ނަސްރުގެ ދުވަސް ފާހަގަކުރުމަށް މާލެއާއި އަތޮޅުތަކުގައި އެމްއެންޑީއެފުން ގިނަ ހަރަކާތްތަކެއް ބާއްވަނީ

މި އަހަރުގެ ނަސްރުގެ ދުވަސް ފާހަގަކުރުމަށް މާލެއާއި އަތޮޅުތަކުގައި ދިވެހި ރާއްޖޭގެ ޤައުމީ ދިފާއީ ބާރު (އެމްއެންޑީއެފް) އިން ގިނަ ހަރަކާތްތަކެއް ބާއްވަން ނިންމައިފިއެވެ.

އެގޮތުން، މި ހާއްސަ ދުވަހާ ގުޅުވައިގެން މާލެއާއި އަތޮޅުތަކުގައި ދީނީ، އަސްކަރީ އަދި އިޖުތިމާއީ ގިނަ ހަރަކާތްތަކެއް ކުރިއަށް ގެންދިއުމަށް ވަނީ ހަމަޖެހިފައެވެ.

މި ހަރަކާތްތައް ރަސްމީކޮށް ފެށުމަށް ހަމަޖެހިފައިވަނީ، ނޮވެންބަރު 3 ވަނަ ދުވަހުގެ ފަތިހުގައެވެ. އެގޮތުން، އިސްލާމީ މަރުކަޒުގައި ސިފައިން ބައިވެރިވެގެން ބޮޑު ޖަމާއަތުގައި ފަތިސް ނަމާދު ކުރުމަށްފަހު، އެ ދުވަހުގެ ހެނދުނު 06:00 ގައި ތިނެއް ނޮވެންބަރުގެ ހަނދާނީ ބިނާ ސަރަހައްދުގައި ދިދަ ޖެހުމާއި ގާޑް މައުންޓް ކުރުމުގެ ރަސްމިއްޔާތު ބޭއްވުމަށް ވަނީ ރާވާފައެވެ.

މީގެ އިތުރުން، އެ ދުވަހުގެ ހަވީރު 16:15 ގައި ޖުމްހޫރީ މައިދާނުގައި އާންމުންނަށް ހުޅުވާލައިގެން ސިފައިންގެ އަސްކަރީ ހުށަހެޅުމެއް ދެއްކުމަށް ވަނީ ނިންމާފައެވެ. އަދި ނަސްރުގެ ދުވަހުގެ މުނާސަބަތުގައި ބާއްވާ ރަސްމީ ޖަލްސާ އެ ދުވަހުގެ ރޭ އޮންނާނެ ކަމަށާއި، މި ޖަލްސާގައި ސިފައިންގެ ގައުމީ ލަވަ އަލްބަމެއް ނެރުމަށް ހަމަޖެހިފައިވާ ކަމަށް އެމްއެންޑީއެފުން މައުލޫމާތު ދެއެވެ.

މި އަހަރުގެ ހަރަކާތްތައް ހަމައެކަނި މާލެއަށް ހާއްސަ ކުރުމުގެ ބަދަލުގައި، އެމްއެންޑީއެފުން ރާއްޖޭގެ ހުރިހާ ސަރަހައްދެއްގައި ވެސް ފާހަގަކުރުމަށް ވަނީ ނިންމާފައެވެ. އެގޮތުން، ރާއްޖޭގެ އެކި ކަންކޮޅުތަކުގައި ސިފައިން ބައިވެރިވެގެން ޖަމާއަތުގައި ފަތިސް ނަމާދުކުރުމާއި، ދިދަ ނެގުމުގެ ރަސްމިއްޔާތުގެ އިތުރުން ނަސްރުގެ ދުވަހުގެ ދުވުމެއް ކުރިއަށް ގެންދާނެ ކަމަށް ވިދާޅުވެފައިވެއެވެ.

އޭގެ އިތުރުން، 1988 ނޮވެންބަރު 3 ގެ އުދުވާނީ ހަމަލާގައި ޝަހީދުވި ބަތަލުންނަށް ހަނދާން އާކުރުމުގެ ގޮތުން އެ ބޭފުޅުން ނިސްބަތްވާ ރަށްރަށުގައި ވެސް ޚާއްސަ ހަރަކާތްތަކެއް ބޭއްވުމަށް ވަނީ ހަމަޖެހިފައެވެ. އެގޮތުން، ހއ. ދިއްދޫގައި ނޮވެމްބަރު 13 އަދި 14 ގައި، އަދި ހއ. ބާރަށުގައި ނޮވެމްބަރު 20 އަދި 21 ގައި ސިފައިންގެ ފޮޓޯ މައުރަޒާއި، އަސްކަރީ ހުށަހެޅުންތަކުގެ އިތުރުން ކުޑަކުދިންގެ ހަވީރެއް ބޭއްވުމަށް ވަނީ ނިންމާފައެވެ.

މިއީ އެ ހަމަލާގައި ޝަހީދުވި ހއ. ދިއްދޫ ޗާންދަނީއާގެ ޝަހީދު އުމަރު އަހުމަދާއި، ހއ. ބާރަށް ސޯސަން ޝަހީދު އިބްރާހީމް ހުސައިންގެ ހަނދާނާ ގުޅިފައިވާ ދެ ރަށެވެ.