އދ. ގެ ފުރިހަމަ މެންބަރުކަން ފަލަސްތީނަށް ދޭން ފާސްކޮށްފި

އދ. ގެ ފުރިހަމަ މެންބަރުކަން ފަލަސްތީނަށް ދިނުމަށް ފާސްކޮށްފިއެވެ.

މިއަދު ކުރިއަށްދިޔަ އދ. ގެ އާންމު މަޖިލީހުގެ ކުއްލި ބައްދަލުވުމުގައި ފަލަސްތީނަށް ފުރިހަމަ މެންބަރުކަން ދިނުމަށް 143 ޤައުމަކުން ވަނީ ރުހުން ދީފައެވެ.

އަދި ވޯޓުގައި ބައިވެރިވި އދ. ގެ 9 މެންބަރު ޤައުމަކުން ފަލަސްތީނަށް ފުރިހަމަ މެންބަރުކަން ދިނުމަށް ހުށަހެޅި ގަރާރު ފާސްކުރުމާ ދެކޮޅަށް ވޯޓުދީފައިވާއިރު އަދި 25 ޤައުމަކުން ވަނީ އެއްވެސް ކޮޅަކަށް ވޯޓު ނުދޭން ނިންމާފައެވެ.

މި ގަރާރަކީ އެކުވެރި އަރަބި އިމާރާތް (ޔޫއޭއީ) އިން އަރަބް ގުރޫޕްގެ ފަރާތުން ހުށަހެޅި ގަރާރެކެވެ. އެ ގަރާރަށް އެންމެ ފުރަތަމަ ކޯ ސްޕޮންސާ ކުރި ގައުމު ތަކުގެ ތެރޭގައި ރާއްޖެ ހިމެނެއެވެ.

މި ވޯޓާއެކު އދ.ގެ އާންމު މަޖިލީހުން ވަނީ ފަލަސްތީނަކީ އދ.ގެ ފުރިހަމަ މެމްބަރު ގައުމެއްގެ ގޮތުގައި ހެދުމަށް ހުށަހަޅައިފައި އޮތް ހުށަހެޅުން މުރާޖާކުރުމަށް އދ.ގެ ސަލާމަތީ މަޖިލީހަށް ގޮވައިލައިފައެވެ.

އދ ގެ އާއްމު މަޖިލީހުން މިގޮތަށް ފާސްކުރި ނަމަވެސް، ފަލަސްތީނަށް އދ ގެ ފުރިހަމަ މެންބަރޝިޕް ކަށަވަރެއް ނުވާނެއެވެ. އެހެން ނަމަވެސް، އެ ގައުމަކީ ފުރިހަމަ މެންބަރަކަށް ވުމަށް ޝަރުތު ހަމަވާ ގައުމެއް ކަމަށް އދ އިން ދެން ބަލައިގަންނާނެއެވެ.

އަދި މި ގޮތަށް ފާސްކުރުމާއެކު، މިއަހަރުގެ ސެޕްޓެމްބަރު މަހުން ފެށިގެން އދ ގެ އެހެން މެންބަރުންނާއެކު ފަލަސްތީނަށްވެސް އާއްމު މަޖިލީހުގެ ޖަލްސާތަކުގައި ބައިވެރިވުމުގެ ފުރުސަތު ލިބޭނެއެވެ. ނަމަވެސް، ވޯޓުގައި ބައިވެރި ވުމުގެ ފުރުސަތެއް ނުލިބޭނެއެވެ.

އދ ގެ މެންބަރު ގައުމު ތަކުގެ މި ނިންމުމުގެ ސަބަބުން، ޣައްޒާގައި މިވަގުތު ހިންގަމުންދާ ގަތުލު އާއްމަށް އެއްވެސް ލުޔެއް ލިބޭނެ ކަމަށް ނުބެލެވެއެވެ.