ސޮވެރިން ފަންޑަށް އަލުން ޑޮލަރު ޖަމާކޮށް، ފަންޑު ހިމާޔަތް ކުރަން ގާނޫނެއް ހަދާނަން: ޑރ.މުއިއްޒު

ކުރީގެ ރައީސް އަބްދުالله ޔާމީން އަބްދުލްގައްޔޫމް ގެ ވެރިކަމުގައި އުފެއްދެވި ސޮވެރިން ޑިވެލޮޕްމެންޓް ފަންޑް (އެސްޑީއެފް) އަށް އަލުން ޑޮލަރު ޖަމާކުރައްވައި އެ ފަންޑު ރައްކާތެރި ކުރަން ގާނޫނެއް ހަދާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް، މާލޭ ސިޓީ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.

ދިވެހީންގެ އިޤްތިސާދު މެނިފެސްޓޯ އާންމު ކުރަމަށް ރޭ މޫނިމާ ބިލްޑިންގައި ބޭއްވި ޖަލްސާގައި ވާހަކަދައްކަވަމުން މުއިއްޒު ވިދާޅުވީ މި ވެރިކަމުގެ ކުރިން ދީޔަ ވެރިކަން ތަކުގައި، ޖުމުލަ 40 އަހަރުގެ ތެރޭގައިވެސް ޗާޕުކޮށްފައި ވަނީ 6 ބިލިއަން ރުފިޔާ ކަމަށެވެ. އެހެން ނަމަވެސް، ހަމައެކަނި މި ފަސް އަހަރުގައިވެސް 8 ބިލިއަން ޗާޕުކޮށްފައިވާ ކަމަށް މުޢިއްޒު ވިދާޅުވިއެެވެ. އޭގެ ނަތީޖާއެއްގެ ގޮތުން ފައިސާ ގިނަވެ، ޑޮލަރުގެ އަގު ވެއްޓިގެންގޮސް ތަކެތީގެ އަގުވެސް މަތި ވެގެން ގޮސްފައިވާ ކަމަށް އެމަނިކުފާނު ވިދާޅުވި އެވެ.

މީގެ އިތުރުންވެސް މުޢިއްޒު ވަނީ ކުރީގެ ރައީސް ޔާމީން އަބްދުލްގައްޔޫމްގެ ވެރިކަމުގައި އިގްތިސާދީ ހާލަތު އޮތް ގޮތާއި މިހާރު އޮތް ގޮތުގެ މައްޗަށް އަލިއަޅުވާލައްވައި، އަލުން އަނބުރާ ކުރިން އޮތް ވަރަށް އިއާދަކުރެއްވުމަށް އެމަނިކުފާނު ގެންގުޅުއްވާ ޕްލޭންގައި ހިމެނޭ ގިނަ ކަންކަން ހިއްސާ ކުރައްވާފައެވެ.

"މި ސަރުކާރުގެ ވޭތުވެ ދިޔަ ފަސް އަހަރު ނިމޭއިރު ބަޖެޓް ޑެޕޮސިޓް މިހިރީ 15 އިންސައްތައިގައި. އަޅުގަނޑުމެންގެ މި އިޤްތިސާދީ މަސައްކަތް ކުރިޔަށް ގެންގޮސް ނިންމާއިރު އިރާދަކުރެއްވިއްޔާ އެވްރެޖްކޮށް އަޅުގަނޑުމެންގެ ބަޖެޓް އެފްސީޑީ ސިންގަލް ޑިޖިޓަށް ކުޑަކުރާނަން." މުއިއްޒު ވިދާޅުވިއެވެ.

