ބައެއް މެންބަރުން އެބޭފުޅުން ބޭނުން މީހުންނަށް އީސީން ވަޒީފާ ދިނުމަށް އެދޭ: ފުއާދު
އިލެކްޝަންސް ކޮމިޝަން (އީސީ)ގެ ބައެއް މެންބަރުން، އެ ބޭފުޅުންގެ އާއިލާގެ ބޭފުޅުންނަށް އެ ކޮމިޝަނުން ވަޒީފާ ދެއްވުމަށް އެދޭ ކަމަށާ، އެހެން ނަމަވެސް ކަނޑައެޅިފައިވާ އުސޫލާއި ޚިލާފަށް އެކަން ނުކުރައްވާނެ ކަމަށް މެންބަރުންނަށް އަންގަވާފައި ވާނެ ކަމަށް އީސީގެ ރައީސް ފުއާދު ތައުފީގު ވިދާޅުވެއްޖެއެވެ.
"ވޮއިސް" އަށް ދެއްވި ޚާއްސަ ބަސްދީގަތުމެއްގައި ފުއާދު ވަނީ، އީސީގެ ބައެއް މެންބަރުން އޭނާ އާއި މެދު ނުރުހުންވާ ސަބަބުތައް ކަމަށް ލަފާކުރެވޭ ސަބަބުތަކުގެ ތަފްސީލް ދެއްވާފައެވެ.
އެގޮތުން، ފުއާދު ވިދާޅުވީ، އޭނާ އަކީ އިލެކްޝަންސް ކޮމިޝަންގެ ގަވާއިދާއި އުސޫލުން ބޭރުން އެއްވެސް ކަމެއް އޭނާ ނުކުރައްވާނެ ކަމަށް ކޮމިޝަންގެ ހުރިހާ މެންބަރުންނަށްވެސް އަންގަވާފައިވާނެ ކަމަށެވެ. އޭގެ މިސާލެއްގެ ގޮތުގައި އޭނާ ނެންގެވީ، އޭނާގެ އާއިލާގެ މެންބަރުންނަށް ކޮމިޝަނުން ވަޒީފާ ދީފައި ނުވާކަމެވެ.
ފުއާދު ވިދާޅުވީ ކޮމިޝަންގެ ގަވާއިދުގައި ވާގޮތުން އެ ކޮމިޝަންގެ މެންބަރުންގެ ދެބެންގެ ދެދަރި މީހުންނަށްވުރެ ގާތް މީހުންނަށް އެތަނުން ވަޒީފާ ނުދެވޭ ކަމަށެވެ. އަދި އޭނާގެ ދެބެންގެ ދެދަރި އަށްވުރެ ދުރުތާ ތިމާގެ މީހުންނަށްވެސް އެތަނުން ވަޒީފާ ދީފައި ނުވާނެ ކަމަށާ، އެހެންނަމަވެސް ކޮމިޝަންގެ ބައެއް ބޭފުޅުން އެ ބޭފުޅުން ބޭނުން މީހުންނަށް ވަޒީފާ ދިނުމަށް އެދިފައިވާ ކަމަށް ފުއާދު ވިދާޅުވި އެވެ.
އަޅުގަނޑު މި ހިފަހަށްޓާ ހަމަތަކަކީ ބައެއްފަހަރު ބައެއް ބޭފުޅުންނަށް ގަބޫލުކުރަން އުދަނގޫ ކަންތައް ތަކަށްވޭ. އެހެންވީމާ އަޅުގަނޑު މިކަހަލަ އުސޫލުތަކެއް ހިފަހައްޓާތީވެ ބައެއް ބޭފުޅުންނަށް އުނދަގޫވާނެ އެބޭފުޅުންގެ އާއިލާގެ ބޭފުޅުން ގެންނާން އަޅުގަނޑު އެއްބަސް ނުވާތީ. އަޅުގަނޑު އެއްބަހެއް ނުވާނަން.
ފުއާދު ތައުފީގު
މިއާއެކު ފުއާދު ވިދާޅުވީ އާއިލާ މީހުންނަށް ނުވަތަ އެހެންވެސް މީހަކަށް ވަޒީފާ ދިނުމަށް އެދުމުން، ވެސް އެކަން އޮންނަ އުސޫލުގެ ކަންކަން ގެންދިޔުމަށް އޭނާ އެދިފައި ވާނެ ކަމަށެވެ.
ބައެއް ފަހަރު ބައެއް ބޭފުޅުން އެކިއެކި މީސް މީހުން ގެނައުމާއި ބެހޭގޮތުން ވާހަކަ ދެއްކެވީމަ އަޅުގަނޑު ބުނަން، ގަވާއިދުން ސިޓީ ލައްވައިގެން، އެ އޮންނަ އުސޫލުތަކުގެ ތެރެއިން އިންޓަވިއުކުރެވިގެން، ހޮވިގެން އަންނަންޏާ އަންނަންވީއޭ. ސިޓީލެއްވުން އޯކޭއޭ. އެހެންނަމަވެސް މިތަނުގެ އެއްވެސް މެންބަރެއްގެ ނުވަތަ މުވައްޒަފެއްގެ ދެބެންގެ ދެދަރި މީހަކަށްވުރެ ކައިރި މީހަކަށް މިތަނަކުން ވަޒީފައެއް ނުދެވޭނެ ގަވާއިދު ހަދާފައި ހުންނަ ގޮތުން. ބައެއް މެންބަރުންގެ ދެބެންގެ ދެދަރި މީހުން އެބަތިބި މިތަނުގައި ވަޒީފާ ގައި. އެކަމަކު އަޅުގަނޑުގެ ނުތިބޭނެ.
ފުއާދު ތައުފީގު
ރިޔާސީ އިންތިހާބު ބޯމަތި ވެފައި ވަނިކޮށް، އީސީގެ އެތެރޭގައި ވަނީ ގިނަ ހަމަނުޖެހުން ތަކެއް އުފެދިފައެވެ. އެއާއެކު އީސީގެ 4 މެންބަރުންގެ ތެރެއިން 3 މެންބަރުންގެ އަގުލަބިއްޔަތުން ވަނީ ފުއާދު ތައުފީގު ގެ އިތުބާރު ނެތް ކަމުގެ ވޯޓެއްވެސް ނަގާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
