދައުލަތުގެ މީޑިއާ ޕީއެސްއެމް ވަނީ އިއްޔެއިން ފެށިގެން މަޖިލީހުގެ ޖަލްސާތައް ލައިވް ނުކުރަން ނިންމާފައެވެ. އެކަމާއި ގުޅިގެން "މިހާރު" ނޫހަށް މައުލޫމާތު ދެއްވަމުން ޕީއެސްއެމްގެ މެނޭޖިން ޑިރެކްޓަރު އަލީ ޚާލިދު ވަނީ އެފަދައިން ކަން ކުރެއްވީ މަޖިލިސް ހޫނުވުމުން މެންބަރުން ބޭނުން ކުރައްވާ ބަސްތަކާއި ގުޅިގެން ކަމަށް ވިދާޅުވެފައެވެ.

އެކަމާއި ގުޅިގެން ގިނަ ބައެއްގެ ފާޑުކިޔުންތަކެއް އަމާޒުވެފައި ވަނިކޮށް ޕީއެސްއެމް އިން މިވަނީ އަނެއްކާވެސް ނިންމުން ބަދަލުކޮށް ޖަލްސާތައް ލައިވް ކުރަން ނިންމާފައެވެ. ނަމަވެސް އެ ނިންމި ސަބަބު ސާފުކުރަން "ވޮއިސް" އިން ޕީއެސްއެމްގެ އެމްޑީ އަލީ ޚާލިދަށް ގުޅިއިރު، ފޯނު ނިއްްވާލާފައި އޮތުމުން ބަހެއް ލިބޭ ގޮތެއް ނުވިއެވެ.