އިޒްރޭލު ޕާސްޕޯޓް 'ބޭން' ކޮށް، އެތަނުގެ މުދާ އެތެރެ ކުރުން މަނާކުރާ ގާނޫނެއް ހަދަން ޔާސިރު ހުށަހަޅުއްވައިފި!
ހައްދުފަހަނައަޅާފައިވާ އިސްރާއީލްގެ ސިފައިން ފަލަސްޠީނުގައި ހިންގަމުންދާ ޖަރީމާތައް ކުށްވެރިކޮށް ބަޔާން ނެރުމުގެ އިތުރުން، އިސްރާއީލް ގެ ޕާސްޕޯޓް ބޭން ކޮށް، އެމީހުންގެ މުދާ ރާއްޖެ އެތެރެކުރުން މަނާކުރަން ގާނޫނެއް ހެދުމަށް ކުޅުދުއްފުށި އުތުރު ދާއިރާގެ މެމްބަރު ޔާސިރު އަބްދުލް ލަތީފު ހުށަހަޅުއްވައިފި އެވެ.
އިޒްރޭލުން ފަސްލަތީނުގެ ބިންތައް ފޭރިގަނެ އެ ގައުމުގެ ރައްޔިތުންނަށް ދެމުންދާ އުދުވާނީ ހަމަލާ ކުށްވެރިކޮށް އެކަމުގެ ފިޔަވަޅު އެޅުމުގެ ގޮތުން އިޒްރޭލުން ދިވެހިރާއްޖެއަށް މުދާ އެތެރެކުރުން މަނާކުރުމާއި ޓޫރިސްޓުން ރާއްޖެއަށް ޒިޔާރަތް ކުރުން މަނާ ކުރަން ވިލިނގިލީ ދާއިރާގެ މެންބަރު ސައުދު ހުސައިން ހުށަހެޅުއްވި ގަރާރަށް ބަހުސް ކުރައްވަމުން ޔާސިރު ވިދާޅުވީ، އިސްރާއީލު މައްސަލާއި މިހާތަނަށް ކުރެވިފައިވާ ހަމައެކަނި މަސައްކަތް ތަކަކީ އެމީހުންގެ ލާއިންސާނީ ޢަމަލުތައް ކުށްވެރި ކުރުމާއި، އެ ޢަމަލުތައް ހުއްޓާލުމަށް ގޮވާލުމުގެ މަސައްކަތް ކަމަށެވެ.
ފަލަސްޠީން މައްސަލައަކީ ހަމައެކަނި ދީނީ މައްސަލައެއް ނޫން ކަން ފާހަގަކުރައްވައި ޔާސިރު ވިދާޅުވީ އެއީ މުޅި އިންސާނިއްޔަތާއި ގުޅުންހުރި މައްސަލައެއް ކަަމަށެވެ. އަދި އެއީ މިވަގުތު މުޅި ދުނިޔޭގައި ވެސް ހިންގަމުންދާ ނަސްލު ނައްތާލުމުގެ އެންމެ ބޮޑު ޖަރީމާ ކަމަށް އޭނާ ވިދާޅުވި އެވެ.
އެހެންކަމުން ހަމައެކަނި އިޒްރޭލު ކުށްވެރިކޮށް ބަޔާންތައް ނެރުމުގެ ބަދަލުގައި ދެން ކުރެވެން އޮތް ކަންކަން ބަލައި އެކަންކަން ކުރަންޖެހޭ ކަމަށް ޔާސިރު ވިދާޅުވިއެވެ. އެގޮތުން އިޒްރޭލުގެ ޕާސްޕޯޓު ބޭން ކުރުމާއި އެގައުމުގެ މުދާ ރާއްޖެ އެތެރެ ކުރުން މަނާ ކުރަން ގާނޫނެއް ހަދަން އޭނާ ވަނީ ހުށަހަޅުއްވާފައެވެ.
"އަޅުގަނޑު ގަބޫލުކުރާ ގޮތުގައި އެއްކޮށް ގަރާރަކުން މިކަން ކުރުމުގެ ބަދަލުގައި ތަންކޮޅެއް ސޮލިޑް މަސައްކަތެއް މިވަގުތު ކުރުމަކީ އަޅުގަނޑު ގަބޫލުކުރާ ގޮތުގައި ކުރަންޖެހޭ ކަމެއް. އެގޮތުން ރާއްޖޭގެ ސަރުކާރުގެ އެއްވެސް އޮފިޝަލަކު، އިޒްރާއީލްގެ އޮފިޝަލަކާ އެއްވެސް ނެގޯސިއޭޝަން އެއް (އޮފިޝަލް/އޮފިޝަލް ނޫން) ކުރިއަށް ގެންދިޔުމަކީ މަނާ ކަމެއްގެ ގޮތުގައި އަޅުގަނޑުމެންނަށް ކަނޑައެޅި ދާނެ. އަދި އިސްރާއީލާ ގުޅުން އޮންނަ ފަރާތްތަކާވެސއ އެއްވެސް ނެގޯސިއޭޝަން އެއް ކުރިއަށް ނުގެންދިޔުމަށް ކަނޑައެޅިދާނެ. އިސްރާއީލްގެ އެންޓިޓީސް އާއެކު ކުރަމުންދާ ވިޔަފާރިތައް ހުއްޓާލުންވެސް އެއީ އަޅުގަނޑުމެންނަށް ކުރެވިދާނެ ކަމެއް. ހަމަ އެގޮތަށް ދިވެހިންގެ ގޮތުގައި ތިބެ އިސްރާއީލް ޕްރޮމޯޓް ކުރުންވެސް މަނާ ކުރެވިދާނެ.
މެންބަރު ޔާސިރު އަބްދުއްލަތީފް
"އަޅުގަނޑުގެ ހުށަހެޅުމަކީ، ހިނގާށޭ އަޅުގަނޑުމެން އެހެން ސްޓެޕަކަށް ދާން. ގާނޫނެއްގެ ސިފައިގައި، އަޅުގަނޑުމެން ބޭނުންވާ ކަންތައްތައް ތައާރަފްކުރަން އަދި ތަންފީޒުކުރަން." ޔާސިރު ވިދާޅުވި އެވެ.
ޔާސިރުގެ އިތުރުން އެހެން މެންބަރުންވެސް ވަނީ އިސްރާއީލް ޕާސްޕޯޓް ބޭން ކޮށް އެމީހުންގެ މުދާ ރާއްޖެ އެތެރެ ކުރުން މަނާކުރަން ގޮވާލާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
