މޭ އައްޑަނައަކަށް ދިއްކުރައްވައިގެން ރައީސް ޔާމީން އެކުރައްވަނީ ޤައުމީ ޖިހާދެއް: މުޢިއްޒު

މޭ އައްޑަނައަކަށް ދިއްކުރައްވައިގެން ރައީސް ޔާމިން އެކުރައްވަނީ ވަރުގަދަ ޤައުމީ ޖިހާދެއް ކަމަށް މާލެ މޭޔަރު މުޙައްމަދު މުޢިއްޒު ވިދާޅުވެއްޖެއެވެ.

މުޢިއްޒު މިހެން ވިދާޅުވީ ރޭ ބޭއްވި ޕީޕީއެމް ޕީއެންސީ ކޯލިޝަންގެ ހަރުގެ ބައްދަލުވުމެއްގައި ވާހަކަދައްްކަވަމުންނެވެ. މުޢިއްޒު ވިދާޅުވީ ރައީސް ޔާމިނަގް ކެނޑިޑެސީއަށް ސަރުކާރުން ހުރަސް އަޅަމުން އަންނަކަމަށެވެ.

މުޢިއްޒު ވިދާޅުވީ މިވަގުތަކީ އެކަތިގަނޑެއްގެ ގޮތުގައި އެއްއަޒުމެއްގައި އެކުވެރިކަންމަތީގައި ތިބެންވިވަގުތު ކަމަށެވެ. އަދި އެކުވެރިކަމަކީ ގަދަފަދަ ބާރެއްކަމަށް މުޢިއްޒު ވިދާޅުވިއެވެ. މުޢިއްޒުގެ ވާހަކަފުޅުގައި އިތުރަށް ވިދާޅުވީ އެކޯލިޝަންތެރެ ބައިބައި ކުރުމަށް ބަޔަކު މަސައްކަތް ކުރަމުންދާ ކަމަށާއި، އޭގެ ބޭނުމަކީ އެކޯލިޝަންގެ ސަފުތައް ރޫޅާލުން ކަމަށެވެ.

މުޢިއްޒު ވިދާޅުވީ ޕީޕީއެމް އަދި ޕީއެންސީ ކޯލިޝަނާއި އަދި މި ޤައުމުގެ ދުޝްމަނުން ބޭނުންވަނީ އެކަން އެގޮތައް ކުރުމަށް ކަމަށެވެ. އަދި އެކަން އެހެން ވިޔަ ދީގެން ނުވާނެ ކަމަށް މުޢިއްޒު ވިދާޅުވިއެވެ. މުޢިއްޒު ވިދާޅުވީ ހިތްވަރު ލިބިގަންނަންވީ ރައީސް ޔާމިންގެ ކިބައިން ކަމަށާއި، އެމަނިކުފާނު އެކުރައްވަނީ ވަރަށް ވަރުގަދަ ޤައުމީ ޖިހާދެއް ކަމަށެވެ.

"މުޅި ޤައުމުގެ ޙައްޤުގަ މިޤައުމުގެ މުސްތަޤްބަލަށް ޓަކައި، މިޤައުމުގެ މިނިވަންކަމަށް ޓަކައި ރައީސް ޔާމީންގެ މޭ އައްޑަނައަކަށް ދިއްކުރައްވައިގެން ގިނިކަންޏާ އެކުރައްވަނީ ވަރަށް ވަރުގަދަ ޖިހާދެއް"

މުޙައްމަދު މުޢިއްޒު

މުޢިއްޒު ވިދާޅުވީ އަޒުމަކަށް ހަދަންވީ ރައީސް ޔާމިންގެ މަސައްކަތުގައި ބައިވެރިވެގެން އެކަމުގައި މަސައްކަތް ކުރުން ކަމަށެވެ. އަދި ރައީސް ޔާމިން ދައްކަވާ ހިތްވަރުގައި ބައިވެރިވެގެން އެމަސައްކަތުގައި ކުރިއަށް ދިއުންކަމަށްވެސް މުޢިއްޒު ވިދާޅުވިއެވެ.

"އަޅުގަނޑުމެންގެ އަޒުމަށް ގުޑުމެއް އައިސްގެންނުވާނެ، އަޅުގަނޑުމެންގެ އުންމީދު ފަނޑުވެގެންނުވާނެ، އަޅުގަނޑުމެންގެ ހިތްވަރު ބަލިވެގެންނުވާނެ،  އަޅުގަނޑުމެން ތިބެން ޖެހޭނީ ރައީސް ޔާމިން އެދައްކަވާ ހިތްވަރު ހިތްވަރު ލިބިގަނެ އެމަނިކުފާނާއި އެކީގަ" މުޢިއްޒު ވިދާޅުވިއެވެ.

މުޢިއްޒު ވިދާޅުވީ ޤައުމުދެކެ ލޯބިވާ ހުރިހާ ރައްޔުތުންވެސް ކުރަންވި މަސައްްކަތަކީ ރައީސް ޔާމިން އެކުރައްވާ މަސައްކަތުގައި ބައިވެރިވުން ކަމަށެވެ.

އިންތިޚާބަށް ކުޑަ ދުވަސް ކޮޅަކަށް ވެފައި ވާއިރު ރައީސް ޔާމިންގެ ކެނޑިޑެސީ ފޯމު ފުރައި އީސީ އަށް ހުށައެޅުމުގެ މަސައްކަތް ޕީޕީއެމް ޕީއެންސީ ކޯލިޝަނުން އަންނަނީ ކުރަމުންނެވެ. އެކޯލިޝަނުންވެސް އަދި ރަނިންމޭޓެއްގެ ނަން އިޢުލާނު ކޮށްފައެއް ނުވެއެވެ.