ދަރުބާރުގެ އާއި އީސީ އޮފީސް ސަރަހައްދުގައި ކެމްޕޭން ބެނާ ނުދަމަން އަންގައިފި
ދަރުބާރުގެއާއި އިލެކްޝަންސް ކޮމިޝަން ސަރަހައްދުގައި ރިޔާސީ އިންތިހާބާ ގުޅޭ ކެމްޕޭން ބެނާ ނުދަމަން އިލެކްޝަންސް ކޮމިޝަން (އީސީ)ން އަންގައިފިއެވެ.
އިލެކްޝަންސް ކޮމިޝަންގެ ނާއިބު ރައީސް އިސްމާއިލް ހަބީބް ކުރެއްވި ޓުވީޓެއްގައި ވިދާޅުވީ އިންތިހާބީ މައި މަރުކަޒު (ދަރުބާރުގެ) އަދި ޕޯޓް ކޮމްޕްލެކްސް އިމާރާތުގައި ހުންނަ، އިލެކްޝަންސް ކޮމިޝަނުގެ މައި އޮފީހުގެ ކުރިމައްޗަށްވާ ގޮތަށާއި، އިންވެގެންވާ މަގުތަކާއި، ގޯޅިތަކުގައި އެއްވެސް ޕާޓީއެއްގެ އަދި އެއްވެސް ކެންޑިޑޭޓެއްގެ ކެމްޕޭން ދިދައާއި ބެނާ ދެމުމާއި ޕޯސްޓަރު ހަރުކުރުން ފަދަ ކަންކަން ނުކުރަން ހުރިހާ ޕާޓީތަކަށް އަންގާފައިވާ ކަމަށެވެ.
އަދި މިހާރު ހަރުކުރެވިފައިވާ އެފަދަ ތަކެތި ވީހާ އަވަހަކަށް ނެގުމަށް އަންގާފައިވާ ކަމަށްވެސް ހަބީބް ވިދާޅުވިއެވެ.
މިއާއެކު ހަބީބު ވިދާޅުވީ އާންމު ތަންތަނާއި، އަމިއްލަ މީހުންގެ ޢިމާރާތްތަކުގައި، ކެމްޕޭން މެޓީރިއަލްސް ދެމުން، ހަރުކުރުން ނުވަތަ ތަތްކުރުމުގެ ކުރިން ކައުންސިލްތަކުން ނުވަތަ އެ ޢިމާރާތެއްގެ ވެރިފަރާތުގެ ހުއްދަ ހޯއްދެވުމަށްވެސް އީސީ އިން ކެންޑިޑޭޓުންނަށާއި ޕާޓީތަކަށް އިލްތިމާސްކުރާ ކަމަށެވެ.
ކެމްޕޭން މެޓީރިއަލްސް ދެމުން، ހަރުކުރުން ނުވަތަ ތަތްކުރުމުގެ ކުރިން ކައުންސިލްތަކަށް އަންގަން އިލެކްޝަންސް ކޮމިޝަނުން އެފަދައިން އަންގާފައިވާއިރު، އެ ހުއްދަ ނުނަގައި، މާލޭގެ ބޮޑުތަކުރުފާނު މަގުގައި އިންދާފައިވާ ކަދުރު ރުއްތަކުގައި ކެމްޕޭން ބެނާތައް ދަމާފައިވާތީ ކަދުރު ރުއްތަކަށް ގެއްލުން ލިބެމުންދާ ކަމަށް މާލެ ސިޓީ ކައުންސިލުންވެސް ވަނީ ބުނެފައިވެއެވެ.
އަދި ކެމްޕެއިންގެ އެއްވެސް ބެނަރ އެއް ނުވަތަ ދިދަފައްޗެއް ކަމުގައި ވީނަމަވެސް ކަދުރު ރުއްތަކުގައި ހަރު ނުކުރުމަށާއި އޮންނަ އުޞޫލުގެ ތެރެއިން ހުއްދަ ނަންގަވައިގެން ހޮޅިދަނޑީގައި ބެނަރ އަދި ދިދަފަތި ދެމުމަށް ވެސް އެ ކައުންސިލުން ވަނީ އެދިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