މުޢިއްޒު ވިދާޅުވީ ޑޮލަރުގެ އެކްސްޗޭންޖު ރޭޓުވެސް މިހާރު މައްޗަށްގޮސް 18 ރުފިޔާއާއި ހަމައަށް ގޮސްފައިވާ ކަމަށާއި އެ ރޭޓުވެސް ތިރިކޮށް އެއް ހަމައެއްގައި ހިފަހައްޓައިދެއްވާނެ ކަމަށެވެ. އަދި މި ސަރުކާރުން މަރުކަޒީ ބޭންކް (އެމްއެމްއޭ)ގެ ރިޒާވް އިންވެސް 130 މިލިއަން ޑޮލަރު ހުސްކޮށްފައިވާ ކަމަށާ، އެހެންކަމުން އެމަނިކުފާނުގެ ފަސް އަހަރުގައި އެމްއެމްއޭގެ ރިޒާވް އިތުރުކޮށް ކުރިއަށްވުރެ މައްޗަށް ގެންދާނެ ކަމަށް ވެސް މުޢިއްޒު ވިދާޅުވިއެެވެ.

މީގެ އިތުރުން، މުޢިއްޒު ވިދާޅުވީ ރައީސް ޔާމީންގެ ސަރުކާރުގައި އުފައްދާފައިވާ އެސްޑީއެފް ފަންޑުގައި އެމަނިކުފާނުގެ ސަރުކާރު ނިމުނުއިރު ޑޮލަރު ހުރި ނަމަވެސް މި ސަރުކާރުން އެ ޑޮލަރު އެކި ބޭނުންތަކަށް ނަގައި އެ ފެންޑަށް ދިވެހި ރުފިޔާ ޖަމާކުރަން ފަށާފައިވާ ކަމަށެވެ. އަދި ސަރުކާރުން ދަނީ އެ ފައިސާވެސް އެކި ކަންކަމުގައި ބޭނުންކުރަމުން ކަމަށެވެ.

""އަނެއްކާވެސް އަޅުގަނޑުމެން އެސްޑީއެފްގައި ޖަމާކުރާނީ ޑޮލަރުން. ޑޮލަރު އެއާޕޯޓަށް ލިބޭ ޑޮލަރާ ޓޫރިޒަމް ސެކްޓާއިންނާ އެކި ގޮތް ގޮތުން އަޅުގަނޑުމެން ގާނޫނެއް ހަދައިގެން، ގާނޫނީ ބާރުވެރިކަމާއެކީގައި އެސްޑީއެފް ހިމާޔަތްކޮށްގެން އެއަށް ޑޮލަރު ލިބޭނެ އިތުރު ގޮތްތަކެއް ކަނޑައަޅައިގެން، އެސްޑީއެފްއަކީ މަހުން މަހަށް ގިނަ އަދަދެއްގެ އާމްދަނީ ޖަމާވާ ފަންޑަކަށް ހަދާނަން،"."

ޑރ. މުހައްމަދު މުޢިއްޒު

މިއާއެކު ޑރ. މުޢިއްޒު ވަނީ 2026 އާ ހަމަޔަށްދާއިރަށް ރާއްޖޭގެ ދަރަނިތައް މެނޭޖް ކުރާނެ ގޮތްތަކެއް ކަނޑައަޅުއްވާފައިވާ ކަމަށެވެ.

އޭގެ ތެރެއިން އެއް ކަމެއްގެ ގޮތުގައި ރައީސް ޔާމީންގެ ސަރުކާރުގައި ހުރި ހިސާބަށް ރާއްޖޭގެ ކްރެޑިޓް ރޭޓިންގ ގެންދާނެ ކަމަށް ވިދާޅުވިއެވެ.

"މިހާރު ރާއްޖޭގެ ކްރެޑިޓް ރޭޓިންގ ވަރަށް ދަށްކޮށް އޮތީ، އެ ކްރެޑިޓް ރޭޓިންގ 2016 ގައި ހުރި ހިސާބަށް ގެންދަން އަނބުރާ." މުއިއްޒު ވިދާޅުވިއެވެ.

ދަރަނި އަދާކުރުމަށްޓަކައި ކްރެޑިޓް ރޭޓް މަތިކޮށް އިންވެސްޓަރ ކޮންފިޑެންސް އަނބުރާ ގެނެސް ލޯންތައް ރީ ފައިނޭންސް ކުރާނެ ކަމަށާއި އޭރުން ލޯންތައް އަދާކުރުމުގައި މާބޮޑު އުނދަގުލެއް ނާންނާނެ ކަމަށް މުއިއްޒު ވަނީ ވިދާޅުވެފައެވެ.