ކައުންސިލަރުންގެ އަދަދު މަދުކޮށް، ލާމަރުކަޒީ ބަޖެޓު ކުޑަކުރުމާ ގުޅޭ ގަރާރު ހުށަހަޅައިފި

ކަރުންސިލަރުންގެ އަދަދު މަދުކޮށް، ލާމަރުކަޒީ ނިޒާމަށް ދައުލަތުން ކަނޑައަޅާ ބަޖެޓު ކުޑަކުރުމަށް ރައްޔިތުންގެ މަޖިލީހަށް ގަރާރެއް ހުށައަޅައިފިއެވެ.

އާބާދީ މަދު ރަށްރަށުގައި ކައުންސިލަރުންގެ އަދަދު މަދުކޮށް، ގިނަ ސިޓީ ތަކުގައިވެސް މިހާރު ހުރިވަރަށްވުރެ އިތުރު ނުކުރުމަށް ސަރުކާރުގެ ވިސްނުން ހުރިކަން މީގެ ކުރިން ރައީސް ޑރ މުޙައްމަދު މުޢިއްޒު ވަނީ އެކި ފަހަރު މަތިން ވިދާޅުވެފައެވެ. އެގޮތުން، 3000 އިން ދަށުގެ އާބާދީތަކުގައި ތިން ކައުންސިލަރުން ތިބޭ ގޮތަށް ހެދުމަށް ވިސްނުން ގެންގުޅުއްވާ ކަމަށް ވަނީ ވިދާޅުވެފައެވެ.

އެކަމާ ގުޅިގެން މަޖިލީހުގެ މެންބަރުންގެ ވިސްނުން ހުރި ގޮތެއް ބެލުމަށް ސަރުކާރު ހިންގާ ޕީއެންސީއަށް ނިސްބަތްވެވަޑައިގަންނަވާ ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހެޅުއްވި މި ޤަރާރުގައި ވިދާޅުވީ، ލާމަރުކަޒީ ގާނޫނަށް އަމަލު ކުރަން ފެށިތާ މިވީ 15 އަހަރު ތެރޭ މިހާތަނަށް 15 ފަހަރު އިސްލާހުކޮށްފައިވާ ކަމަށެެވެ.

އަދި މިވީ 15 އަހަރު ތެރޭ 4 ކައުންސިލް އިންތިހާބެއް ބާއްވައި އެތައް ހާސް ކައުންސިލަރުން އިންތިހާބުކޮށް، އެތަކެއް ބިލިއަން ރުފިޔާ ބަޖެޓުން މި ނިޒާމަށް ހަރަދުކޮށްފައިވާ ނަމަވެސް، ލާމަރުކަޒީ ނިޒާމުގެ ސަބަބުން ހިންގުމަށް އައި އިތުރު ބަދަލަކާއި ފަސޭހައެއް ނުވަތަ ރަށްތަކަށް ތަރައްގީއެއްވެސް ގެނެވިފައިވާތަން ފެންނަން ނެތް ކަމަށް އާެނާ ވިދާޅުވިއެވެ.

"މި ނިޒާމުގެ ސަބަބުން މިހާތަނަށް ފާހަގަވެފައިވަނީ ރާއްޖޭގެ އެކި ކަންކޮޅުތަކުގައި އެކި ސިޔާސީ ޕާޓީތަކުގެ އިސް ހަރަކާތްތެރިން ރަށްތަކުގެ އިދާރީ ހިންގުމުގެ އެންމެ އިސްވެރިންގެ ގޮތުގައި އިންތިހާބުކުރާ ނިޒާމަކަށް މި ނިޒާމު ބައްޓަންވެގެން ގޮސްފައި އޮތުމެވެ. އިދިކޮޅު ޕާޓީން ނެރޭ ކެންޑިޑޭޓުން ގިނަ ފަހަރަށް ސަރުކާރަށް އެއްބާރުލުން ނުދޭކަމުގެ ޝަކުވާ އާންމުވެފައި އޮންނައިރު، ސަރުކާރުން ހިންގާ ތަރައްގީގެ މަޝްރޫއުތަކަށް ވެސް ސީދާ ގޮތެއްގައި ހުރަސް އަޅާފައި އެބަހުރި." ޝުޖާއު ވިދާޅުވިއެވެ.

މިއާއެކު ޤަރާރުގައި ބުނީ، މިހާތަނަށް ކުރެވުނު ދިރާސާތަކުންވެސް، ރައްޔިތުންގެ އެންމެ ބޮޑު ކަންބޮޑުވުމެއް އޮތީ ކައުންސިރަލުންގެ އަދަދާމެދުގައިކަމަށް ވާއިރު، ކުދިކުދި ރަށްތަކުގައިވެސް ފަސް ކައުންސިލަރުން ބައިތިއްބައިގެން، އެމީހުންގެ މުސާރައަށް ބޮޑު ހޭދައެއް ކުރުމަކީ ދެކޮޅު ޖެހޭ ކަމެއް ނޫން ކަމަށް އޭނާ ވިދާޅުވިއެވެ.

އެހެން ކަމުން، ފުލް ޓައިމްކޮށް ފަސް ކައުންސިލަރުން ބެއިތިއްބުމުގެ ބަދަލުގައި ފުލް ޓައިމް ދެމީހުން ބެއިތިއްބުމަށްފަހު، ދެން ތިބޭ މީހުންނަށް ސިޓިން އެލަވަންސް އެއް ދޭ ގޮތަށް ހެދުމަށް ގަރާރުގައި ވަނީ ހުށަހަޅާފައެވެ.