އިންޑިޔާއާއި ދެކޮޅަށް ފަތުރަނީ ނުރައްކާތެރި ޕްރޮޕެގެންޑާ ތަކެއް؛ ރާއްޖޭގެ ސަލާމަތަށްވެސް އަސަރުކުރާނެ: ޝަރީފު

ރިޔާސީ އިންތިހާބުގައި ވާދަކުރައްވާ ކެންޑިޑޭޓުންގެ ތެރެއިން ހަނި ވިސްނުން ގެންގުޅޭ ލީޑަރުން ތަކެއް، އަވަށްޓެރި އިންޑިޔާއާއި ގުޅިގެން ނުރައްކާތެރި ޕްރޮޕެގެންޑާ ތަކެއް ފަތުރަމުންދާ ކަމަށާ، އޭގެ ސަބަބުން ދިވެހިރާއްޖޭގެ ސަލާމަތަށް ނުރައްކާވާނެ ކަމަށް މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާ ޝަރީފު) ވިދާޅުވެއްޖެއެވެ.

ރިޔާސީ ކެންޕެއިންގެ ތެރެއިން، އަދުގެ ސަރުކާރާއި އިންޑިއާ އާއި ދެމެދު އޮންނަ ގުޅުމަށް ބައެއް ކެންޑިޑޭޓުން ފާޑުވިދާޅު ދައްކަވަމުންދާ ވާހަކަތަކާއި ގުޅިގެން ކަންބޮޑުވުން ފާޅުކުރައްވައި މަވޯޓާ ޝަރީފު ކުރެއްވި ޓުވީޓެއްގައި ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ އިދިކޮޅު އެއްވެސް ކެންޑިޑޭޓެއްގެ ހަމަހަމަ ހަރުދަނާ ޚާރިޖީ ސިޔާސަތެއް ނެތް ކަމަށެވެ.

އަދި ކެންޑިޑޭޓުންގެ ހަމައެކަނި ކުރަމުންދާ މަސައްކަތަކީ ރާއްޖެއާއި އިންޑިޔާއާ ދެމެދު އޮތް ގާތް ގުޅުން ފުނޑުފުނޑު ކޮށްލަން ކުރާ މަސައްކަތް ކަމަށްވެސް އޭނާ ވިދާޅުވި އެވެ.

ޝަރީފު ވިދާޅުވީ، އެ ކެންޑިޑޭޓުން، ދިވެހި ޤައުމިއްޔަތުގެ ނަމުގައި އިންޑިޔާ އާއި ދެކޮޅަށް ފަތުރަމުންދާ ޕްރޮޕެގެންޑާގެ ސަބަބުން އިންޑިޔާ އާއި ރާއްޖެ އާއި ދެމެދު އޮންނަ ގުޅުން ހީނަރު ވުމުގެ އިތުރުން، އެކަމުގެ ނޭދެވޭ އަސަރު، ސަރަހައްދީ ހަމަޖެހުމާއި، ސަލާމަތާއި، އަދި ކުރިއެރުމަށްވެސް ކުރާނެ ކަމަށެވެ.

އަދި އެފަދަ ހަނި ވިސްނުންތަކެއް ގެންގުޅޭ ސިޔާސީ ލީޑަރުންތަކެއް ދިވެހިރާއްޖޭގެ ވެރިކަމަށް އައުމަށް މަސައްކަތްކުރަމުންދިއުމަކީ ހިތާމަވެރިކަމެއް ކަމަށާ، އެ ބޭފުޅުން ގެންދަނީ ނުރައްކާތެރި ވިސްނުންތަކެއް ފަތުރަމުންކަމަށްވެސް އޭނާ ވިދާޅުވި އެވެ.

މިއާއެކު، ވަގުތީ ސިޔާސީ ބޭނުމެއްގައި، ދިވެހިރާއްޖޭގެ އެންމެ ވަރުގަދަ އިގްތިސާދީ ބައިވެރިޔާ އަދި ތަރައްގީއަށް އެހީތެރިކަން ފޯރުވަމުންދާ ގައުމާއި ދެކޮޅަށް، އިދިކޮޅު ކެންޑިޑޭޓުން ފަތުރަމުން ދަނީ ނުރައްކާތެރި ވާހަކަތަކެއް ކަން ފާހަގަކުރައްވައި ޝަރީފް ވަނީ އޭގެ ސަބަބުން ދިވެހިރާއްޖޭގެ އިގްތިސާދާއި ސަލާމަތައްވެސް ބޮޑެތި އަސަރުތަކެއް ކުރުމުގެ ފުރުސަތު އޮތްކަމަށް ވިދާޅުވެފައެވެ.