"ގޭތެރޭގައި ދަރިންނަށް ރަނގަޅު ނަމޫނާ ނުދައްކައިފި ނަމަ އެކުދިން ވާނީ ހަލާކު ކުރުވަނިމި ހަތިޔާރަކަށް"

ގޭތެރެއިން ކުދިންނަށް ރިވެތި ނަމޫނާ ނުފެންނަ ނަމަ، އެކުދިން ވާނީ ހަލާކު ކުރުވަނިވި ހަތިޔާރަކަށް ކަމަށް މިއަދުގެ ހުތުބާގައި ބުނެފިއެވެ.

"ހެޔޮ ނަމޫނާގެ ބޭނުންތެރިކަން" މި މައުޟޫއަށް މިއަދު އިއްވި ޚުތުބާގައި ބުނީ، މުސްލިމުންގެ ޝަޚުޞިއްޔަތު އޭގެ މަތީގައި ގާއިމް ވެފައިވާ ތަނބުތަކުގެ ތެރޭގައި ރިވެތި ނަމޫނާ ހިމެނޭ ކަމަށެވެ.

އަދި އަހަރުމެންގެ ދަރީންނަކީ މާތް الله އަހަރުމެންނާއި ހަވާލުކޮށްފައިވާ އަމާނާތަކަށް ވާއިރު، އެކުދިންނަށް ލިބިގެންވާ ރިވެތި ނަމޫނާއަކަށް އަހަރެމެން ވާންޖެހޭކަން ފާހަގަކޮށް ޚުތުބާގައި ބުނީ ޒުވާނުންނަށް މިއަދު ކުރިމަތިވެފައިވާ މައްސަލަތަކުގެ ތެރޭގައި އަހަރުމެންގެ ކިބައިން އެކުދީންނަށް ހެޔޮ ނަމޫނާ ނުފެނުން ހިމެނޭ ކަމަށެވެ.

"ޒުވާނުންނާ މިއަދު ކުރިމަތިވެފައިވާ މަސްއަލަތަކުގެ ތެރޭގައި އަހަރެމެންގެ ކިބައިން ކުދިންނަށް ހެޔޮ ނަނޫނާ ނުފެނުން ވެއެވެ. ރިވެތި ނަމޫނާއިން ތަރުބިޔަތު ދިނުމުގެ ހެޔޮކަން، ވައުޟު ނަސޭހަތުން ތަރުބިޔަތު ދިނުމަށްވުރެ، އެތައް ގުނައެއް މޮޅެވެ. އަވަށްޓެރިންނާ ޒުވާބުކޮށް، އަރާރުންވާ މީހާ އޭނާގެ ދަރިން ގާތުގައި އަވަށްޓެރިންނަށް ކަމޭހިތާށޭ ބުނާނީ ކިހިނަކުން ހެއްޔެވެ؟ ނަމޫނާއަކާ ނުލައި، ތަރުބިޔަތެއް ދެވިދާނެ ހެއްޔެވެ؟ ހުރިހާކަމެއްގެ ވެސް އަސާސަކީ ނަމޫނާއެވެ." ޚުތުބާގައި ބުނެފައިވެއެވެ.

މިއާއެކު ޚުތުބާގައި ބުނީ ގޭތެރެއިން ދަރިންނަށް ހެޔޮ ނަމޫނާ ނުދައްކައިފިނަމަ އެމީހުން ވާނީ ހަލާކު ކުރަނިވި ހަތިޔާރަކަށް ކަމަށެވެ. އަދި މުދައްރިސުންގެ ކިބައިން ހެޔޮ ނަމޫނާ ނުފެންނަ ނަމަ އެކުދީންނަށް ލިބޭނީ ފާސިދު ތަރުބިއްޔަތެއް ކަމަށްވެސް ބުނެފައިވެއެވެ.

ގޭތެރެއިން ދަރިންނަށް ހެޔޮ ނަމޫނާ ނުދައްކައިފިނަމަ، އެމީހުން ވާނީ ހަލާކު ކުރުވަނިވި ހަތިޔާރަކަށެވެ. މުދައްރިސުންގެ ކިބައިން ހެޔޮ ނަމޫނާ ނުފެންނަ ނަމަ، އެ ކުދިންނަށް ލިބޭނީ ފާސިދު ތަރުބިއްޔަތެކެވެ. އެކުދިންނަށް ކިޔަވައިދޭ ތަކެއްޗާ އެއްގޮތަށް އެދުރުން އަމަލު ނުކުރާ ނަމަ އެކުދިން ބޮޑުވާނީ ކަތި ބިންގަލެއްގެ މަތީގައެވެ. އަހަރެމެންގެ އެދުރުންނަކީހަމައެކަނި މަޢުލޫމާތު ފޯރުކޮށްދޭ މެޝިންތަކަމަށް ވެގެން ނުވާނެއެވެ.

ޚުތުބާ

މިއާއެކު ޚުތުބާގައި ބުނީ، ވެރީންނާއި، މައިންބަފައިންނާއި، މުދައްރިސުންނާއި މުރައްބީން ހެޔޮ ނަމޫނާއަކަށް ވެއްޖެނަމަ ގައުމުގެ ކުރިމަގު އުޖާލާވެ ދުނިޔެއާއި އާހިރަތް ބާއްޖަވެރިވާނެ ކަމަށެވެ.

ވިސްނާނުލާ އެއްވެސް ނަމޫނާއެއް ނަކަލު ނުކުރުމަށް ޒުވާނުންނަށް ނަސޭހަތްތެރިވަމުންނެވެ.