"ޖާބިރާ އެކީގައި އެމްޑީޕީ ބޮޑުވެގެންދާނެ؛ އިންތިޚާބު އެއްބުރުން ކާމިޔާބު ކުރަންވެސް ފަސޭހަ ވާނެ"

ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު އަބްދުالله ޖާބިރު އެމްޑީޕީއާއި ގުޅިވަޑައިގެންނެވުމާއި އެކު އެ ޕާޓީ އިތުރަށް ބޮޑުވެގެން ގޮސްފައިވާ ކަމަށާ، އަދި އޭގެ ސަބަބުން، ރިޔާސީ އިންތިހާބު އެއްބުރުން ކާމިޔާބު ކުރަން އެމްޑީޕީއަށް ފަސޭހަވާނެ ކަމަށް މަޖިލީހުގެ އަލިފުށީ ދާއިރާގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.

މީގެ ކުރިންވެސް އެމްޑީޕީ މެންބަރެއްގެ ގޮތުގައި ހުންނެވުމަށްފަހު، ޑީއާރުޕީ އާއި ގުޅިވަޑައިގެން، އެޕާޓީ އުވާލުމުން މިނިވަން މެންބަރެއްގެ ގޮތުގައި ހުންނެވި ޖާބިރު، އަލުން އެމްޑީޕީއާއި ގުޅި ވަޑައިގެންނެވީ މިއަދުއެވެ.

ޖާބިރު އެމްޑީޕީއާއި ގުޅިވަޑައިގެންނެވުމާއި ގުޅިގެން އޭނާއަށް މަރުހަބާ ދަންނަވައި ވާހަކަދައްކަވަމުން ބިގޭ ވިދާޅުވީ، ޖާބިރު އަކީ މަޖިލީހުގެ މެންބަރުންގެ ތެރެއިންވެސް މަގުބޫލު މެންބަރެއް ކަމަށެވެ. އަދި އޭނާ އެމްޑީޕީއާއި ގުޅިމާއެކު ޕާޓީ ބޮޑުވެގެން ދިޔަ ދިޔުމުގެ ސަބަބުން، ރިޔާސީ އިންތިހާބު އެއްބުރުން ކާމިޔާބު ކުރަން އިތުރަށް ފަސޭހަވެގެންދާނެ ކަމަށް ބިގޭ ވިދާޅުވި އެވެ.

ޖާބިރު އެމްޑީޕީއާއި ގުޅިވަޑައިގަތުމަކީ އަޅުގަނޑުމެން މިކުރާ މަސައްކަތުގައި ލިބުނު ހިތްވަރެއް. ޖާބިރަކީ މަޖިލިސް ބައްލަވާ ގިނަ ބޭފުޅުންގެ ތެރޭގައި ވަރަށް މަގުބޫލު ބޭފުޅެއް. އެހެންވީމާ ޖާބިރާއި އެކުގައި އަޅުގަނޑުމެންގެ ޓީމު އިތުރަށް ބޮޑުވެގެން ދާ ދިޔުމަކީ، އަޅުގަނޑުމެން މި ރިޔާސީ އިންތިހާބު އެއްބުރުން ކާމިޔާބު ކުރުމަށް އަޅުގަނޑުމެންނަށް ލިބުނު ވަރަށް ބޮޑު ހިތްވަރެއް. އަޅުގަނޑު ފުރަތަމަވެސް ޖާބިރަށް އަދި ޖާބިރުގެ ޓީމަށް އެމްޑީޕީީގެ ފަރާތުން، މި އިންތިހާބުގައި އިސްކޮަށް މަސައްކަތް ކުރާ އެކެއްގެ ފަރާތުން ވަރަށް ބޮޑަށް މަރުހަބާ ކިޔަން.

މެންބަރު މުހައްމަދު ރަޝީދު ހުސައިން (ބިގޭ)

މީގެ އިތުރުން، އެމްޑީޕީގެ ރައީސް މުހައްމަދު ނަޝީދު އެ ޕާޓީއާއި ވަކިވުމާއި ގުޅޭގޮތުން ވާހަކަ ދައްކަވަމުން ބިގޭ ވަނީ އެއީ އަހަން ފަސޭހަވި އަޑަކަށް ނުވާ ކަމަށް ވިދާޅުވެފައެވެ. އެހެންނަމަވެސް، ރައީސް ނަޝީދު ވަކިވެވަޑައިގެންނެވުމުގެ ސަބަބުުން އިންތިހާބު ކާމިޔާބު ކުރުމަށް އުނދަގޫ ތަކެއް ނުވާނެ ކަމަށް އޭނާ ވިދާޅުވި އެވެ. އަދި އެމްޑީޕީގެ އަމާޒަކީ ރިޔާސީ އިންތިހާބު އެއްބުރުން ކާމިޔާބު ކުރުން ކަމަށްވެސް އޭނާ ވިދާޅުވި އެވެ.