ޢަރަބިއްޔާ ދަރިވަރުންނަށް އަނެއްކާވެސް ވަގުތީ ޢިމާރާތެއް
އަލްމަދްރަސަތުލް އަރަބިއްޔަތުލް އިސްލާމިއްޔާގެ ދަރިވަރުން މިފެށޭ ދިރާސީ އަހަރުގެ ކިޔެވުމަށް ބޭނުން ކުރުމަށް ދަރުމަވަންތަ ސްކޫލްގެ ވަގުތީ ޢިމާރާތް ހަމަޖައްސައިފިއެވެ.
ދަރުމަވަންތަ ސްކޫލުގެ ވަގުތީ ޢިމާރާތަށް ޢަރަބިއްޔާ ސްކޫލު ބަދަލުކުރުމާ ގުޅިގެން އެ ޢިމާރާތުގައި ކުރިން ހުރި ނޫކުލަ، ޢަރަބިއްޔާ ސްކޫލުގެ ކުލަ ކަމަށްވާ ފެހި ކުލައަށް ބަދަލު ކުރުމުގެ މަސައްކަތް ދަނީ ކުރަމުންނެވެ.
މީގެ ނުވަ އަހަރު ކުރިން ބޭނުންކުރަން ފެށި ޢަރަބިއްޔާގެ އައު ޢިމާރާތުގެ ތަނބުތަކުގައި ވަރަށް ބޮޑަށް ރެނދުލައި، ގެއްލުން ވެފައި ހުރުމުން މިދިޔަ އަހަރުގެ ޖެނުއަރީ މަހުން ފެށިގެން އެ ސްކޫލްގެ ވަގުތީ އިމާރާތަކަށް ސަރުކާރުން ހަމަޖައްސައިދިނީ ފޮރިން މިނިސްޓްރީ ވަގުތީ ގޮތުން ހިންގި ޢިމާރާތެވެ.
ޢަރަބިއްޔާ ސްކޫލުގެ އާ ޢިމާރާތް އެޅުމަށް ބާޖަމާލުއްދީން ސްކޫލު ކުރިން ހިންގި ބިން ހަމަޖައްސާފައިވާއިރު އެ ޢިމާރާތް އެޅުމަށް ވަނީ އަމީން ކޮންސްޓްރަކްޝަންއާ ހަވާލުކޮށްފައެވެ.
420 ދުވަހުގެ ތެރޭގައި ނިންމުމަށް، އަމީން ކޮންސްޓްރަކްޝަނާ މިދިޔަ އަހަރުގެ ނޮވެމްބަރު މަހު ހަވާލުކޮށްފައިވީ ނަމަވެސް ބިން ސާފު ކުރުން ފިޔަވާ އިތުރު އަމަލީ މަސައްކަތެއް ފަށާފައި ނުވެއެވެ.
މި މަޝްރޫއު ހިންގުމަށް ޖުމްލަ 168 މިލިއަން ރުފިޔާގެ ބަޖެޓެއް ސަރުކާރުން ވަނީ ކަނޑައަޅާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
