ވީއައިއޭގެ ބިއްލޫރިގަނޑަކަށް ގެއްލުންދިން މީހާ 15 ދުވަހަށް ބަންދުކޮށްފި
ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ ޓާމިނަލް 1 ގައި ހުރި ބިއްލޫރިގަނޑަކަށް ގެއްލުންދިން ކަމުގެ ތުހުމަތުގައި ބިދޭސީއަކު 15 ދުވަހަށް ބަންދުކުރުމަށް ކްރިމިނަލް ކޯޓުން އަމުރުކޮށްފިއެވެ.
ކްރިމިނަލް ކޯޓުން މި ނިންމުން ނިންމާފައިވަނީ އިއްޔެގެ ވަގުތެއްގައެވެ. އެގޮތުން، އޭނާ ވެލާނާ އިންޓަނޭޝަނަލް އެއާޕޯޓުގެ ޓާމިނަލް 1 ގެ އެރައިވަލް ހޯލުގައި ހުންނަ އިމިގްރޭޝަން ހޯލްޑިން ސެލްގެ ބިއްލޫރިގަނޑަށް ގެއްލުންދީފައިވާ ކަމުގެ މައުލޫމާތު ފުލުހުން ދީފައިވާ ކަމަށް ކޯޓު އަމުރުގައި ވެއެވެ.
މީގެ އިތުރުން، ކްރިމިނަލް ކޯޓުން ނެރެފައިވާ އަމުރުގައި އޭނާ ހައްޔަރުކުރީ އޭނާގެ މައްޗަށް ތުހުމަތުކުރެވޭ ކުށް އޭނާ ކުރި ކަމަށް ސާބިތުވާ މިންވަރަކަށް ހެކި ލިބިފައިވުމުން ކަމަށް ބުނެފައިވެއެވެ.
ހަމައެއާއެކު، އެ ސަރަހައްދަށް ދިޔަ ފުލުހުންގެ ހާދިސާ ރިޕޯޓާއި އިމިގްރޭޝަންގެ އިންސިޑެންޓް ރިޕޯޓް ހުށަހަޅާފައިވާ ކަމަށްވެސް ކޯޓު އަމުރުގައި ވެއެވެ.
އޭނާގެ ބަންދުގެ މުއްދަތު ހަމަވާނީ އަންނަ ނޮވެމްބަރު މަހުގެ 8 ވަނަ ދުވަހުއެވެ. މި މައްސަލަ ކަމާބެހޭ ފަރާތްތަކުން އަދިވެސް ދަނީ އިތުރަށް ތަހުގީގުކުރަމުންނެވެ. ހައްޔަރުކޮށްފައިވާ ފަރާތުގެ ވަނަވަރެއް އަދި ހާމަކޮށްފައެއް ނުވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
