އަމްފާއިން ކ. އަތޮޅު ތަޢުލީމީ މަރުކަޒާ ގުޅިގެން މުދައްރިސުންނަށް ޕްރޮގްރާމެއް ކުރިއަށްގެންގޮސްފި

އޮސްޓްރޭލިއާ މޯލްޑިވްސް ފްރެންޑްޝިޕް އެސޯސިއޭޝަން (އޭއެމްއެފްއޭ) އާއި ކ. އަތޮޅު ތަޢުލީމީ މަރުކަޒު (ކޭއޭއީސީ) ގުޅިގެން މުދައްރިސުންނަށް އަމާޒުކޮށްގެން  ގުޅޭ ޕްރޮފެޝަނަލް ޑިވެލޮޕްމަންޓް ސެޝަނެއް ބާއްވައިފިއެވެ.

މި މަހުގެ 8ވަނަ ދުވަހު ތުލުސްދޫގައި ބޭއްވި މި ސެޝަން ކުރިއަށް ގެންދެވީ އޮސްޓްރޭލިއާގެ ސިޑްނީގައި ހުންނަ ސެންޓް ޕިއުސް އެކްސް ކޮލެޖްގެ ހެޑް އޮފް ސްޓޫޑަންޓް އެންގޭޖްމަންޓް، އެންރިޗްމަންޓް އެންޑް ޑައިވަރސިޓީ، ޑެނިއަލް ބާޓަން އެވެ. އޭނާ މި ސެޝަންގައި ޝާމިލުކުރުވަނިވި ތައުލީމު ކުރިއެރުވުމުގައި އޭނާގެ ތަޖުރިބާއާއި މަޢުލޫމާތު ހިއްސާކުރެއްވިއެވެ. އަދި ތަޢުލީމީ ދާއިރާގައި އެހެން މީހުންނާމެދު އޯގާތެރިވުމާއި، ލުއި ފަސޭހަކަމާއި، އެއްބާރުލުން ދިނުމުގެ މުހިންމުކަމާ ބެހޭގޮތުން ވަނީ މައުލޫމާތުދީފައެވެ.

މި ސެޝަންގައި ކޭއޭއީސީގެ މުދައްރިސުން ބައިވެރިވެ، އެ ބޭފުޅުންގެ ކްލާސްރޫމްތަކުގައި ދިމާވާ ކަންކަމުގެ މިސާލުތައް ހިއްސާކުރެއްވިއެވެ. އަދި ހުރިހާ ދަރިވަރުންނަށް އެކަށީގެންވާ އަދި އެހީތެރިވެދޭ ގޮތަށް ކިޔަވައިދިނުން ބައްޓަންކުރެވިދާނެ ގޮތްތަކާ ބެހޭގޮތުން މަޝްވަރާކުރެވުނެވެ.

މި ސެޝަނަކީ އޮސްޓްރޭލިއާ އާއި ދިވެހިރާއްޖެއާ ދެމެދު ތަޢުލީމީ އެއްބާރުލުމާއި މަޢުލޫމާތު ބަދަލުކުރުން އިތުރުކުރުމަށް އޭއެމްއެފްއޭއިން ކުރަމުންދާ މަސައްކަތުގެ ތެރެއިން ބޭއްވުނު ސެޝަނެކެވެ. ކާމިޔާބުކަމާއި އެކު އެ ސެޝަން ބޭއްވުމާއެކު، ރާއްޖޭގެ އެކި ސްކޫލުތަކާއި ތަޢުލީމީ ދާއިރާގެ ބައިވެރިންނާއެކު މިފަދަ އިތުރު ޕްރޮގްރާމްތައް ކުރިއަށް ގެންދިއުމަށް އޭއެމްއެފްއޭއިން ވަނީ ރާވާފައެވެ.